Moisés se takat akin kinextij netasojtalis

¿TONI NETASOJTALIS?

Se taman tein tel chikauak tein se kipialia aksa. Akin tetasojta kinextia ika tein kijtoua uan ika tein kichiua, maski kemansa monekis kikauas itanejnekilis.

¿KENIUJ KINEXTIJ NETASOJTALIS MOISÉS?

Yejua kinextij ke kitasojtaya Dios. ¿Keniuj? Ijkuak nochipa kitakamatik. Biblia kijtoua itech 1 Juan 5:3: “Nestinemi ke melau tikpiaj ne tetasojtalis de Dios, kuak no tiktakamatij ya in tanauatil ten Dios technauatilia ma tikchiutinemikan”. Tein yeski tein Dios kitajtaniaya maj kichiua, Moisés nochipa kichiuaya ijkon kemej kiiluiaya, kemej yas iixpan ueyi taixnamikkej Faraón akin moajsia Egipto oso momamelauas ika ikouj itech ueyiat Chichiltik (Éxodo 40:16).

Moisés no kinextij ke kintasojtaya israelitas. Yejuan kimatiaj ke Jiova kiixtalijtoya Moisés maj kinixyekana, yejua ika kiixpantiliayaj ininkuejmoluan. Biblia kijtoua ke “xolal mokauak iixpan Moisés kualkan hasta tiotak” (Éxodo 18:13-16). Yejua xa tel siouia keman monekia kinkakis nochi tonal. Sayoj ke kichiuaya ika miak pakilis porin kintasojtaya.

Moisés amo sayoj kinkakia ta no kitataujtiaya Dios maj kinpaleuiani. Uan no ijkon kichiuaya iniuan akin kichiuiliayaj tein amo kuali. Kemej neskayot, keman iikniuj akin motokaytiaya Míriam kijijtoj Moisés, Jiova kitatsakuiltij keman kichiuak maj palani inakayo. Moisés amo yolpakik, ta niman kitataujtij Dios: “¡NoDios, nimitstataujtia! ¡Xikpajti, nimitstataujtia!” (Números 12:13). ¿Melauj ke kinextij netasojtalis ijkuak kichiuak nejon netataujtil ika nochi iyolo?

¿TONI TECHMACHTIA NESKAYOT TEIN KIKAUAK?

Moneki tikpialiskej ueyi netasojtalis Dios, se netasojtalis tein techolinis maj tiktakamatikan itanauatiluan ‘ika nochi totalnamikilis’ oso ika nochi toyolo (Romanos 6:17). Keman ijkon tiktakamatij semi tikyolpaktiaj (Proverbios 27:11). Keman tiktekitiliaj Dios porin tiktasojtaj no techpaleuia tejuan, ta komo tikchiuaj tein kineki techualkuilia yolpakilis (Salmo 100:2).

No moneki tikinpialiskej oksekin se netasojtalis tein techolinis maj tikinpaleuikan. Keman se akin iuan kuali timouikaj oso tochankauj techtapouia ikuejmoluan, nejon netasojtalis techolinis maj 1) kuali tikakikan, 2) maj se kiajsikamati tein kimachilia uan 3) maj tiknextikan ke techtekipachoua tein kipanoua.

Ijkon kemej Moisés, uelis tiktataujtiskej Dios maj kinpaleui akin tikintasojtaj. Kemansa amo tikmatiskej keniuj tikinpaleuiskej uan xa sayoj tikiniluiskej: “Xinechtapojpolui, amo ueli nimitspaleuia, sayoj ke uelis niktataujtis Dios maj mitspaleui”. Sayoj ke xikonelnamiki ke “se tagat ten yolkuali, yejua ne kuali ueli kichiuas miak ika por ne nitatatautilis iuan Dios” (Santiago 5:16). Tonetataujtiluan uelis kiolinis Jiova maj kichiua se taman tein ika kipaleuis taltikpaknenkej tein xa amo ijkon kinemiliaya kichiuas. ¿Melauj ke ika tonetataujtil uelis okachi tikinpaleuiskej akin tikintasojtaj?a

¿Melauj ke Moisés techmachtia miak taman? Maski katka tajtakojkej kemej tejuan, tel kuali neskayot techkauilij keman kinextij takuaujtamatilis, yolyemanilis uan netasojtalis. Maj timochikauakan no ijkon tikchiuaskej kemej Moisés, uan tikseliskej uejueyi tatiochiualismej tejuan uan no akin touan moajsij (Romanos 15:4).