Jiova kinsentilia ichankauan
“Namechtatautia [...] ximofuerzajuikan [maj] [...] in Yektikatsin Espíritu namechpaleuijtiu para nachipa xikpixtinemikan ne yolseuilis se uan okse.” (EFE. 4:1, 3)
¿TIKONMATI TIKONMELAUAS?
¿Toni kichiua itaixejekol Dios?
¿Toni kijtosneki maj timokauakan maj espíritu techpaleui maj tikpiakan yolseuilis se iuan okse?
¿Toni techpaleuis maj okachi titepaleuikan ika tetasojtalis?
1, 2. ¿Toni kineki Jiova maj mochiua nikan taltikpak, uan keniuj kineki maj nemikan taltikpakneminij?
KEMAN tikonkaki tajtol kalyetouanij, ¿toni tikonnemilia? ¿Tiontanemilia itech netasojtalis uan yolpakilis? ¿Tiontanemilia itech tekit tein nankisenchiuaj? ¿Oso tiontanemilia itech se kali kampa onkak nepaleuil, kampa se momachtia miak taman uan se moixejekoltia teisa? Xa ijkon tikonnemilia komo tionmoajsi itech se kali kampa kalyetouanij motasojtaj. Jiova kichiuak maj onka nemilis kemej kalyetouanij (Efe. 3:14, 15). Yejuatsin kiixtalijka maj nochin ikoneuan tein nemij iluikak oso nikan taltikpak maj kipianij yolseuilis, maj takuaujtamatikan se iuan okse uan maj senyetokan.
2 Keman kalakik tajtakol, taltikpakneminij amo pouiajok iuan ichankauan Dios tein moajsij iluikak uan taltikpak, sayoj ke nejon amo kipatak itanejnekilis Jiova. Yejuatsin kichiuas maj ikoneuan Adán uan Eva kipexontikan taltikpak tein yeski se xochital (Gén. 1:28; Isa. 45:18). Tein melauj, kichiuaniya nochi tein tapaleuis maj mochiua kemej kiixtalijtok, uan seki taman tein kichiujtok moijtoua itech amaix Efesios kampa okachi ika tajtoua senyetolis. Maj tikitakan seki tajkuilolmej tein kipia nejin amaix uan maj timomachtikan keniuj uelis titapaleuiskej maj mosentili nochi tein nemi iluikak uan taltikpak ijkon kemej Jiova kiixtalijtok.
ITAIXEJEKOLIS UAN TEIN KICHIUA
3. ¿Toni itaixejekol Dios tein ika tajtoua Efesios 1:10, uan kemanian peuak yekinika tasentililis?
3 Nochi tein Jiova kichiua nochipa mouika iuan itanejnekilis. Yejua ika, itech “tonal ten Dios kitalij ya” peuak mochiua “itaixejekol”, tein kijtosneki, se taman tein tapaleuia maj mosentilikan nochin ikoneuan kemej kalyetouanij (xikonixtajtolti Efesios 1:8-10). Nejin itaixejekol Dios tapaleuia maj mochiua ome tasentililis. Yekinika kinpaleuia tokniuan taixpejpenalmej maj kichiuakan tein moneki uan ijkon uelis nemiskej ne iluikak iuan Jesucristo kemej ininTaixyekankauj. Nejin peuak itech Pentecostés xiuit 33 itech totonaluan, keman Jiova peuak kinsentilia taltikpakneminij tein tekiuajtiskiaj ne iluikak iuan Cristo (Hech. 2:1-4). Ika inemilis Jesús tein kitemakak, Dios kinita yolmelaujkej nejin taixpejpenalmej uan uelis nemiskej nochipaya. Yejua ika, kiajsikamatij ika miak pakilis ke kinselijkejya kemej ‘ikoneuan Dios’ (Rom. 3:23, 24; 5:1; 8:15-17).
4, 5. ¿Toni kijtosneki ojpatika tasentililis tein kichiua itaixejekol Dios tein moijtoua itech Efesios 1:10?
