“¿Akoni nikmouilis?”

“Maski kinekiskej nechteuiskej, niksentokas nikpias takuaujtamatilis.” (SAL. 27:3)

¿KENIUJ UELIS MITSONYOLCHIKAUASKEJ NEJIN TAJKUILOLMEJ?

Salmo 27:1

Salmo 27:4

Salmo 27:11

1. ¿Katiyejua netajtanilmej tiknankiliskej keman timomachtiskej Salmo 27,?

¿KEYEJ okachi moueyitalijtok tanojnotsalis axkan ke okachi momiakilijtok ouijkayomej noyampa taltikpak? ¿Keyej ika miak pakilis tikuij totonaluan uan tochikaualis itech tanojnotsalis maski tatasojti? Maski miakej kimouiliaj tein mochiuas itech tonalmej tein uitsejok, ¿keyej tiksentokaj titaueyichiuaj ika yolchikaualis? Nekuikatil tein tekiuaj David kijkuiloj ika ichikaualis Dios, tein moajsi itech Salmo 27, kinankilis nejin netajtanilmej.

2. ¿Keniuj moujkayot kinijtakoua taltikpakneminij? ¿Toni techpaleuia tejuan maj amo timouikan?

² David kipeualtia nejin salmo ika nejin tajtolmej: “Jiova yejua notanex uan notemakixtijkauj. ¿Akoni nikmouilis? Jiova yejua notapaleuijkauj itech nonemilis. ¿Akoni nikmouilis?” (Sal. 27:1). Moujkayot uelis kichiuas maj aksa kipolo ichikaualis uan maj amo teyi ueli kichiua. Sayoj ke akin kimoujkatoka Jiova, kipaleuia maj amo teyi kimouili (1 Ped. 3:14). Akin kiita Jiova kemej itapaleuijkauj “nemis ika yolseuilis uan amo kipias netekipacholis tein kiualkui ouijkayot” (Pro. 1:33; 3:25). Maj tikitakan keyej.

“JIOVA YEJUA NOTANEX UAN NOTEMAKIXTIJKAUJ”

3. ¿Toni kijtosneki Biblia keman kijtoua ke Jiova yejua totanex, uan toni moneki tikchiuaskej?

³ Keman Biblia kijtoua, “Jiova yejua notanex”, kijtosneki ke yejuatsin techmachtia tein melauak (Sal. 27:1). Ika se yekmelauj tanex ueli tikitaj ouijkayot oso teisa tein uelis techtsakuilis itech ojti kampa tinejnemij. Sayoj ke nejon tanex amo kiajchiua ouijkayot, ta moneki tiyaskej oksekopa. No ijkon, Jiova techpaleuia maj tikajsikamatikan toni kijtosneki tein mochiujtok noyampa taltikpak, technejmachtia ika ouijkayomej tein onkak nikan taltikpak, uan techmaka tamachtilismej itech Biblia tein nochipa techpaleuiaj, sayoj ke moneki tikchiuaskej kemej timomachtiaj. Komo ijkon tikchiuaj, timonejnemiltiskej ika yekmelauj tamatilis, ijkon kemej kijtoj akin kijkuiloj salmo: “Motanauatil kichiua maj okachi nikpia tamatilis ke akin nechtauelitaj [...]. Okachi nikpia taajsikamatilis ke nochin notamachtijkauan” (Sal. 119:98, 99, 130).

4. 1) ¿Keyej ika ueyi takuaujtamatilis David uelik kijtoj: “Jiova yejua [...] notemakixtijkauj”? 2) ¿Kemanian Jiova okachiok mochiuas totemakixtijkauj?

⁴ Itajtoluan David tein moajsi itech Salmo 27:1, kinextia ke kielnamiktoya keniuj achto Jiova kimakixtijka. Kemej neskayot, kimakixtij ijkuak ‘kichiuak maj amo teyi kichiuilianij se tekuani uan se oso’. No ijkon kipaleuij maj kimiktiani ueyi takat Goliat. Satepan, no miakpa kimakixtij keman tekiuaj Saúl kinekia kimiktis ika se lanza (1 Sam. 17:37, 49, 50; 18:11, 12; 19:10). Yejua ika, David ika ueyi takuaujtamatilis kijtoj: “Jiova yejua [...] notemakixtijkauj”. Itech “ueyi tatsakuiltilis” tein amo uejkaua mochiuas, Jiova no ijkon kinpaleuis itekitikauan uan mochiuas inintemakixtijkauj kemej kichiuak iuan David (Apo. 7:14; 2 Ped. 2:9).

