Escuela tein Techmachtia iTekiyo Dios xiuit 2015 techpaleuis maj okachi kuali titamachtikan

¹ David kijkuiloj: “Maj notajtoluan uan tein niknemilia itech noyolo mitsyolpaktikan, Jiova, noTepejxit uan noTemakixtijkauj” (Sal. 19:14). Tejuan no tiknekij maj totajtoluan kiyolpaktikan Jiova uan tikitaj ke se tatiochiualis tikteixmatiltiskej tein melauak itech nechikol uan itech tanojnotsalis. Jiova techmachtia keniuj kuali titanojnotsaskej, se taman tein kikui yejua Escuela tein Techmachtia iTekiyo Dios. Nejin tamachtilis motemaka sejse semana itech panoua 111,000 nechikolmej noyampa taltikpak uan kinpaleuiani taltikpakneminij akin tataman nemilis kipiaj, maj kuali kintaneltoktikan oksekin uan maj kiteixmatiltikan kuali tanauatilmej ika nejmachkayot uan yolchikaualis (Hech. 19:8; Col. 4:6).

² Itech programa tein mokuis itech escuela xiuit 2015 moitas tamachtilismej tein mokixtiskej itech amaixmej ¿Akonimej kichiujtokej itanejnekilis Jiova itech nejin tonalmej?; Biblia, ¿toni ika tajtoua?; Kuali tanauatilmej tein Dios kitemaka; Maj tikakikan Dios uan tinemiskej nochipaya; uan itech ¿Toni techmachtia iTajtol Dios? Okse taman tein yankuik yejua ke okachi amo uejkauas tanojnots kampa moijtoua tein moixtajtoltia itech Biblia uan tamachtilis 1. Maj tikitakan nejin taman tein mopatak uan keniuj ixyetok maj mopanolti sejse tamachtilis.

³ Tanojnots kampa moijtoua tein moixtajtoltia itech Biblia. Tokniuan akin kipanoltiskej nejin tamachtilis tein ixyetok nejon semana, kipiaskej ome minuto uan kinextiskej se tamachtilis tein kiajsikej uan tein tapaleuis itech nechikol. Yejua ika, moneki kuali momachtiskej uan ijkon uelis kimelauaskej itech tiempo tein ixyetok. Satepan, ijkon kemej ipa mochiuani, takakinij kipiaskej chikuasen minuto, uan kijtoskej tamachtilis tein kiajsikej keman kiixtajtoltijkej Biblia itech tajko minuto. Moneki kuali timomachtiskej uan tikchiuaskej kemej ixyetok uan ijkon titanankiliskej kemej tapaleuis uan maj amo pano tajko minuto. Sayoj ke, nejin se taman tein kuali techmachtia uan no tapaleuia maj okseki tokniuan kijtokan tein kiajsikej keman kiixtajtoltijkej Biblia.

⁴ Tamachtilis 1. Akin kiixtajtoltis Biblia moneki maj amo pano eyi minuto, uan amo miak tajkuilolmej yeski. Akin kipanoltiskej nejin tamachtilis moneki miakpa momachtiskej ika tajtol chikauak uan kikakiskej maj kuali kakisti uan maj amo motsajtsakuilikan, nejin tapaleuis maj moajsikamati tamachtilis kemej moneki. Nochin tiitaixpantijkauan Jiova moneki timochikauaskej kuali titaixtajtoltiskej porin nejon se taman tein motelneki itech totaueyichiualis. Tein melauj semi techyolpaktia tikitaskej ke itech tonechikoluan moajsij miakej konemej akin kuali taixtajtoltiaj. Uan tel kuali tein kichiuaj tetatmej akin kitemouaj kinpaleuiskej ininkoneuan ika netasojtalis maj kuali taixtajtoltikan.

⁵ Tamachtilis 2. Kipanoltis se tokniuj siuat uan moneki uejkauas makuil minuto. Moneki kimelauas tamachtilis ijkon kemej ixyetok. Keman tamachtilis mokixtis itech amaix ¿Toni techmachtia iTajtol Dios?, moneki kipanoltis kemej yekmelauj mochiua itech tanojnotsalis uan kemej tapaleuis. Keman tamachtilis mokixtis itech okse amaix, yejua kiitas keniuj kipanoltis uan kiixpejpenas tajkuilolmej tein kinamikis. No uelis kikuis okseki tajkuilolmej itech Biblia tein mouikas ika tamachtilis tein kimelaujtos. Akin kiixyekana nejin nechikol kiixtalis akoni iuan panos.