4 Itech ojpatika tasentililis, Dios kinpaleuia maj kichiuakan tein moneki akin nemiskej itech Xochital nikan taltikpak tein kinixyekantos iTekiuajyo Mesías. Akin yekinika moajsij itech nejon tasentililis yejuan “uel miak tagayot” (Apo. 7:9, 13-17; 21:1-5). Keman Cristo Tekiuajtitos se mil Xiuit, tel miakej tein moajokuiskej iniuan mosentiliskej (Apo. 20:12, 13). Okachi uelis tiknextiskej ke tisenyetokej keman oksepa nemiskej tein momikilijkaj. Keman tamis mil xiuit, “ten ongak nikan taltikpak”, oso taltikpakneminij, kipiaskej se tayejyekolis tein ika tamisya, uan akin amo kikauaskej Dios, kinselis kemej “ikoneuan” tein nemiskej nikan taltikpak (Rom. 8:21, NM; Apo. 20:7, 8).
5 Axkan Jiova kinpaleuijtok maj kichiuakan tein moneki akin nemiskej iluikak oso nikan taltikpak. Sayoj ke, ¿keniuj tisejsemej uelis titapaleuiskej maj mochiua itaixejekol Dios?
XIMOKAUAKAN MAJ ESPÍRITU NAMECHPALEUI XIKPIAKAN YOLSEUILIS SE IUAN OKSE
6. ¿Katiyejua tajkuilolmej itech Biblia kinextiaj ke tein kichiuaj kemej Cristo moneki monechikoskej?
6 Biblia kinextia ke tein kichiuaj kemej Cristo moneki monechikoskej (1 Cor. 14:23; Heb. 10:24, 25). Nejin amo kijtosneki maj sayoj seko se mosentili, kemej itech tanamakaloyan oso kampa mochiua neauiltilis. Ta yekmelauj senyetolis tikpiaj ijkuak tiktakamatij itanauatiluan Jiova, uan timokauaj maj iespíritu techpaleui maj timopatakan.
7. ¿Toni kijtosneki maj timokauakan maj espíritu techpaleui maj tikpiakan yolseuilis se iuan okse?
7 Kemej takuaujtamatij itech inemilis Cristo tein kitemakak, Jiova kinita ke yolmelaujkej. Akin taixpejpenalmej kinselia kemej ikoneuan, uan okseki ichkamej kinselia kemej itasojikniuan. Sayoj ke, kemej tinentokejok itech nejin taltikpak kampa amo takualyan, kuali tikmatij ke tikpiaskej kuejmolmej iniuan oksekin (Rom. 5:9; Sant. 2:23). Yejua ika Biblia techyolmajxitia maj ‘timoxikouilijtiyakan ne yolxokolilis ten techchiuiliaj’. ¿Keniuj uelis tisenyetoskej iniuan tokniuan? Moneki maj ‘tinentinemikan ika ne yolyemanilis’ uan yolseuilis. Uan no, Pablo techyoleua maj timokauakan maj ‘Yektikatsin Espíritu techpaleuijtiu para nachipa tikpixtinemiskej ne yolseuilis se uan okse’ (xikonixtajtolti Efesios 4:1-3). Uan tikchiuaj nejin tein techyolmajxitia Biblia, keman timokauaj maj techyekana iespíritu Dios uan maj techpaleui maj tikpiakan itakilo. Nejin itakilo espíritu techpaleuia maj tikmelauakan kuejmolmej tein uelis tikpiaskej, amo ijkon kemej tanejnekilis tein kiuika tajtakol, tein sayoj texeloua.
8. ¿Keniuj kinxeloua taltikpakneminij tanejnekilis tein kiuika tajtakol?
8 ‘Tanejnekilis ten kuika tajtakol’ kinxeloua taltikpakneminij (xikonixtajtolti Gálatas 5:19-21). Kemej neskayot, akin mosentekaj tein amo namikuanij kinxeloua iuan Jiova uan inechikol, uan akin namikej tein auilnemi, kichiua maj tajyouikan kalyetouanij, porin konemej kinxeloua iniuan itatuan uan takat oso siuat akin kikajkayaujkej kixeloua iuan inamik. Akin kichiua tachiualis tein tel pitsotik amo ueli senyetok iuan Dios uan iniuan akin kitasojtaj. Mochiua kemej ijkuak tiknekij ome taman tiksenpepechoskej: moneki maj chipaujkej uan ijkon uelis moyekpepechoskej. Akin kichiua tachiualis tein tel tepinaujtij, kinextia ke senkis kiixtopeua itanauatiluan Dios tein melaujkej. Uan no, nochi okseki tanejnekilis tein kiuika tajtakol, kinxeloua taltikpakneminij uan kinxeloua iuan Dios. Jiova senkis kitauelita nochi nejin tachiualismej.