MAJ TIKELNAMIKIKAN KENIUJ JIOVA TECHPALEUIANI

5, 6. 1) Komo tikelnamikij nepaleuil tein Jiova techmakani, ¿keniuj uelis techyolchikauas? 2) ¿Keyej techyolchikaua komo tiknemiliaj keniuj Jiova kinmakixtiani itekitikauan?

⁵ Se taman tein techpaleuis maj tikpiakan yolchikaualis, yejua tein kijtoua Salmo 27:2, 3 (xikonixtajtolti). David kielnamikik keniuj Jiova kimakixtijka ijkuak moajsia itech tataman ouijkayomej (1 Sam. 17:34-37). Kielnamikis nejon kipaleuij maj kipia okachi yolchikaualis tein kipaleuiskia maj kixiko okachi uejueyi ouijkayomej. ¿Uan tejuatsin? ¿Tikonelnamiki keniuj Jiova mitsonpaleuiani? ¿Mitsonyolchikaua tikonelnamikis nejon? Kemej neskayot, ¿tikontataujtij Jiova ika nochi moyolo maj mitsonpaleui itech se ouijkayot, uan tikonitak keniuj Jiova mitsonmakak tamatilis oso chikaualis tein mitsonpaleuij xikonixnamiki? Oso, ¿tikonelnamiki keniuj mitsonpaleuij xikonmelaua kuejmol tein mitsontsakuiliaya xikontekitili ika yolpakilis? ¿Tikonelnamiki keniuj mitsonpaleuij xionueli xikonchiua “miak tekit” tein ika tikonueyichiuas? (1 Cor. 16:9.) ¿Toni tikonmachilia keman itech tiontanemilia? ¿Melauj ke tikonelnamikis nochi nejon, kichiua maj senkis xikonneltoka ke Jiova uelis mitsonpaleuis xikonixnamiki oso xikonxiko okachi uejueyi ouijkayomej oso tajyouilis? (Rom. 5:3-5.)

⁶ ¿Uan komo se ueyi tekiuaj kiixtaliskia kinsenixpolos itaixpantijkauan Jiova? Itech totonaluan moajsinij seki taltikpakneminij tein kiixtalianij kichiuaskej nejon, sayoj ke amo uelinij. Komo tiknemiliaj keniuj Jiova kinmakixtiani itekitikauan, uelis techyolchikauas maj amo timouikan maski ualas okachi ueyi ouijkayot (Dan. 3:28).

XIKONTASOJTA TAUEYICHIUALIS TEIN MELAUAK

7, 8. 1) Ijkon kemej kinextia Salmo 27:4, ¿toni kitajtanij David Jiova? 2) ¿Toni kiixnextia ueyi templo espiritual tein iaxka Jiova, uan keniuj tikueyichiuaj ompa?

⁷ Tiktasojtaskej taueyichiualis tein melauak no techpaleuia maj tikpiakan yolchikaualis (xikonixtajtolti Salmo 27:4). Itech itonaluan David, “ichan Jiova” katka tabernáculo. Sayoj ke David kichiuak maj nochi yetoni tein ika mochijchiuaskia templo, se tel ueyi kali tein Salomón satepan kichijchiuak. Tel miak xiujmej satepan, Jesús kinextij ke amo monekiskiaok kiueyichiuatiuij Dios itech se ueyi kali tein kipiaskia itatiochiualis (Juan 4:21-23). Itech Hebreos capítulos 8 hasta 10, tatitanil Pablo kinextij ke nesiko se ueyi templo espiritual itech xiuit 29 itech totonaluan, keman Jesús moauij uan motemaktij kichiuas itanejnekilis Jiova (Heb. 10:10). Nejin ueyi templo espiritual kiixnextia tein Dios kichiuak maj techpaleui, ika takuaujtamatilis tein tikpialiaj inemilis Jesús tein techmakixtia, maj ueli timotokikan iuan. ¿Keniuj titaueyichiuaj itech nejon templo? Keman tikchiuaj netataujtil ika nochi toyolo uan ika “takuautamatilis ten yek ajsitok”, uan keman ika yolchikaualis titetapouiaj tonechialis uan tikinyolchikauaj tokniuan itech nechikolmej, uan ijkuak titaueyichiuaj kemej kalyetouanij (Heb. 10:22-25). Netasojtalis tein tikpialiaj taueyichiualis tein melauak, techyolchikaua itech nejin itamian tonalmej kampa onkak miak ouijkayomej.

