Maj tiktekitilikan Dios akin techmaka nemakixtilis

“Nestinemi ke melauj tikpiaj ne tetasojtalis de Dios, kuak no tiktakamatij ya in tanauatil [...]. Uan in tanauatilmej de Dios amo [...] ouij para se kintakamatinemis.” (1 JUAN 5:3)

¿TONI TIONTANANKILISKIA?

¿Toni kikui Satanás tein ika kineki kichiuas maj tiknemilikan ke itanauatiluan Dios amo techkauaj maj tikchiuakan tein tiknekiskej?

¿Keyej moneki kuali tikinixpejpenaskej totasojikniuan?

¿Toni techpaleuis maj amo keman tikauakan Dios tein temaka nemakixtilis?

1. Maski Jiova ueli kichiua nochi tein kineki, ¿keniuj kitekitiltia nejon, uan toni kinkauak maj kichiuakan Adán uan Eva?

JIOVA sayoj yejuatsin akin itech iluikak uan taltikpak ueli kichiua nochi tein kineki. Sayoj ke amo ininka mauiltia itekitikauan nion kiixtalia nochi tein kichiuaskej sejsemej. Ta yejuatsin kinkaua maj kiixpejpenakan tein kichiuaskej uan maj kipiakan tein kinejnekij. Kemej neskayot, Adán uan Eva sayoj kiniluij maj amo kikuanij itakilo “kouit tein kiixnextia taixmatilis ika tein kuali uan tein amo kuali” (Gén. 2:17). Ijkon, ueliskiaj kichiuaskej itanejnekilis ininTachijchiujkauj. Uan no, yolpakiskiaj ika netetayokolil tein kiselijkej.

2. ¿Keniuj yekinika taltikpakneminij mokalakijkej itech tajtakol?

² ¿Keyej kinkauak Jiova maj yekinika taltikpakneminij kichiuanij tein kinekiskiaj? Porin kinchijchiuak kemej yejuatsin tamati uan kinmakak se taman tein kinpaleuiskia maj kuali taixejekokan. Uan yejua ika kichiaya maj netasojtalis tein kipialiayaj kinyekanani itech se kuali ojti (Gén. 1:27; Rom. 2:15). Sayoj ke amo kitasojkamatkej nion kinextijkej ke kitasojtayaj tein Jiova kintayokolij, ta okachi kuali, kitajtolkakkej Satanás uan mokuilijkej tanauatil kiixpejpenaskej tein kuali uan tein amo kuali. Kinemilijkej ke ijkon okachi ueliskiaj kichiuaskej tein kinekiskiaj. Sayoj ke mokajkayaujkej, sayoj ininselti mokalakijkej itech tajtakol uan no kinkalakijkej ininkoneuan, uan tel amo kuali tein kiualkui tajtakol (Rom. 5:12).

3, 4. ¿Toni kineki Satanás maj tiknemilikan ika itanauatiluan Dios?

³ Amo tiomeyolouaj maj Satanás no ueli techkajkayaua, porin uelik kichiuak maj omen taltikpakneminij akin amo kipiayaj tajtakol, uan no tel miakej ángeles, kiixtopeuanij iueyitayekanalis Dios. Satanás nochipa kitemoua maj tiknemilikan ke itanauatiluan Dios semi amo tekauaj maj se kichiua tein se kineki, uan maj amo tiyolpakikan itech tonemilis (1 Juan 5:3). Uelis techijtakos komo peua timosentiliaj iniuan tein kipiaj nejin tanemililmej. Se tokniuj siuat akin kipia 24 xiujmej uan auilnemik, kijtoua: “Nikauak maj amo kuali tasojiknimej nechyekananij itech nonemilis. Uan amo nimoyolchikauaya nikiniluis ke amo nikchiuaskia tein nechiluiayaj”. ¿Melauj ke timiakej no tikmachilianij maj techchikaujkauikan totasojikniuan?

⁴ Tetayokoltij tikijtoskej, sayoj ke amo kuali tasojiknimej kemansa no uelis moajsiskej itech nechikol. Se telpoch akin kichiua kemej Cristo, kijtoua: “Sekin notasojikniuan iniuan mouikayaj akin amo katkaj itaixpantijkauan Jiova. Ijkon kemej panotiayaj tonalmej, nikitak ke okachi nitanemiliaya kemej yejuan, porin miak tonalmej iniuan nimosentiliaya. Amo chikauakok katka nokuali uikalis iuan Dios: amo nechyolpaktiayaok niyas nechikolmej uan amo semi niyayaok nitanojnotsati. Ika nochi nejin, nikajsikamatik ke monekia nikinpatas notasojikniuan. Uan ijkon nikchiuak”. Kemej tikitaj, totasojikniuan uelis techyekanaskej itech tonemilis. Maj tikitakan se neskayot itech Biblia tein ijkon kinextia (Rom. 15:4).