9. ¿Toni uelis motajtanis se tokniuj, uan ijkon kimatis ox senkis mokaujtok maj espíritu kipaleui maj kipia yolseuilis iniuan oksekin?
9 Yejua ika, tisejsemej moneki timotajtaniskej: “¿Senkis nimokaujtok maj ‘Yektikatsin Espíritu nechpaleuijtiu para nochipa nikpixtinemis ne yolseuilis se uan okse’? ¿Toni nikchiua keman nikpia se kuejmol? ¿Nikintapouia notasojikniuan porin nikneki maj nechiluikan ke nejua kuali niyetok? ¿Niktemoua keniuj uelis nikyektalis oso nikchia maj tayekananij kiyektalikan? ¿Niktemoua amo nimoitas iuan porin amo nikneki maj nechelnamikili?”. Senkis tikmatij ke komo tikchiuaskiaj nejin tachiualismej, amo titapaleuijtoskiaj maj nochi mosentili imako Cristo ijkon kemej Dios kiixtalijtok.
10, 11. 1) ¿Keyej motelneki maj tikpiakan yolseuilis iniuan tokniuan? 2) ¿Toni tachiualismej tapaleuiaj maj tikpiakan yolseuilis uan itatiochiualis Dios?
10 Jesús kijtoj: “Kuak tikuikas ne motetayokolil tenika tiknemilia tikmouistilitiu Totajtsin Dios uan [...] [tikelnamiki] ke mokniu mitsyolkualantia, ijkuakon xikaua ompa [...] [uan] xiyo achto xikitati ne mokniu uan xikiliti ma mitstapojpolui para ijkon nanmoyekauaske. Uan de ompa kuali timokuepas uan tikmouistilitiu Totajtsin Dios ika ne motetayokolil. Uan takan aksa mitsteluilia [...] nimantsin xiyo uan xitajtaniliti [...] ma mitstapojpolui” (Mat. 5:23-25). Uan Santiago kijkuiloj: “Ten tekititinemij para ma [onka] ne neyolseuilis [...,] kichiutinemij ma in taltikpakuani ma kipiakan se yolchipaualis” (Sant. 3:17, 18). Yejua ika, amo uelis tikpiaskej yolchipaualis oso melaujkayot komo amo titapaleuiaj maj onka yolseuilis.
11 Maj tiktalikan se neskayot. Komo se tatokkej amo kimeua imil, xiujpachiuis uan amo mochiuas maski yeski kuali tal kampa tatokak. No ijkon, amo uelis tikiskaltiskej kualneskayomej tein Dios kineki, komo totachiualis tatsakuilia maj tikpiakan yolseuilis iniuan tokniuan. Komo niman titetapojpoluiaj uan tikinchiuiliaj tein kuali oksekin, titapaleuiskej maj tikpiakan yolseuilis uan itatiochiualis Dios.
12. ¿Keniuj tayekananij tapaleuiaj maj tisenyetokan?
12 Uan no, “takamej kemej netetayokolilmej” uelis tel tapaleuiskej maj tisenyetokan. Yejuan kinekij techpaleuiskej “maj tiuelikan tisenyetokan itech totakuaujtamatilis” (Efe. 4:8, 13, NM). Keman tayekananij touan kichiuaj itekiyo Dios uan ika tamatilis kijtouaj tajtolmej tein kikixtiaj itech iTajtol Dios, techpaleuiaj maj okachi kuali tiknextikan ikualneskayouan Cristo (Efe. 4:22-24). ¿Tikitaj ke nejon tayolmajxitilis, no ika techpaleuia Jiova maj tiuelikan tinemikan itech Xochital kampa techixyekantos iKonetsin? Uan namejuan tayekananij, ¿nankinextiaj ke yejua nejon nankinekij nankichiuaskej ijkuak nankinmelauaj tokniuan? (Gál. 6:1.)
“XIMOPALEUIKAN IKA TETASOJTALIS SE UAN OKSE”
13. ¿Toni panoskia komo amo tikchiuaskiaj kemej techyolmajxitia Efesios 4:25-32?