⁸ Noyampa taltikpak, tel miakej itekitikauan Jiova okachi tanojnotsaj. Kemej neskayot, momachtiaj okseki tajtolmej oso tapaleuitij kampa amo semi onkakej tanojnotsanij. Ika tein kichiuaj kinextiaj ke, ijkon kemej akin kijkuiloj salmo, kitajtaniaj Jiova se taman: maj kipiakan itatiochiualis uan maj uelikan kitekitilikan maski kipiaskej ueyi ouijkayot (xikonixtajtolti Salmo 27:6).

MAJ TITAKUAUJTAMATIKAN ITECH INEPALEUIL DIOS

9, 10. ¿Toni kijtosneki netenkaualis tein moijtoua itech Salmo 27:10?

⁹ David kijtoua ueyi takuaujtamatilis tein kipiaya itech inepaleuil Jiova, ika nejin tajtolmej: “Komo nopopaj uan nomomaj yekmelauj nechsenkauaskiaj, Jiova nechseliskia” (Sal. 27:10). Ika tein kijtoua Yekinika Samuel capítulo 22, techajsikamatiltia ke itatuan David amo keman kikaujkej. Sayoj ke, itech totonaluan moajsij miakej itekitikauan Dios tein ininchankauan kemaj senkis kinixtopeuanij, sayoj ke kiajsinij nepaleuil tein motemaka ika netasojtalis itech inechikol Dios.

¹⁰ Kemej Jiova ika miak pakilis kinpaleuia itekitikauan tein amo kikauaj keman oksekin kinixtopeuaj, ¿amo no kinpaleuis keman kipiaskej okseki taman ouijkayomej? Kemej neskayot, komo techtekipachoua keniuj tikintekipanoskej tochankauan, uelis senkis titakuaujtamatiskej ke Jiova techpaleuis (Heb. 13:5, 6). Yejuatsin kiajsikamati keniuj moajsij uan toni kinpoloua nochin itekitikauan tein amo kikauaj.

11. ¿Keniuj uelis kinpaleuis oksekin taltikpakneminij, takuaujtamatilis tein tikpialiaj Jiova? Xikonijto se neskayot.

¹¹ Maj tikitakan tein kipanok Victoria, akin nemi Liberia uan momachtijtok Biblia. Mochikaujtoya kichiuas ijkon kemej momachtijtoya uan kiixtalijkaya moauis. Sayoj ke takat akin iuan nemia kinkaujteuak yejua uan eyi ikoneuan. Maski amo kipiaya kali nion tekit, amo mosenkauak uan satepan moauij. Seki tonalmej satepan, iichpoch tein kipiaya 13 xiujmej kiajsik se tomineualoni tein kipiaya miak tomin. Yejuan nion kipoujkej kanachi katka porin amo kinekiaj maj kinouijmakani kikepaskej, yejua ika niman kitemojkej soldado akin iaxka katka. Keman kiajsikej, kiniluij ke komo nochin taltikpakneminij monejnemiltiskiaj melaujkej, kemej itaixpantijkauan Jiova, okachi kuali tinemiskiaj uan tikpiaskiaj yolseuilis. Ompa, Victoria kinextilij ika Biblia ke Jiova motenkaua tayektalis nikan taltikpak. Takat semi kimoujkaitaya maj amo mokuilianij tomin, yejua ika kikixtij seki tomin tein kikepilijkaj uan kimakak Victoria, tein ika kintasojkamatilij. Kemej tikitaj, tiitaixpantijkauan Jiova techixmatij ke nochipa timonejnemiltiaj timelaujkej porin senkis titakuaujtamatij ke Jiova techmakas nochi tein techpolos.

