¿Keyej sekin kijtouaj ke Dios semi amo teiknelia?

SEKIN kinemiliaj ke Dios amo uelis yeski ijkon. Sayoj ke okachi miakej motajtaniaj nejon oso kijtouanij ke Dios yekmelauj semi amo teiknelia.

Sekin akin momakixtiaj keman panoua tetsaujmej, motajtaniaj: “¿Keyej kikaua Dios maj pano nejon? ¿Amo kitekipachoua tein tikpanouaj? ¿Semi amo teiknelia?”.

Oksekin kinkuejmoloua keman kiixtajtoltiaj seki taman itech Biblia, kemej kampa ika tajtoua Tetsaujkakiouit itech itonaluan Noé. Motajtaniaj: “¿Keniuj se Dios akin tetasojta ueliskia kinmiktis tel miakej taltikpakneminij? ¿Xe porin semi amo teiknelia?”.

¿Kemansa no tionmotajtaniani nejon? ¿Tikonmachilia ke amo ueli tikonnankilia akin kichiuaj nejon netajtanil? Tein yeski taman tein tikonpanotos, mitsonpaleuis komo tikonita nejin.

¿KEYEJ TECHKUALANTIA MAJ AKSA AMO TEIKNELI?

Uelis tikijtoskej ke porin tejuan amo ijkon kemej tapialmej. Tejuan tikmatij keman teisa kuali yetok oso amo, porin Dios techchijchiuak “kemej yejuatsin tamati” (Génesis 1:27). Nejon kijtosneki ke ijkon kemej yejuatsin, ueli tikmatij keman teisa kuali yetok oso amo, maj no ueli tikpiakan tein yejuatsin kinextia uan maj timonejnemiltikan kemej kijtoua itanauatiluan. Komo tejuan techkualantia keman aksa amo teiknelia, ¿amo kinextia nejon ke Dios okachi kikualantia?

Nejin tanemilil moyekita ke mouika ika tein kijtoua Biblia. Dios kiyekijtoua: “Porin ijkon kemej iluikak okachi uejkapan ke taltikpak, ijkon noojuan okachi uejkapan ke nanmoojuan, uan notanemililuan ke nanmotanemililuan” (Isaías 55:9). Komo tikijtoskiaj ke Dios semi amo teiknelia, tikijtojtoskiaj ke nejin tajtolmej amo melauak, porin tiknextiskiaj ke tiknemiliaj ke toojuan okachi uejkapan ke iojuan. Sayoj ke achto ke tiknemiliskej nejon, moneki maj tikmatikan okachi. Xa kuali yeskia maj timotajtanikan, amo keyej Dios semi amo teiknelia, ta keyej seki taman tein kichiua uelis moitas ke semi amo teiknelia. Yekinika maj tikitakan toni kijtosneki maj amo se teikneli.

Keman tikijtouaj ke aksa semi amo teiknelia tikteajsikamatiltiaj ke amo kuali tein kiuika maj ijkon kichiua. Aksa akin semi amo teiknelia yolpaki oso amo teyi kimachilia keman kinita ke oksekin tajyouiaj. Kemej neskayot, komo se tepopaj kimelaua ikonetsin porin kineki kiyolkokos, kinextia ke semi amo teiknelia. Sayoj ke, komo kichiua porin kineki kimachtis uan kiyekpias, kinextia ke yolkuali. Tein kiolinia aksa maj kichiua se taman, uelis ijsiujka tikijtoskej ke amo kuali, kemej tejuatsin xa tikonitani komo ijkon mitsonpanouani.

Maj okachi tikitakan ome taman tein moijtoj yekinika, tein kichiua maj sekin kinemilikan ke Dios semi amo teiknelia: tetsaujmej uan tatsakuiltilis tein Biblia kijtoua ke Dios kinualkuilij taltikpakneminij. ¿Kinextia nejon ke Dios yekmelauj semi amo teiknelia?