“KISENTOKAYA KINKAJKAYAUAYA TALTIKPAKNEMINIJ”

5, 6. 1) ¿Keniuj kinkajkayauak Absalón miakej israelitas? 2) ¿Kuali kisak tein kinemilij kichiuas?

⁵ Itech Biblia moajsij tajkuilolmej kampa ika tajtoua taltikpakneminij tein amo kuali tasojiknimej katkaj. Semej yejua Absalón, ikoneuj tekiuaj David. Kemej moijtoua, yejua katka se takat tel kuakualtsin. Sayoj ke, ijkon kemej Satanás, kikauak maj xijxikuiyot amo kiyektanemililtiani, uan peuak kinejneki tein amo iaxka katka: tekiuajyot tein ipopaj kipiaya.a Ika miak tamatilis, kitemouaya keniuj moaxkatilis tekiuajyot. Kinnextiliaya israelitas ke semi ininka motekipachouaya, uan no kinajsikamatiltiaya ke tekiuaj amo ininka motekipachouaya. Absalón no kitekitiltij takajkayaualis tein Satanás kikuik itech xochital tein moajsia Edén: kinextij ke yejua katka yolkuali uan kitakajkayauilij ipopaj ika tein tel amo kuali (2 Sam. 15:1-5).

⁶ ¿Kuali kisak tein kinemilij kichiuas? Uelis tikijtoskej ke kemaj, porin Biblia kijtoua ke “Absalón kisentokaya kinkajkayauaya taltikpakneminij tein pouiaj Israel” (2 Sam. 15:6). Sayoj ke iueyinekilis kichiuak maj tapolo uan mikik, uan tel miakej tein kinkajkayauak no mikkej (2 Sam. 18:7, 14-17).

7. ¿Toni techmachtia tein kichiuak Absalón? (Xikonita taixkopin itech página 19.)

⁷ ¿Keyej tel ijsiujka kinkajkayaujkej israelitas? Xa porin kinejnekiaj tein Absalón motenkauaya kinmakas, oso xa kimoujkaitayaj ineketsalis. Maski amo tikyekmatij keyej, se taman kemaj tikmatij: yejuan amo katkaj yolmelaujkej iuan Jiova nion iuan tekiuaj tein yejuatsin kiixtalij. Axkan, Satanás kisentoka kinkui taltikpakneminij tein tamatij kemej Absalón, uan ijkon kitemoua kinkajkayauas itekitikauan Jiova. Sekin kijtouaj: “Itanauatiluan Dios tel amo tekauaj maj se kichiua tein se kinekis”, oso: “¡Akin amo kitekitiliaj Jiova yekmelauj moyolpaktiaj!”. ¿Timelaujkej uan amo tikneltokaj nejin tanemililmej? ¿Tikajsikamatij ke sayoj takajkayaualis tein tel amo kuali? ¿Tikneltokaj ke “ne chipaktsin tanauatil” oso itanauatil Cristo, tein Jiova techmaka, sayoj yejua tein ueli techmakixtia? (Sant. 1:25.) Maj tiknextikan ke tiktasojkamatij nejin tanauatil uan maj nochipa kuali tiktekitiltikan nemakixtilis tein Dios techmakatok (xikonixtajtolti 1 Pedro 2:16).

8. ¿Toni tein kichiujkej sekin tokniuan kinextia ke amo se yolpaki komo amo se kitakamati Jiova?

⁸ Akin okachi kineki kinijtakos Satanás, yejuan telpochmej uan ichpochmej. Se tokniuj takat akin kiajxitijya 30 xiujmej kijtoua: “Keman katka nitelpoch niknemiliaya ke itanauatiluan Jiova, tein ika tajtoua chipaujkanemilis, amo nechpaleuiaya, ta amo nechkauaya maj nikchiua tein niknekia”. Nejon kiuikak maj auilnemi. ¿Okachi yolpakik ika tein kichiuak? Amo, ta yejua kijtoua: “Miak xiujmej amo kuali nimomachiliaya porin nikchiuak nejon tajtakol uan notanemilil nechkuejmolouaya”. Uan no, se tokniuj siuat kijtoua keniuj momachilia keman kielnamiki tein kichiuak ijkuak katka ichpoch: “Satepan ke niauilnemik niteltayokoyaya, uan nikmachiliaya ke amo teyi nichiujkej. Panokya 19 xiujmej, sayoj ke nejon tachiualis kisentoka nechkuejmoloua”. Uan okse tokniuj siuat techtapouia: “Semi amo kuali nimomachilij keman nikajsikamatik ke ika tein nikchiuak semi nikinyolkokoj akin nikintasojta, uan ke nikijtakoj nokuali uikalis iuan Dios. Tel amo kuali se momachilia keman amo se kipia itatiochiualis Jiova”. Telpochmej uan ichpochmej, amo xikauakan maj Satanás namechkajkayaua; achto xiknemilikan toni namechualkuilis tein nankichiuaskej.

