Kitojtokaj Cristo ika nochi ininyolo uan mochiuaj kuali taltikpakneminij

¿TONI ome taman okachi kichiuak Jesús keman kitekitilij Dios? Yekinika, Jesús kitemouaya kipatas ininyolo taltikpakneminij uan amo tanemililmej tein kipiaj itech política. Kemej neskayot, maj tikitakan toni kinextij ke motelneki keman tamachtij itech tepet. Tepitsin achto ke kijtoskia ke itatojtokakauan tamatij kemej istat uan tanex, kiniluij takakinij ke yolpakij akin “kimachiliaj ke yolmayanaj uan yolamikij porin kiyolnejnekij chipaukanemiske”. Uan amo sayoj yejuan, ta no akin yolnejmachmej, akin “yolchipauke” uan akin yolseujtokej (Mateo 5:1-11). Jesús kinekia maj itatojtokakauan kiajsikamatinij ome taman: monekia moojtokaltiskej ika itanauatiluan Dios tein kijtoua toni kuali uan toni amo, uan no monekia kitekitiliskej Dios ika nochi ininyolo.

Ojpatika, Jesús kinikneliaya taltikpakneminij tein tajyouiayaj uan yejua ika kinpaleuiaya itech inintajyouilis. Maski ijkon, amo kichiuak tein tapaleuiskia maj tami tajyouilis itech taltikpak (Mateo 20:30-34). Kinpajtij akin mokokouayaj, sayoj ke amo tamik kokolis (Lucas 6:17-19). Kinyolseuij akin kintajyouiltiayaj, sayoj ke amo tamik tajyouilis. Hasta kintamakak akin mayanayaj, sayoj ke amo tamik mayan (Marcos 6:41-44).

Kipataj ininyolo taltikpakneminij uan kinpaleuiaj itech inintajyouilis

¿Keyej Jesús kitemoj kipatas ininyolo taltikpakneminij uan kinpaleuis itech inintajyouilis, sayoj ke amo tayektalij itech taltikpaknechikolmej nion kitamij tajyouilis? Porin kimatia ke satepan, ika iTekiuajyo, Dios kichiuaskia nejon (Lucas 4:43; 8:1). Yejua ika, se tonal keman imomachtijkauan kiiluiayaj maj kisentokani tapajtiani, yejua kiniluij: “Tiyoue tejuan nepakauin tech ne pueblitos amo uejka para no [...] [nikinmachtis] ika in yankuik Tajtoltsin, porin yejua notekiu, uan yejika Nejuatsin niuala” (Marcos 1:32-38). Kemej tikitaj, maski Jesús no kinpaleuij taltikpakneminij itech inintajyouilis, kiitaya ke okachi monekia kintapouis uan kinmachtis iTajtol Dios.

Axkan, itaixpantijkauan Jiova no ijkon kichiuaj kemej Jesús ijkuak kiteixmatiltiaj nejon tamachtilis tein kipia Biblia. No mochikauaj kinpaleuiskej taltikpakneminij itech inintajyouilis ijkuak kinmakaj nepaleuil akin kimatij ke kinpoloua. Sayoj ke amo kichiuaj tein tapaleuis maj tami tein amo kuali uan tajyouilis itech taltikpak, porin senkis kineltokaj ke nejon kichiuas iTekiuajyo Dios (Mateo 6:10). Okachi kuali, kitemouaj kipataskej ininyolo taltikpakneminij, ijkon kemej kichiuak Jesús uan amo taltikpaknechikolmej tein kipaleuiaj política. Uan taixejekol tein kichiuaj, porin kuejmol yetok itech ininyolo taltikpakneminij, amo itech política.

Mochiuaj kuali taltikpakneminij

Itaixpantijkauan Jiova kimatij ke akin yekmelauj kitojtokaj Cristo, moneki mochiuaskej kuali taltikpakneminij. Yejua ika, kinpoujkaitaj uan kintakamatij tekiuanij, uan itech ininamaixuan uan inintanojnotsalis, kinyolchikauaj taltikpakneminij maj no ijkon kichiuakan. Sayoj ke ijkuak tekiuanij kintajtaniaj maj kichiuakan teisa tein kitapanauilia itanauatiluan Dios, ‘kitakamatij Totajtsin Dios uan amo achto kitakamatij in tagayot’ (Hechos 5:29; Romanos 13:1-7).

Uan no, youij kajkalpan uan kinyoleuaj taltikpakneminij maj kiselikan se nemachtil ika Biblia tein amo se kiixtaua. Ika nejon nemachtil, kinpaleuianijya tel miakej taltikpakneminij maj kipatakan inintachiualisuan. Nochi xiujmej, tel miakej kikauanij auilnemilis, ijkon kemej drogas, tachichinalis, tauanalis uan neauiltilis ika tomin. Axkan yejuan mochiuaj kuali taltikpakneminij kampa chanchiuaj uan chipaujkanemij porin kichiujtokej kemej tanauatia Biblia.

Uan no, nejin nemachtil ika Biblia kinpaleuijtok kalyetouanij maj okachi kuali yetokan uan maj mopoujkaitakan. No kinpaleuia maj okachi monojnotsakan namikuanij, tetatmej iniuan konemej uan iknimej. Nochi nejin tapaleuia maj okachi kuali mouikakan kalyetouanij uan kampa nemij.

Ika tein tikitakejya itech nejin tataman tamachtilis, ¿toni tikonnemilia? ¿Kijtoua Biblia ke uelis mosentilis taneltokalis iuan política? Tikajsikamatij ke amo. Sayoj ke, akin yekmelauj kitojtokaj Cristo moneki kinextiskej ke mochiuaj kuali taltikpakneminij. ¿Keniuj? Ijkuak mochiuaj kemej istat uan tanex ininixpan taltikpakneminij ijkon kemej tanauatij Jesús.

Akin mochikauaj kitakamatiskej tein Cristo tamachtij, amo sayoj yejuan kinualkuilia tein kuali, ta no ininchankauan uan itech xolal kampa nemij. Komo tejuatsin tikonneki okachi tikonmatis ika tamachtilis tein motemakatok itech moxolal, timitsonyoleuaj xiontajto iniuan itaixpantijkauan Jiova tein nemij ompakauin kampa tionchanchiua.a

[Tajtolmelaualis]

[Tanemilil itech página 7]

Jesús kitemoj kipatas ininyolo taltikpakneminij, amo tayektalis itech política

[Tanemilil itech página 8]

Itaixpantijkauan Jiova kimatij ke akin yekmelauj kitojtokaj Cristo, moneki mochiuaskej kuali taltikpakneminij