Maj tikchiuakan kemej motataujtij Jesús ika netasojtalis

1, 2. Satepan ke kichiujkej Pascua itech xiuit 33, ¿toni kichiuak Jesús iniuan itatitaniluan akin amo kikaujkej?

KATKA youakya itech tapoual 14 metsti nisán xiuit 33. Jesús uan imomachtijkauan yekin kitamichiujkaj Pascua, tein kinelnamiktiaya ijkuak kinmakixtijkej ininuejkaujtatuan ompa Egipto kampa kinteltekitiltiayaj. Sayoj ke imomachtijkauan Jesús akin amo kikauayaj kipiaskiaj se nemakixtilis tein okachi ueyi, se “nemakixtilis para sen nachipa”. Mostika, ininTayekankauj kimiktiskiaj akin kitauelitayaj. Sayoj ke nejon tein tel amo kuali mochiuaskia se tatiochiualis: iesyo chipauak tein kitoyauaskia Jesús kinajchiuiliskia taltikpakneminij tajtakol uan mikilis (Heb. 9:12-14).

² Jesús kinekia maj tinochin tiitatojtokakauan amo tikelkauakan nejon ueyi netasojtalis tein monextia, yejua ika kipeualtij se taman tein kiixpataskia Pascua uan mochiuaskia xijxiujtika. Kikojkotonak se pan tein amo kipiaya tein ika kixokoltiskiaj, kinmajmakak 11 itatitaniluan akin amo kikauayaj uan kiniluij: “Nejin kijtosneki nonakayo tein namoka niktemakati. Xiksentokakan xikchiujtokan nejin uan ika xinechelnamikikan”. No kinmakak se copa ika vino chichiltik uan kiniluij: “Nejin copa kijtosneki yankuik netenkaualis ika noesyo, tein namoka toyauiti” (Luc. 22:19, 20, TNM).

3. 1) ¿Toni motelpatak satepan ke momikilij Jesús? 2) ¿Toni netajtanilmej moneki timochiuiliskej ika netataujtil tein moajsi itech Juan capítulo 17?

³ Amo uejkaua tamiskia netenkaualis ika Tanauatil tein kichiuak Dios iuan xolal Israel. Uan moixpataskia ika se yankuik netenkaualis tein kichiuaskia Jiova iuan itatojtokakauan Jesús akin taixpejpenalmej. Jesús amo kinekia maj yankuik xolal tein iaxka Dios mochiua kemej uejkauj xolal Israel. Israelitas xexeliujtoyaj uan amo kisenueyichiuaj Dios, uan nejon kichiuaya maj amo kuali ika tajtouanij itokay tein chipauak (Juan 7:45-49; Hech. 23:6-9). Jesús kinekia maj itatojtokakauan amo xexeliujtokan uan ijkon itokay Dios moueyipanchiuas. Yejua ika kichiuak se netataujtil tein okachi kualtsin tein se taltikpaknenkej uelis kipias tatiochiualis kiixtajtoltis (Juan 17:1-26; xikonita taixkopin ipeujyan tamachtilis). Ijkon kemej tikitstiyaskej netataujtil, maj timotajtanikan: “¿Kinankilij Dios netataujtil tein kichiuak iKonetsin? ¿Nikchiujtok kemej motataujtij Jesús?”.

TONI KIITAK JESÚS KE OKACHI MONEKIA

4, 5. 1) ¿Toni techmachtia ijkuak tikitaj tein achto tajtanik Jesús itech inetataujtil? 2) ¿Keniuj Jiova kinankilij Jesús keman tajtanik tein kinejnekia?

⁴ Jesús kinmatiltij imomachtijkauan miak taman tamachtilis tein kitemaka Dios hasta keman tel youakya katka. Ompa, ajko tachiak iluikak uan motataujtij: “Notajtsin [...], ejkok ya in tonal [...,] xinechonueyipanchiua [...] para ke Nejuatsin nimokonetsin [...] ma no nimitsonueyipanchiuas [...]. Porin [...] tinechonmaktilij ya tanauatil [...] inpan nochi in taltikpaknemini. Uan [...] para ma Nejuatsin nikinmaka ne nemilis nachipa nochi naken [...] tinechonmaktilij ya ma pouikan nouantsin. [...] Uan [...] nimitsonueyipanchiutinemik ya nikan taltikpak. Uan [...] niktamichiuak ya in tekit ten [...] tinechonmaktilij ya ma nikchiuani. Uan axkan Notajtsin Dios xinechonueyipanchiua moixpantsinko [...] ika ne mochikaukauelilis ten ipa nikpiaya ya [...] ne achtopa ya ke tsineuaskia in taltikpak” (Juan 17:1-5).