12. ¿Toni tiknextiaj keman tiksentokaj tiktekitiliaj Jiova maski kemansa tikpolouaj tein ika timoixpanoltiskej? Xikonijto se neskayot.

¹² No xikonnemili keniuj momachilij Thomas, se tanojnotskej tein ayamo moauiaya uan nemi Sierra Leona. Peuak tekiti kemej tamachtijkej, sayoj ke ajsitoyaya se xiuit amo kitaxtauiayaj, uan ueliskia kiselis nejon tomin hasta maj kipiani iamauan tein kitajtaniayaj ompa. ¿Toniok monekia kichiuas uan ijkon ueliskia kiselis taxtauil tein kitauikiliayaj? Monekia iuan tajtos akin taixyekanaya itech tamachtiloyan, akin katka se tiopixkat. Yejua kiiluij Thomas ke itech nejon tamachtiloyan amo kiseliayaj inintanemililuan itaixpantijkauan Jiova. Uan kiiluij ke komo kinekia kipias nejon tekit monekia kikauas itaneltokalis. Thomas kikauak nejon tekit maski amo kitaxtauijkej tein kitauikiliayaj. Satepan, kiajsik okse tekit kampa kinyekchijchiuaya radios uan teléfonos. Neskayomej kemej nejin kinextiaj ke komo titakuaujtamatij iuan Jiova, amo keman tikmouiliskej maj amo tikpiakan tein techpoloua, porin yejuatsin kichijchiuak nochi uan kinyekpia itekitikauan. Yejua ika amo timomoujtiaj kemej kinpanoua miakej itech nejin tonalmej.

13. ¿Keyej tokniuan okachi tanojnotsaj itech altepemej kampa tatasojti?

¹³ Itech miak uejueyi altepemej kampa tel tatasojti, itekitikauan Dios okachi tekititokej itech tanojnotsalis. ¿Keyej? Itech se sucursal tajkuilojkej: “Miakej taltikpakneminij tein kiseliaj se nemachtil ika Biblia amo kipiaj tekit, yejua ika okachi uelij momachtiaj. Tokniuan no ijkon uelij okachi tanojnotsaj. Taltikpakneminij tein moajsij itech nejin altepemej kampa tatasojti, okachi niman kiajsikamatij ke tinemij itamian tonalmej, porin ueli kiitaj itech nochi tein mochiujtok axkan”. Itech se ueyi altepet, sejse tanojnotskej kipia kemej eyi nemachtilmej ika Biblia oso okachi. Se misionero tein kiuika panoua 12 xiujmej ompa tekititok, kijkuiloua: “Miakej tanojnotsanij amo kipiaj miak taman itech ininnemilis nion okseki taman tein kintonalpololtia, yejua ika okachi uelij tanojnotsaj uan tamachtiaj ika Biblia”.

14. ¿Keniuj kinpaleuia Dios tel miakej taltikpakneminij?

¹⁴ Jiova motenkaua ke senoloch techpaleuis, techyekpias uan techmakixtis itech tonemilis uan amo kikauas maj moijtako tokuali uikalis iuan, uan tejuan titakuaujtamatij iuan (Sal. 37:28; 91:1-3). Tel miakej taltikpakneminij makisaskej keman ualas “ueyi tatsakuiltilis” (Apo. 7:9, 14). Yejua ika tikmatij ke nejon tel miakej taltikpakneminij amo ixpoliuiskej itamian nejin tonalmej, ta kipiaskej nochi tein kinpaleuis maj kixikokan ouijkayomej uan maj amo kijtakokan ininkuali uikalis iuan Dios. Itech itamiampa ueyi tatsakuiltilis, Jiova kinmakixtis itekitikauan.

“XINECHMACHTI JIOVA ITECH OJTI TEIN MOAXKA”

15, 16. ¿Keniuj techpaleuia maj tikchiuakan ijkon kemej techmachtia Jiova? Xikonijto se neskayot.