9. 1) ¿Toni moneki timotajtaniskej ika Jiova uan itanauatiluan? 2) ¿Keyej motelneki maj kuali tikixmatikan Dios?

⁹ Semi tetayokoltij maj tel miakej telpochmej uan ichpochmej tein kichiuaj kemej Cristo, uan sekin tein uejueykej, momachtianij ika tajyouilis, ke se kichiuas tein amo kuali semi tetajyouiltia (Gál. 6:7, 8). Tisejsemej moneki timotajtaniskej: “¿Ueli nikita katiyejua takajkayaualis kitekitiltia Satanás tein ika kineki nechijtakos? ¿Nikita Jiova kemej akin okachi kuali notasojikniuj, uan nitakuaujtamati ke nochipa kijtoua tein melauak uan sayoj kineki maj kuali niyeto? ¿Nikyekmati ke yejuatsin amo keman nechtsakuiltilis teisa tein uelis nechpaleuis uan tein nechyolpaktis?” (xikonixtajtolti Isaías 48:17, 18). Komo tiknekij titanankiliskej ke kemaj, moneki maj kuali tikixmatikan Jiova uan maj tikajsikamatikan ke yejuatsin kiixtalij tanauatilmej porin techtasojta, amo porin kineki maj amo ueli tikchiuakan tein tiknekiskej (Sal. 25:14).

MAJ TIKTAJTANIKAN JIOVA MAJ TECHMAKA SE TOYOLO TAMATKEJ UAN TATAKAMATKEJ

10. ¿Keyej moneki timochikauaskej tiktojtokaskej neskayot tein kikauak Salomón keman katka telpoch?

¹⁰ Keman Salomón katka telpochok, ika yolyemanilis kitataujtij Dios: “Nejua semi nikonetok. Amo nikmati keniuj nikisas nion keniuj nikalakis”. Satepan kitajtanij maj kimaka se iyolo tamatkej uan tatakamatkej (1 Rey. 3:7-9, 12). Jiova kinankilij inetataujtil tein kichiuak ika nochi iyolo. Uan no ijkon kichiuas touan maski tein yeski xiuit tikpiaskej. Sayoj ke, amo techmakas taixmatilis uan tamatilis ika se mouiskatekit. Yejuatsin techmakas tamatilis komo timomachtiaj Biblia ika nejmachkayot, tiktajtaniaj maj techmaka iyektikatsin espíritu uan komo kuali tiktekitiltiaj tamachtilis tein techmakaj itech nechikol (Sant. 1:5). Maj tikelnamikikan ke ika nejon, Jiova kinpaleuia itekitikauan telpochmej uan ichpochmej maj kipiakan okachi tamatilis ke akin amo kitakamatij tein techyolmajxitia, uan no ompa pouij “in taixmatini” itech taltikpak (Luc. 10:21; xikonixtajtolti Salmo 119:98-100).

11-13. 1) ¿Toni tamachtilis tein techtelpaleuia tikajsij itech Salmo 26:4, Proverbios 13:20 uan 1 Corintios 15:33? 2) ¿Keniuj uelis tiktekitiltiskej itech tonemilis nejin tamachtilis tein kitemaka Biblia?

¹¹ Kemej tikitaj, motelneki timomachtiskej Biblia uan tiknemiliskej keniuj techpaleuia tein tikixtajtoltiaj uan ijkon kuali tikixmatiskej Jiova. Kemej neskayot, maj tikitakan seki tajkuilolmej tein kipiaj tamachtilis tein motelneki uan techmachtia keniuj tikinixpejpenaskej totasojikniuan. Salmo 26:4 kijtoua: “Amo nimotalia iniuan akin takajkayauaj; nion nimosentilia iniuan tein kitatiaj kemej yekmelauj monejnemiltiaj”. Itech Proverbios 13:20 tikixtajtoltiaj nejin: “Akin nentinemi iniuan tein tamatinij mochiuas tamatkej, sayoj ke akin mouika iniuan akin amo kuali monejnemiltiaj kipias ouijkayot”. Uan 1 Corintios 15:33, itech Traducción del Nuevo Mundo de las Santas Escrituras, kiyekijtoua: “Amo ximokajkayauakan. Amo kuali tasojiknimej kiuejuelouaj kuali tachiualismej”.