⁵ ¿Tikonitak toni achto tajtanik Jesús itech netataujtil? Okachi kinekia maj moueyipanchiua iTajtsin kemej kinamiki. No yejua nejon tein yekinika tajtanik keman tamachtij keniuj se kichiuas netataujtil: “ToTajtsin, maj moueyitali motokay. Maj uiki motekiuajyo” (Luc. 11:2, TNM). Satepan Jesús kinemilij tein kinpolouaya imomachtijkauan; kinekia kinmakas “nemilis nachipa”. Ompa, kitajtanij iTajtsin tein yejua kinekia: “Xinechonueyipanchiua moixpantsinko [...] ika ne mochikaukauelilis ten ipa nikpiaya ya ne moixpantsinko ne achtopa ya ke tsineuaskia in taltikpak”. ¿Keniuj kinankilij Jiova? Kimakak iKonetsin tatakamatkej okachi ueyi taman ke tein kitajtanijka: kimaktilij “kachi ueyi itokaytsin [...] ke ne tokay ten kiselijke in ángeles” (Heb. 1:4).

MAJ TIKIXMATIKAN DIOS AKIN SAYOJ YEJUA MELAUAK

6. ¿Toni monekia kichiuaskej tatitanilmej uan ijkon kipiaskiaj nemilis nochipaya, uan keniuj tikmatij ke ijkon kichiujkej?

⁶ Itech inetataujtil Jesús, no kijtoj toni moneki tikchiuaskej tejuan akin titajtakouanij uan ijkon tikseliskej nemilis nochipaya kemej se netetayokolil tein amo technamiki (xikonixtajtolti Juan 17:3). Kijtoj ke moneki tiksentokaskej ‘tikixmatiskej’ Dios uan Cristo. ¿Keniuj? Yekinika, moneki tikseliskej tamachtilis nochi tein tiueliskej uan ijkon tikinixmatiskej Jiova uan Jesús. Uan ojpatika, moneki tikchiuaskej tein timomachtiaj. Tatitanilmej kichiujtoyajya nejon, yejua ika Jesús kiiluij iTajtsin: “Nikinnextilij ya [...] nochi motajtoltsitsin ten tinechonmaktilij ya, uan yejuan melau kinselijke” (Juan 17:8). Sayoj ke komo kinekiaj kiseliskej nemilis nochipaya, nejon takamej tatakamatinij monekia kisentokaskej tanemiliskej itech itajtoluan uan itayolmajxitilis Dios uan mojmostaj monekia kitakamatiskej hasta keman tamiskia ininnemilis nikan taltikpak. Uan tikmatij ke ijkon kichiujkej porin inintokay ijkuiliujtok nochipaya itech majtaktiomome tet tein ika tsineujtok yankuik Jerusalén tein moajsi iluikak (Apoc. 21:14).

7. ¿Toni kijtosneki se kiixmatis Dios uan keyej motelneki?

⁷ Sekin akin motelmachtiaj griego kijtouaj ke tajtol tein mokepa “ma mitsonixmatikan”, no uelis mokepas kemej “moneki kisentokaskej mitsonixmatiskej”. Nejon ome tanemililmej momajxitiaj uan motelnekij. Nejin kinextia ke moneki se kisentokas se kiselis tamachtilis tein techpaleuia maj tikixmatikan Dios. Uan amo sayoj kijtosneki se kiajsikamatis itanejnekilis uan ikualneskayouan akin okachi Ueyichiujkej itech iluikak uan taltikpak. Kijtosneki se kipias se kuali uikalis iuan yejuatsin uan tokniuan porin tiknextiaj netasojtalis. Ijkon kijtoua Biblia: “Ten amo tetasojtatinemij, [...] amo kixmatke Totajtsin Dios” (1 Juan 4:8). Se kiixmatis Dios kijtosneki se kitakamatis (xikonixtajtolti 1 Juan 2:3-5). ¡Se ueyi tatiochiualis se moajsis iniuan akin kiixmatij Jiova! Sayoj ke, nejon kualtsin uikalis uelis poliuis, kemej kinextia tein kipanok Judas Iscariote. Yejua ika maj timochikauakan amo tikpoloskej. Ijkon, keman ejkos tonal, uelis tikseliskej nemilis nochipaya kemej se netetayokolil tein amo technamiki (Mat. 24:13).