¹⁵ Komo tiknekij tiksentokaskej tikpiaskej yolchikaualis, moneki tikauaskej maj Jiova techmachti kemej kinextia inetataujtil David: “Xinechmachti Jiova, itech ojti tein moaxka, uan xinechixyekana itech ojti tein temachtia tein melauak, porin moajsij akin nechtauelitaj” (Sal. 27:11). Tikchiuaskej nejin, kijtosneki maj ika miak nejmachkayot tikakikan nochi tein techiluia inechikol Jiova uan maj niman tiktakamatikan. Kemej neskayot, miakej kichiuanij maj amo miak taman kipiakan itech ininnemilis, ijkon kemej techyolmajxitia Biblia. Yejuan kiixtaujkej tein tauikayaj uan kinamakakej tein amo monekia. Keman ualaj tatasojtilis, amo motekipachojkej porin monekia kiixtauaskej miak taman. Axkan amo tel tekitijok porin moneki kiixtauaskej tein amo yekmelauj tayekantok, uan okachi uelij tanojnotsaj. Yejua ika, tisejsemej moneki timotajtaniskej: “¿Niman nikchiua tein nimomachtia itech Biblia uan itech amaixmej tein techmaka takeual takuaujtamach uan tamatkej maski nejon yeski ouij?” (Mat. 24:45).

¹⁶ Komo tikauaj maj Jiova techmachti uan maj techojtokalti itech ojti tein melauak, amo onkas teisa maj techmoujti. Se precursor regular tein kayot Estados Unidos tajtanik se tekit tein kipaleuiskia yejua uan nochi ichankauan maj kisentokakan okachi kitekitilijtokan Jiova. Sayoj ke taixyekankej itech tekit kiiluij ke amo keman ueliskia kipias nejon tekit komo amo kipia se ueyi nemachtil kemej motajtani. Komo tejuatsin mitsonpanoskia nejon, ¿mitsonyolkokoskia porin amo tikonselij se ueyi nemachtil, ta okachi kuali peuak okachi tikontekitilia Dios? Ome semana satepan, nejin taixyekankej kikuilijkej nejon tekit uan yankuik taixyekankej kitajtanij tokniuj toni kiixtalijtoya kichiuas. Tokniuj kimelauilij ke yejua uan inamik katkaj itaixpantijkauan Jiova tein miak tonalmej kitekitiliayaj uan kinekiaj ijkon kisentokaskej. Achto ke tokniuj ueliskia kisentokaskia okachi kimelauilis, nejin taixyekankej kiiluij: “¡Ipa nikmatiaya ke taman motanemilil! Tepitsin achto ke nopopaj momikiliskia, ome taneltokanij kemej tejuatsin kikalpanouayaj mojmostaj uan kiixtajtoltiliayaj Biblia. Yejua ika, nimotenkauak ke komo ueliskia nikpaleuis se itaixpantijkauj Jiova, nikchiuaskia”. Mostika kualkan, tokniuj kimakakej tekit tein achto taixyekankej amo kinekik kimakas. Ika nejin moita ke ijkuak tiktayekanaltiaj iTekiuajyo Dios, yejuatsin techmaka nochi tein monekis itech tonemilis ijkon kemej motenkauak (Mat. 6:33).

MOTELNEKI TIKPIASKEJ TAKUAUJTAMATILIS UAN NECHIALIS

17. ¿Toni techpaleuis maj tikixnamikikan ika ueyi yolchikaualis tonalmej tein uitsejok?

¹⁷ David kinextij ke motelneki maj tikpiakan takuaujtamatilis uan nechialis, keman kijtoj: “¡Komo amo nitakuaujtamatiskia ke uelis nikitas nochi tein kuali tein Jiova kichiua itech tal kampa nemij tein yoltokej...!” (Sal. 27:13). Tepitsin xiontanemili itech nejin, ¿toni techpanoskia komo amo tikpiaskiaj nechialis tein Dios techmaka, uan komo amo tiktasojkamatiskiaj nochi tein kuali tein Dios kichiua, ijkon kemej kijtoua Salmo 27? Yejua ika, maj tiksentokakan tiktajtanikan Jiova ika ueyi takuaujtamatilis, maj techmaka yolchikaualis uan maj techmakixti itech Armagedón (xikonixtajtolti Salmo 27:14).

[Taixkopin itech página 23]

David moyolchikauak ijkuak kielnamikik keniuj Jiova kimakixtijka

[Taixkopin itech página 25]

¿Tikitaj ke ijkuak tatasojti tapaleuia maj okachi titanojnotsakan?