⁶ Tamachtilis 3. Nejin tamachtilis uejkauas makuil minuto uan uelis kipanoltis se tokniuj takat oso se tokniuj siuat. Komo kipanoltia se tokniuj siuat, kichiuas ijkon kemej tamachtilis 2. Komo kipanoltia se tokniuj takat, tamachtilis tein mokixtia itech okseki amaixmej moneki kipanoltis kemej se tanojnots, uan tanemilis keniuj tapaleuis itech nechikol. Tokniuj moneki kimelauas tamachtilis uan kiixpejpenas tajkuilolmej tein kinamikis.

⁷ Yankuik taman kemej mopanoltis tamachtilis 3. Keman tamachtilis tein mopanoltis mokixtis itech amaix ¿Toni techmachtia iTajtol Dios?, nejin kitemakas se tokniuj takat uan moneki yeski kemej se ixneskayot kampa kinextis keniuj mochiua taueyichiualis kemej kalyetouanij oso tanojnotsalis. Akin kiixyekana nejin nechikol kiixtalis akoni kipaleuis uan keniuj kipanoltis. Akin kipaleuis moneki yeski ichankauj oso se tokniuj takat. Keman kipanoltis tamachtilis, uelis kikuis okseki tajkuilolmej tein kipaleuis tamachtilis tein ika tajtojtok. Kemansa, kipanoltis se tayekankej, yejua uelis kiixpejpenas akoni kipaleuis uan keniuj kichiuas. Tikyekmatij ke semi tayolchikauas itech nechikol kiitaskej keniuj tayekananij kuali tamachtiaj iniuan semej ichankauan oso okse tokniuj.

⁸ Tayolmajxitilis. Keman matamiskej akin kipanoltiskej tamachtilis 1, 2 uan 3, akin kiixyekana nejin nechikol kijtos itech ome minuto tein kuali kichiuak momachtijkej uan kiluis seki taman tein kijtoua Benefíciese.

⁹ Itech amaix Benefíciese, página 79 hasta 81, momachtianij uelis kiitaskej miak taman kemej uelis kipanoltiskej tamachtilis. Keman tamis nechikol, akin kiixyekana escuela kijkuilos tein kinamiki itech iamaix momachtijkej uan kitajtanis iselti ox kichiuak tein tajtani nejon tamachtilis. No, ijkuak oso okse tonal uelis kiluis tein kuali kichiujtok uan kiyolmajxitis ijkon kemej kipaleuis. Motelneki maj nochi momachtianij kiitakan tayolmajxitilis tein kinmakas akin kiixyekana escuela kemej se taman tein kinpaleuis maj okachi kuali kitekitilikan Jiova (1 Tim. 4:15).

¹⁰ Komo se momachtijkej kipanauia tiempo tein ixyetok, akin kiixyekana escuela oso akin kipaleuia xa kichiuas maj kakisti se taman oso kitejtelos se lapiz itech teisa, tein kinextis ke tamikya tiempo. Keman ijkon panos, momachtijkej moneki kitamis tein kijtojtoya uan temos (xikonita Benefíciese, página 282, párrafo 4).

¹¹ Tikinyoleuaj nochin akin kuali tekititokej maj moijkuilokan itech Escuela tein Techmachtia iTekiyo Dios (xikonita Benefíciese, página 282, párrafo 6). Tamachtilis tein kitemaka nejin escuela kipaleuiani ixolal Dios maj kiteixmatilti kuali tanauatilmej ika iTekiuajyo Dios ika yolchikaualis, poujkaitalis uan netasojtalis. Tikyekmatij ke Jiova kiyolpaktia maj tiktekitiltikan tamachtilis tein yejuatsin techmaka porin tiknekij tikueyichiuaskej (Sal. 148:12, 13; Is. 50:4).