13 Efesios 4:25-29 techiluia maj amo tikchiuakan seki taman tein teijtakoua. Kemej takajkayaualis, kualanyot, tatsiuilis uan tajtolmej tein amo teyolchikauaj. Keman aksa amo kichiua kemej techyolmajxitia Biblia, iespíritu Dios motayokoltia porin nejin se chikaualis tein tapaleuia maj tisenyetokan (Efe. 4:30). No techpaleuis maj tikpiakan yolseuilis uan maj tisenyetokan, komo tikchiuaj kemej Pablo kijkuiloj: “Ximosekokautiyakan de nochi ne yolchichikayot uan ne yolkualanilis uan ne tauelot. Uan [...] ne uijuikaltilis uan nochi ten miak tataman tajtolme ten teyolxokolia. Ta, namechilia ke ximopaleuikan ika tetasojtalis se uan okse. Uan xikiniknelikan se uan okse. Uan no ximotapojpoluikan se uan okse ijkon keme Totajtsin Dios namechtapojpoluilij ya namotajtakoluan porin nanpoutinemij iuan Cristo” (Efe. 4:31, 32).
14. 1) ¿Toni kijtosneki tajtolmej “ximopaleuikan ika tetasojtalis se uan okse”? 2) ¿Toni techpaleuis maj titepaleuikan ika tetasojtalis?
14 Ijkuak Biblia kijtoua “ximopaleuikan ika tetasojtalis se uan okse”, kiteajsikamatiltia ke xa amo tikchiuanij nejon uan moneki tiknextiskej. Motelneki maj achto tiknemilikan toni kimachiliaj oksekin uan amo tein tejuan tikmachiliaj (Fili. 2:4). Xa tiknemiliaj tikijtoskej teisa tein uelis tauetskitis oso kinextis ke tiktelmatij, sayoj ke ¿amo titeyolxokoliskej komo tikijtouaj? Komo achto tiknemiliaj tein tikijtoskej, techpaleuis maj tikchiuakan kemej techiluia Pablo.
NETASOJTALIS UAN POUJKAITALIS KEMEJ KALYETOUANIJ
15. ¿Keniuj Efesios 5:28 kinpaleuia tetakauan maj kitojtokakan neskayot tein kikauak Cristo?
15 Biblia kineskayotia netasojtalis tein mopialiaj Cristo iuan nechikol kemej yeskia netasojtalis tein mopialiaj namikuanij. Nejin kinextia ke tetakauj moneki kiixyekanas, kitasojtas uan kiyekpias inamik, uan siuat moneki kipoujkaitas inamik (Efe. 5:22-33). Pablo kijkuiloj: “No ijkon moneki ke in teyokichuan [oso tetakauan] ma kintasojtatinemikan ninsiuauan ika ne tetasojtalis tenika cada se teyokich [...] motasojtatinemi” (Efe. 5:28). ¿Toni kinekia kiteajsikamatiltis Pablo keman kijtoj “no ijkon”? Achtopa ika tajtojka keniuj “Cristo Jesús kinteltasojtak nochi itaneltokakauan hasta motemaktij ma kimiktikan para kixtauas den nintajtakoluan [...]. Uan Cristo techyolchipauak ya ika in Itajtoltsin de Dios”. Yejua ika, moneki maj tetakauj kintelpaleui ichankauan maj kichikauakan ininkuali uikalis iuan Dios, uan ijkon tapaleuis maj nochi mosentili imako Cristo ijkon kemej Jiova kiixtalijtok.
16. ¿Toni tein tel kuali moita keman tetatmej kitakamatij tein Biblia kinnauatia?
16 Tetatmej nochipa moneki kielnamikiskej ke kitakamattokej se tanauatil tein Jiova kinmakak. Tetayokoltij tikijtoskej ke itech nejin taltikpak miakej taltikpakneminij “amo kipiaj ok tetasojtalis” (2 Tim. 3:1, 3). Miakej takamej amo kinekij kichiuaskej inintekiuj tein kipiaj kemej tetatmej, uan nejon kinualkuilia ouijkayomej ininkoneuan. Pablo kinyolmajxitij tetatmej tein kichiuaj kemej Cristo: “Amo xikinkualantikan nanmokoneuan, ta xikiniskaltikan, xikinmelauakan uan xikinpaleuikan maj kipiakan itanemilil Jiova” (Efe. 6:4, NM). Iniuan ininchankauan, konemej momachtiaj tetasojtaskej uan tapoujkaitaskej. Yejua ika, tetatmej tein kinpaleuiaj ininkoneuan maj kipiakan nejin kualneskayomej, tapaleuiaj maj nochi mosentili ijkon kemej Jiova kiixtalijtok. Tetatmej moneki kichiuaskej maj ininkoneuan kimachilikan netasojtalis kemej kalyetouanij. Moneki maj amo niman kualanikan, maj amo kintsajtsilikan uan maj amo kiniluikan teisa tein kinyolkokos, uan ijkon kinmachtiaj ininkoneuan maj tetasojtakan uan maj tepoujkaitakan. Nejin kinpaleuis konemej maj ueli nemikan itech nejin taltikpak keman Dios kiyektalis.