“IJKON MOITAS KE SEMI UEYI MOTOKAY”

8, 9. ¿Toni okachi kitayekanaltij Jesús keman kichiujtoya itekiyo Dios nikan taltikpak, uan toni tamachtilis kiixtopeuak?

⁸ Keman tikixtajtoltiaj netataujtil tein moajsi itech Juan capítulo 17, tikyekitaj ke Jesús amo sayoj kinteltasojtak itatitaniluan, ta no akin satepan mochiuaskiaj imomachtijkauan (Juan 17:20). Sayoj ke, moneki tikajsikamatiskej ke Jesús amo kiitaya ke okachi tayekantoya tonemakixtilis. Ijkuak kipeualtij itekiyo Dios nikan taltikpak hasta itamian, okachi kitayekanaltij kichipauas uan kiueyipanchiuas itokay Dios. Kemej neskayot, keman itech kali kampa mosentiliayaj ompa Nazaret sentaixpan kijtoj tekit tein kiselijka, kiixtajtoltij nejin tajkuilol tein moajsi itech amaix Isaías: “Iespíritu Jiova yetok notech, porin nechixpejpenak maj nikinmatilti kuali tanauatilmej akin moajsij itech tatasojtilis”. Tikneltokaj ke ijkuak kiixtajtoltij nejin tajtolmej, Jesús kualtsin kitenkixtij oso kijtoj itokay iTajtsin (Luc. 4:16-21, TNM).

⁹ Ijkon kemej kinextiaya inintamachtilis judíos, miak xiujmej achto ke Jesús ualaskia nikan taltikpak, tamachtianij itech taneltokalis kichiujkej maj taltikpakneminij amo kikuikanok itokay Dios. Uelis tikyekneltokaskej ke Jesús senkis kiixtopeuak nejon tamachtilis tein amo moajsi itech Biblia. Kiniluij akin kitauelitayaj: “Nejua niualaj itech itokay noTajtsin, sayoj ke namejuan amo nanechseliaj; komo okse aksa ejkoskia itech itokay, nankiseliskiaj yejua” (Juan 5:43, TNM). Uan seki tonalmej achto ke momikiliskia, kijtoj tein okachi kitayekanaltiaya itech inemilis ijkuak kitajtanij iTajtsin: “Xikueyipanchiua motokaytsin” (Juan 12:28). Yejua ika amo tikmoujkaitaj maj miakpa moijto nejon itech netataujtil tein timomachtijtokej.

10, 11. 1) ¿Keniuj Jesús kinixmatiltij imomachtijkauan itokay iTajtsin? 2) ¿Keyej moneki tikteixmatiltiskej itokay?

¹⁰ Jesús motataujtij: “Nikinixmatiltijya motokay takamej tein tinechinmakak akin kiskej itech taltikpakneminij. Moaxkauan katkaj, uan tinechinmakak, uan kitakamatinij motajtol”. Uan satepan kijtoj: “Uan no, nejua amo niyetokok itech taltikpak, sayoj ke yejuan yetokej itech taltikpak uan nejua niyouj nimitsajsiti. NoTajtsin akin tiyektik, xikinyekpia, uan ijkon moitas ke semi ueyi motokay tein tinechmakani uan mochiuaskej sayoj se ijkon kemej tejuan” (Juan 17:6, 11, TNM).

