Moisés se takat akin katka yolyemanik
¿TONI YOLYEMANILIS?
Akin yolyemanik amo moueyichiua oso moueyineki. Amo kimachilia ke okachi ueyi ke oksekin. No ijkon, amo kielkaua ke kipia tajtakol uan ke amo nochi ueli kichiua.
¿KENIUJ KINEXTIJ YOLYEMANILIS MOISÉS?
Yejua amo keman moueyichiuak keman kipiaya taixyekanalis. Keman se takat kimakaj tepitsin tanauatil, niman kinextia ox yolyemanik oso amo. Robert G. Ingersoll, se tajkuilojkej itech siglo diecinueve, kijtoj nejin: “Komo tikneki tikmatis keniuj yekmelauj tamati aksa, xikmaka taixyekanalis”. Itech nejon, Moisés kikauak se kuali neskayot porin katka yolyemanik.
Jiova kimakak ueyi tanauatil, ta kiixtalij maj kiixyekanani xolal Israel. Sayoj ke Moisés amo keman moueyinekik. Kemej neskayot, maj tikitakan keniuj kinextij yolyemanilis keman monekik moixejekos akoni kinamikia kiselis se tal (Números 27:1-11). Nejon motelnekia, porin tein moixejekoskia mochiuas, kinextiskia toni mochiuaskia komo satepan onkaskia nejon ouijkayot.
¿Toni kichiuak Moisés? ¿Kinemilij ke kemej yejua kiixyekanaya xolal Israel, kimatia toni monekia mochiuas? ¿Takuaujtamatik itech itamatilis? ¿Kinemilij ke kitelmatiaya porin xiuejya katka oso ke kuali kimatia keniuj tanemilia Jiova?
Se takat akin moueyichiua kemaj kichiuaskia, sayoj ke Moisés amo. Biblia techiluia ke Moisés “kiixpantilij Jiova tein tajtaniaj ichpochmej” (Números 27:5). ¡Xikonnemili! Maski kiuikayaya 40 xiujmej kemej taixyekankej ompa Israel, kisentokaya takuaujtamatia iuan Jiova uan amo itech itanemilil. ¡Tel kuali neskayot techkauilij ika yolyemanilis!
Moisés amo kinemiliaya ke sayoj yejua monekia kipias tanauatil. Keman Jiova kikauak maj oksekin israelitas no yeskiaj tanauatianij amo kualanik, ta nejon kiyolpaktij (Números 11:24-29). Keman imontat kiyolmajxitij maj kinkauiliani tepitsin tekit oksekin, yejua kiselij itayolmajxitilis ika yolpakilis (Éxodo 18:13-24). Uan keman xiuejya katka, maski chikauakok katka, kitajtanij Jiova maj kiixtaliani akin kiixpataskia. Jiova kiixpejpenak Josué uan Moisés kipaleuij ika nochi iyolo. Uan no, kinyolchikauak israelitas maj kitakamatinij telpoch akin kinixyekanaskia uan kinajxitiskia itech Tal tein Dios motenkaujka kinmakas (Números 27:15-18; Deuteronomio 31:3-6; 34:7). Tikyekmatij ke Moisés kiitak kemej se ueyi tatiochiualis maj kinixyekanani israelitas keman kiueyichiuayaj Dios. Sayoj ke yejua amo kiitaya ke okachi monekia kipias taixyekanalis, ta kinekia maj kuali yetonij israelitas.
¿TONI TECHMACHTIA NESKAYOT TEIN KIKAUAK?
Maj amo tikauakan maj taixyekanalis oso tamatilis tein tikpiaskej techuika maj timoueyichiuakan. Jiova okachi kiita iyolyemanilis se itekitikauj uan amo itamatilis (1 Samuel 15:17). Komo yekmelauj tiyolyemankej tikchiuaskej tein techyolmajxitia Biblia: “Xitakuaujtamati iuan Jiova ika nochi moyolo, uan amo ximopaleui itech moajsikamatilis” (Proverbios 3:5, 6).
Neskayot tein kikauak Moisés no techmachtia maj amo timoueyinekikan porin tikpiaj tanauatil.
¿Techtelpaleuia komo no tiknextiaj yolyemanilis kemej Moisés? Kemaj. Ijkuak tiknextiaj ke yekmelauj tiyolyemankej, okachi amo kipiaj ouijkayomej akin touan moajsiskej uan tapaleuia maj techtasojtakan. Sayoj ke tein okachi kuali, kichiua maj techtasojta Jiova akin nochipa kinextia nejon (Salmo 18:35). “Dios kinixnamiki nekes ten moueyimatinemij. Uan Dios kinpaleuijtinemis ika ne iteiknelilis nekes ten moyolyemankamatinemij.” (1 Pedro 5:5.) Yejua nejon tein moneki techolinis maj tiknextikan yolyemanilis kemej Moisés.