¹² Nejin tajkuilolmej techmachtiaj miak taman tein techpaleuia. Yekinika, Jiova kineki maj kuali tikinixpejpenakan totasojikniuan porin kineki techpaleuis maj amo teyi techijtako nion maj tikpolokan tokuali uikalis iuan. Uan ojpatika, amo ueli tiktsakuiliaj maj totasojikniuan techyekanakan maj tikchiuakan tein kuali oso tein amo kuali. Okse taman, ijkon kemej nejin tajtolmej ijkuiliujtokej, kinextia ke Jiova kineki techolinis maj tikchiuakan teisa ika nochi toyolo. ¿Keniuj? Tikitaj ke nejin amo tanauatilmej tein techiluiaj “Amo xikchiua nejin oso nejon”, ta sayoj kiyekijtoua tamachtilis tein melauak. Kemej yeskia Jiova techiluiskia: “Yejua nejin tein panos. Uan axkan ¿toni tikchiuati? ¿Toni tiknemilia?”.

¹³ Uan no, kemej nejin tajtolmej ijkuiliujtokej kemej se tamachtilis tein melauak, tapaleuiaj keman yeski uan itech miak taman tachiualismej. Kemej neskayot, maj timotajtanikan: “¿Toni uelis nechpaleuis uan ijkon amo nimouikas iniuan ‘tein kitatiaj kemej yekmelauj monejnemiltiaj’? ¿Toni tachiualismej uelis nechuikas maj iniuan nimosentili? (Pro. 3:32; 6:12.) ¿Akonimej ‘tamatinij’ tein Jiova kijtoua ke uelis mochiuaskej notasojikniuan, uan akonimej akin ‘amo kuali monejnemiltiaj’? (Sal. 111:10; 112:1; Pro. 1:7.) ¿Katiyejua ‘kuali tachiualismej’ uelis nikpolos komo nimosentilia iniuan akin amo kuali tasojiknimej? ¿Sayoj taltikpakneminij tein amo momachtiaj iTajtol Dios, akin amo kuali tasojiknimej? (2 Ped. 2:1-3.)”. Techtelpaleuis komo titanemiliaj itech tanankililmej.

14. ¿Toni okse taman uelis timomachtiskej itech Youak keman tiTaueyichiuaj kemej Kalyetouanij?

¹⁴ Ijkon kemej tiontanemilij itech tanankililmej, no ijkon uelis tiontanemilis ika okseki tajkuilolmej tein kinextiaj toni kinemilia Jiova ika tachiualismej tein techyolnotsaj tejuan uan tochankauan.b Nejin se taman tein tetatmej uelis kiitaskej itech Youak keman Taueyichiuaj kemej Kalyetouanij. Keman kichiuaskej nejin, maj kielnamikikan ke moneki kinpaleuiskej sejsemej ininchankauan maj kiajsikamatikan ke itanauatiluan uan itamachtilisuan Dios kinextiaj netasojtalis tein techpialia (Sal. 119:72). Ijkon, nochin kalyetouanij okachi kuali mouikaskej uan okachi motokiskej iuan Jiova.

15. ¿Keniuj uelis tikmatiskej ox toyolo mochiujtok tamatkej uan tatakamatkej?

¹⁵ ¿Keniuj uelis tikmatiskej ox toyolo mochiujtok tamatkej uan tatakamatkej? Se taman tein techpaleuis, komo tikitaj ox no ijkon titanemiliaj kemej itekitikauan Dios tein nenkej ne uejkauj uan amo keman kikaujkej. Kemej neskayot, tekiuaj David kijkuiloj: “Nikchiuas motanejnekilis, noDios, nechtelyolpaktia, uan motanauatil moajsi noyolijtik” (Sal. 40:8). Uan akin kijkuiloj Salmo 119 kijtoj: “¡Nikteltasojta motanauatil, kemaj! Nochi tonal sayoj ika nitanemilijtinemi” (Sal. 119:97). Se netasojtalis kemej nejin, amo iselti moskaltia, ta moneki se motelmachtis uan itech se tanemilis, uan no moneki se kichiuas netataujtil. No uelis moskaltis netasojtalis, komo tikitaj tatiochiualismej tein tikseliaj keman tiktakamatij itanauatiluan Dios (Sal. 34:8).