17. ¿Toni techpaleuis maj tikixnamikikan Satanás?
17 Moneki tikajsikamatiskej ke Satanás, akin yekinika kichiuak maj amo onkani yolseuilis ne iluikak uan taltikpak, kitemos keniuj techtsakuilis maj amo tikchiuakan itanejnekilis Dios. Miakej kichiuaj tein Satanás kineki ijkuak namikuanij kitsayanaj amat ininixpan tekiuanij, se takat uan se siuat sennemij maski amo monamiktiaj oso monamiktiaj takat iuan takat uan siuat iuan siuat. Sayoj ke tejuan amo tiktojtokaj inintachiualis uan inintanemilil. Tejuan tiktojtokaj neskayot tein techkauilij Cristo (Efe. 4:17-21). Yejua ika, Biblia techiluia maj timotalilikan “nochi ne manamikme ten Dios techmaka” uan ijkon uelis tikixnamikiskej Satanás uan iamokuali ejekauan (xikonixtajtolti Efesios 6:10-13).
“MA TIMOYOLTASOJTATINEMIKAN SE UAN OKSE”
18. ¿Toni techtelpaleuia maj tisenyetokan iniuan tokniuan?
18 Tein techtelpaleuia maj tisenyetokan iniuan tokniuan, yejua netasojtalis. Ika nochi toyolo tiktasojtaj toTekotsin, toDios uan tokniuan, yejua ika senkis timokauaj maj ‘Yektikatsin Espíritu techpaleuijtiu para nachipa tikpixtinemiskej ne yolseuilis se uan okse’ (Efe. 4:3-6). Itech se netataujtil tein Jesús kichiuilij iPopaj, ika tajtoj nejon netasojtalis keman kijtoj: “Amo nimitsontatatautilia sayo ika por nijin nomomachtijkauan. Ta, no [...] ika por nekes ten takuautamatiske ok satepan nouantsin, kuak nomomachtijkauan kinnojnotstinemiske ika notajtoltsin. Uan ijkon [...] ma sen poutinemikan touan nochi nomomachtijkauan, ijkon keme Tejuatsin timoajsitinemi nouan, uan ijkon keme Nejuatsin no nimoajsitinemi mouantsin. [...] Uan Nejuatsin nikinnextilijtinemik [...] motokaytsin [...]. Uan nikinmachtijtinemis ok de akoni Tejuatsin, para ma ne tetasojtalis tenika tinechonyoltasojta, ma no ninyolijtik yejuan ma mochiua. Uan ijkon melau Nejuatsin nimoajsitinemis ninuan” (Juan 17:20, 21, 26).
19. ¿Toni senkis tikixtaliaj tikchiuaskej?
19 Komo tikitaj ke semi techouijmaka timopataskej porin titajtakouanij, netasojtalis techolinis maj tiktataujtikan Dios ijkon kemej akin kijkuiloj salmo: “Xikchiua maj noyolo ajsito uan ijkon nikmoujkatokas motokay” (Sal. 86:11). Yejua ika, maj tikixtalikan senkis tikixtopeuaskej Satanás keman kiyejyekos techkaualtis toDios tetasojtakej uan akin yejuatsin kinselia. Itech kalyetouanij, itech tanojnotsalis uan itech nechikol, maj timochikauakan tikchiuaskej kemej Pablo techiluia: “Xiyolchipauke ijkon keme Yejuatsin yolchipauak. Uan ma timoyoltasojtatinemikan se uan okse” (Efe. 5:1, 2).
[Taixkopin itech página 29]
Xikaua monetetayokolil uan xikmelauati kuejmol tein tikpia iuan mokniuj
[Taixkopin itech página 31]
Tetatmej, xikinpaleuikan nanmokoneuan maj tapoujkaitakan