¹¹ Keman Jesús kinixmatiltij imomachtijkauan itokay iTajtsin, amo sayoj kijtoj itokay. No kinpaleuij maj kimatikan keniuj tamati Jiova, tein kijtosneki, ikualneskayouan tein motelita uan keniuj yolkuali iniuan taltikpakneminij (Éx. 34:5-7). Uan axkan Jesús kemej tekiuaj ne iluikak, techpaleuia maj tiktematiltikan itokay Jiova noyampa taltikpak. ¿Keyej moneki tikchiuaskej? Porin ijkon titapaleuiskej maj mosentilikan imomachtijkauan Cristo nochi tein uelis achto ke ixpoliuis nochi tein amo kuali nikan taltikpak. Ijkuak, Jiova kinmakixtis itekitikauan akin amo kikauaj uan senkis kiueyitalis itokay (Ezeq. 36:23).

IJKON “TALTIKPAKNEMINI MA KINELTOKAKAN”

12. ¿Toni eyi taman moneki tikchiuaskej uan ijkon uelis timatamiskej tekit tein Jesús kipeualtij?

¹² Jesús mochikauak kinpaleuis imomachtijkauan maj kiixnamikikan seki taman tein kinouijmakaya, uan nejon semi monekia porin sayoj ijkon ueliskiaj kitamichiuaskej tekit tein yejua kipeualtijka. Yejua ika motataujtij: “Ijkon keme Tejuatsin tinechonualtitanik para nikinmachtijtinemis in taltikpaknemini, no ijkon [...] nikintitanis nomomachtijkauan para ma [...] tamachtijtinemikan”. Itech inetataujtil kinextia eyi taman tein motelneki tein kinpaleuiskia maj kichiuakan nejon tekit tein tayekantok. Yekinika tajtani maj imomachtijkauan amo pouikan itech nejin taltikpak kampa taixyekantok Satanás uan mochiujtok tein amo chipauak. Ojpatika, maj kitakamatikan iTajtol Dios uan maj kisentokakan chipaujkej. Uan expatika, miakpa kitataujtia iTajtsin maj netasojtalis tein yejuan mopialiaj kinpaleui itatojtokakauan maj amo xexeliujtokan. Ika tein tikitakejya, tisejsemej moneki timotajtaniskej: “¿Nikchiujtok nejin eyi taman tein motajtani itech netataujtil?”. Jesús kiyekmatia ke komo itatojtokakauan mochikauayaj kichiuaskej nejon, taltikpakneminij kineltokaskiaj ke Dios kiualtitanik (xikonixtajtolti Juan 17:15-21).

13. ¿Keniuj kinankilij Jiova inetataujtil Jesús itech yekinika siglo?

¹³ ¿Kinankilij Dios inetataujtil Jesús? Kemaj. Ijkon kinextia amaix Hechos de los Apóstoles tein moajsi satepan ke tami naui amaixmej tein ika tajtoua inemilis Jesús. Komo kuali tiknemiliaj, itatojtokakauan Cristo tein mosentiliayaj itech yekinika siglo semi amo ouij maj moxexelouanij, porin ompa moajsiaj judíos uan amo judíos, akin tominpiayaj uan akin amo, takeualmej uan tekomej. Sayoj ke nochin senpouiaj, yejua ika tatitanil Pablo kineskayotij kemej nochi taman tein kipia inakayo aksa akin itsontekon yejua Jesús (Efes. 4:15, 16). ¡Semi se kimoujkaita maj ueli mochiua nejon nikan taltikpak kampa taixyekantok Satanás uan semi xexeliujtokej! Nejon sayoj ueli kichiua Jiova ika iyektikatsin espíritu tein semi chikauak (1 Cor. 3:5-7).

14. ¿Keniuj kinankiliani Dios axkan inetataujtil Jesús?