MAJ TIMOCHIKAUAKAN TIKSENTOKASKEJ ITECH NEMAKIXTILIS TEIN DIOS TECHMAKA

16. ¿Toni moneki tikelnamikiskej komo tiknekij tiksentokaskej itech nemakixtilis tein Dios techmaka?

¹⁶ Itech tonalmej tein panouanij, taltikpakneminij itech miak altepemej moixnamikinij iniuan oksekin porin kinekij nemakixtilis. ¡Okachiok tejuan moneki titaixnamikiskej, uan ijkon amo tikpoloskej nemakixtilis tein Dios techmaka! Maj tikelnamikikan ke amo sayoj iuan timoixnamikij Satanás, taltikpakneminij uan itanemilil tein teijtakoua, ta no tikixnamikij tajtakol tein tikpiaj uan toyolo tein semi tekajkayaua (Jer. 17:9; Efe. 2:3). Sayoj ke, ika inepaleuil Jiova uelis titataniskej. Uan nochipa ke tikchiuaskej tein kuali, yeski ueyi oso tsikitsin, tikseliskej ome taman tatiochiualismej. Yekinika, tikyolpaktiskej Jiova (Pro. 27:11). Uan ojpatika, keman tikitaskej ke techualkuilia tein kuali keman tiktakamatij “chipaktsin Tajtoltsin de Dios [tein] kuali techtojtontinemi”, okachi tikixtaliskej tiksentokaskej itech ojti tein techuika itech nemilis nochipaya. Uan ika tamis, tiyolpakiskej ika okachi ueyi nemakixtilis: tein Jiova kinpialia itekitikauan akin amo kikauaj (Sant. 1:25; Mat. 7:13, 14).

17. ¿Keyej moneki maj amo timosenkauakan komo timopolouaj, uan toni nepaleuil techmaka Jiova?

¹⁷ Sayoj ke kemansa, tinochin timopolouaj (Ecl. 7:20). Keman techpanos nejon, maj amo timosenkauakan nion maj tiknemilikan ke amo teyi tichiuanimej. Okachi kuali maj tikchiuakan tein techpaleuis maj tikmelauakan nejon nepolol, maski monekis tikintajtaniskej ininnepaleuil tayekananij. Santiago kiyekijtoj: “Kuak aksa kitatatautilia Dios ika ne yek takuautamatilis, ijkuakon ne kokoxke nenkentis uan kiajokuis [...]. Uan takan ne kokoxke motajtakolmakak tech niyalis, ijkuakon Yejuatsin kitapojpoluis” (Sant. 5:15). Maj amo keman tikelkauakan ke Jiova semi teiknelia, uan yejuatsin kinekik maj tiyetokan itech inechikol porin kiitak teisa tein kuali itech toyolo (xikonixtajtolti Salmo 103:8, 9). Yejua ika, komo timochikauaj ika nochi toyolo amo keman tikauaskej Dios, yejuatsin amo keman techkauas (1 Cró. 28:9).

18. Ika tein Jesús tajtanik itech netataujtil tein moajsi itech Juan 17:15, ¿toni moneki tikchiuaskej uan ijkon Jiova techyekpias?

¹⁸ Se youak achto ke Jesús momikiliskia, kichiuilij Jiova nejin netataujtil tein amo se kielkaua kampa kitajtanij maj kinpaleuiani majtaktiose itatitaniluan tein amo kikauayaj: “Nimitsontatautilia de ke xikinyekpixtinemi nomomachtijkauan para ke in amokuali Satanás ma amo kinkajkayaua” (Juan 17:15). Axkan, Cristo no ijkon ininka motekipachoua nochin imomachtijkauan. Yejua ika, uelis senkis titakuaujtamatiskej ke Dios kinankilis inetataujtil Jesús uan techyekpias itech nejin tonalmej tein semi ouijkej. Biblia kiyekijtoua: “Se inintapaleuijkauj akin melaujkanemij uan [...] kinpaleuis akin amo kikauaj” (Pro. 2:7, 8). Semi melauak ke techouijmaka timelaujkanemiskej, sayoj ke amo onkak okse ojti tein uelis techuikas itech nemilis nochipaya uan techmakas yekmelauj nemakixtilis (Rom. 8:21). ¡Maj amo akin techuika itech okse ojti!

[Tajtolmelaualismej]

[Taixkopimej itech página 19]

¿Akonimej axkan tamatij kemej Absalón, uan keniuj uelis tikinixnamikiskej?