NETAJTANILMEJ TEIN KISAJ ITECH BIBLIA

¿Keyej semi ouij maj tami neteuilis noyampa taltikpak?

Biblia kijtoua ke moajsi ome taman keyej. Yekinika, maski taltikpakneminij uelinij kichiuanij miak taman tein tapaleuia, Dios amo techchijchiuak maj tiuelikan timoyekanakan toselti. Ojpatika, porin “nochi in taltikpakuani kinyekana ok yejua in amokuali Satanás”. Yejua ika, amo uelij kitamiaj neteuilis. (Xikonixtajtolti Jeremías 10:23 uan 1 Juan 5:19.)

Uan amo no ueli tami neteuilis porin miakej sayoj kitemouaj inintanejnekilis uan kitelnekij kipiaskej taixyekanalis. Sayoj se tekiuajyot tein taixyekana noyampa taltikpak tein kinmachtia taltikpakneminij maj kitasojtakan tein kuali uan maj tetasojtakan, uelis kiualkuis yolseuilis semanauak taltikpak. (Xikonixtajtolti Isaías 32:17 uan 48:18, 22.)

¿Akoni kiualkuis yolseuilis nikan taltikpak?

Dios akin nochi ueli kichiua, motenkaua kinijkuanis tekiuajyomej tein moajsij nikan taltikpak, uan kichiuas maj sayoj se tekiuajyot kinixyekana nochin taltikpakneminij (Daniel 2:44). Taixyekanas, Jesús, iKonetsin Dios. Biblia kitokaytia “Tayekankej tein kiualkui Yolseuilis”. Yejua kitamis nochi tein amo kuali uan kinmachtis taltikpakneminij keniuj kipiaskej yolseuilis. (Xikonixtajtolti Isaías 9:6, 7 uan 11:4, 9.)

Axkan, ika itaixyekanalis Jesús, tel miakejya noyampa taltikpak kinmachtijtokej taltikpakneminij ika Biblia keniuj yolseujkanemiskej iniuan oksekin. Amo uejkaua, yekmelauj onkas yolseuilis noyampa taltikpak. (Xikonixtajtolti Isaías 2:3, 4 uan 54:13.)