¹⁴ Tetayokoltij tikijtoskej ke kualtsin senyetolis tein kipiayaj imomachtijkauan Jesús, tamik keman momikilijkej tatitanilmej. Ta ijkon kemej achto moijtojka, nesiko tamachtilis tein amo melauak uan nejon kiualkuik miak tataman taneltokalis tein kijtouaj ke kitojtokaj Cristo (Hech. 20:29, 30). Sayoj ke, itech xiuit 1919, Jesús kinkixtij itatojtokakauan taixpejpenalmej itech taneltokalis tein amo melauak uan kinsentilij. Ijkon ueliskiaj kipiaskej “tetasojtalis [tein] techsepanpoualtia se uan okse” (Col. 3:14). Ika inintanojnotsalis, nejin tokniuan akin amo miakej, tapaleuianij maj moajsikan panoua chikome millones ‘okseki ichkamej’ tein kayomej itech “tataman paísme uan [...] tataman tagayot, [...] de nochi [...] pueblojme” akin tajtouaj tataman tajtolmej akin mosentiliaj iniuan, uan ijkon mochiuaj sayoj se oloch ichkamej tein sentekitij (Juan 10:16; Apoc. 7:9). Semi se kimoujkaita keniuj Dios kinankiliani nejin itajtoluan Jesús: “Taltikpakuani kajsikamatiske de ke Tejuatsin tinechonualtitanik [...]. Uan [...] tikinyoltasojta [...] ijkon keme [...] tinechonyoltasojta” (Juan 17:23).

TEIN IKA TAMI NETATAUJTIL TEYOLOLINIA

15. ¿Toni kintajtanilij Jesús maj kipiakan imomachtijkauan taixpejpenalmej?

¹⁵ Itech nejon youak 14 metsti nisán, seki horas achto ke Jesús motataujtiskia, kinueyipanchiuak itatitaniluan. Nejin kichiuak keman motenkauak ke yejuan taixyekanaskiaj iuan itech iTekiuajyo (Luc. 22:28-30; Juan 17:22). Ompa no kintajtanilia akin satepan mochiuaskiaj itatojtokakauan taixpejpenalmej: “Notajtsin [...] nomomachtijkauan ten tinechonmaktilij ya [...] nikneki ma yejuan yetotiue [...] kampa Nejuatsin niyetos. [...] Uan kixmatitiue ne mouiskauelilis ten Tejuatsin tinechonmaktilij ya [...] porin Tejuatsin tinechonyoltasojtak ya achtopa ya ke tsinpeuaskia in taltikpak” (Juan 17:24). Okseki ichkamej amo kinnexikoluiaj tokniuan taixpejpenalmej ta yolpakij iniuan. Nejon no kinextia ke amo xexeliujtokej akin axkan yekmelauj kichiuaj kemej Cristo.

16, 17. 1) Itech itamian inetataujtil Jesús, ¿toni kijtoj ke kisentokaskia kichiuaskia? 2) ¿Toni motelneki maj timochikauakan tikchiuaskej?

¹⁶ Miakej amo kinekij kiitaskej ke Jiova melauak kipia se xolal tein yekmelauj kiixmati uan amo xeliujtok, porin itech taneltokalismej tamachtiaj tein amo melauak. Yejua nejon tein panok itech yekinika siglo, yejua ika Jesús kitamij inetataujtil ika nejin tajtolmej tein teyololinia: “Notajtsin Dios, tion Yolmelauaktsin uan in taltikpaknemini amo mitsonixmatij. Pero Nejuatsin, kema [...]. Uan nijin nomomachtijkauan kuali kimatokke ya ke Tejuatsin tinechonualtitanik [...]. Uan [...] nikinnextilijtinemik [...] motokaytsin [...]. Uan nikinmachtijtinemis ok de akoni Tejuatsin, para ma ne tetasojtalis tenika tinechonyoltasojta, ma no ninyolijtik yejuan ma mochiua. Uan [...] nimoajsitinemis ninuan nomomachtijkauan” (Juan 17:25, 26).

¹⁷ Moyekita ke Jesús kemaj kichiuak kemej motataujtij. Yejua kiixyekantok nechikol uan techpaleuijtok maj tikteixmatiltikan itokay uan itanejnekilis iTajtsin. Maj nochipa tikselikan itayekanalis; maj titanojnotsakan ika yolpakilis uan maj titapaleuikan maj mochiuakan imomachtijkauan ijkon kemej technauatia (Mat. 28:19, 20; Hech. 10:42). Motelneki timochikauaskej maj amo titaxexelokan itech nechikol. Ijkon tikchiujtoskej kemej motataujtij Jesús, tikueyipanchiuaskej itokay Dios uan tiyolpakiskej nochipaya.