Jesús kinextij ke itokay Jehová semi ueyi

1, 2. 1) ¿Toni kichiuak Jesús se youak achto ke kimiktiskiaj? 2) ¿Toni tiknankiliskej itech nejin tamachtilis?

KATKA jueves youak. Yekin peujka tonal 14 de nisán xiuit 33, uan Jesús yekin kichiujka iniuan itatitaniluan se takualis tein semi kualtsin. Yejua kimatia ke amo uejkaua, Judas yaya kitemaktiti uan akin kiixnamikiaj kitajyouiltiskiaj uan kimiktiskiaj. Satepan ke takuajkej Jesús kiniluij itatitaniluan miak taman tein ika kinyolchikauak. Uan achto ke yaskiaj, kichiuak se netataujtil kampa kijtoj seki taman tein motelneki. Nejin netataujtil ijkuiliujtok itech Juan capítulo 17.

² ¿Toni kitekipachouaya Jesús keman motataujtij uan toni kiitaya ke okachi monekia keman nemia nikan taltikpak? Itech nejin tamachtilis tikitaskej toni techmachtia nejon netataujtil uan tiknankiliskej nejin netajtanil.

“NIKINIXMATILTIJ MOTOKAY”

3. ¿Toni kijtoj Jesús de itokay Jehová, uan toni kijtosnekik? (Juan 17:​6, 26).

³ Keman Jesús kitataujtij Jehová, kiluij: “Nikinixmatiltij motokay”. Jesús ojpa kijtoj ke kinixmatiltijka imomachtijkauan itokay Jehová (xikonlero Juan 17:​6, 26). Sayoj ke Jesús amo kinmachtijtoya ke Dios monotsa Jehová porin yejuan katkaj judíos uan ipa kimatiajya ke ijkon monotsa Dios. Nejon tokayit miakpa nesia itech amatajkuilolmej tein moijkuilojka itech hebreo. Keman Jesús kijtoj ke kiteixmatiltij itokay Dios kijtosnekia ke kinpaleuij oksekin maj kiixmatikan Jehová, tein yejua kineki maj mochiua nikan taltikpak uan toni kineki para tejuan, toni kichiuak, toni kichiuas uan keniuj tamati. Sayoj Jesús tel kuali kiixmati Jehová.

4, 5. 1) Xikonijto keniuj uelis okachi tikpatiuitaskej itokay aksa. 2) ¿Keniuj imomachtijkauan Jesús okachi kuali kiixmatkej Jehová?

⁴ Xikonnemili ke itech monechikol yetok se tokniuj tayekankej akin monotsa David uan tekiti kemej tapajtijkej. Xa uejkaujya tikonixmati. Sayoj ke se tonal mitsonpanoua teisa uan ueliskia tionmomikilis, yejua ika moneki maj niman mitsonpaleui. Mitsonuikaj tapajtiloyan kampa yejua tekiti uan mitsonpajtia. Axkan okachi tikontasojta nejon tokniuj. Nochipa keman tikonkaki itokay tikonelnamiki keniuj mitsonpaleuij. Axkan David amo sayoj tikonita kemej se tayekankej itech monechikol, ta no ke yejua tapajtijkej akin semi mitsonpaleuij.

⁵ No ijkon, maski imomachtijkauan Jesús kimatiajya keniuj monotsa Dios, yejuan okachi kipatiuitakej Jehová porin Jesús kinpaleuij maj okachi kiixmatinij. ¿Keniuj kinpaleuij? Yejua senkis kinextij keniuj katka iTajtsin ika tein kijtoj uan tein kichiuak keman yetoya nikan taltikpak. Yejua ika keman imomachtijkauan Jesús kiitakej keniuj tamachtiaya uan keniuj kinpaleuiaya oksekin, uelik okachi kiixmatkej Jehová (Juan 14:9; 17:3).

“MOTOKAY, TEIN TEJUA TINECHMAKAK”

6. ¿Toni kijtosnekik Jesús keman kijtoj ke Jehová kimakaka itokay? (Juan 17:​11, 12).

⁶ Keman Jesús kitataujtij Jehová ininka tajtojtoya imomachtijkauan, yejua kijtoj: “Xikinyekpia para maj moueyitali motokay, tein tejua tinechmakak” (xikonlero Juan 17:​11, 12). Nejin amo kijtosnekia ke Jesús monotsaskia Jehová. Keman kitataujtijtoya, yejua kiluij “xikinyekpia para maj moueyitali motokay”. Nejin kinextia ke Jesús amo kipataskia itokay uan monotsaskia “Jehová”. Komo ijkon, ¿toni kijtosnekia keman kijtoj ke Jehová kimakaka itokay? Yekinika, ke Jehová kiualtitanik Jesús para maj kijtouani tein yejua kinekia kitematiltis. Jesús ualaj uan kichiuak miak taman itokaykopa iTajtsin (Juan 5:43; 10:25). Uan no, tokayit Jesús kijtosneki “Jehová temakixtia”. Kemej tikitaj, itech tokayit Jesús yetok itokay Jehová.

7. Xikonmelaua keyej Jesús uelia kitematiltiaya tein Jehová kinekia.

⁷ Para tikajsikamatiskej keyej Jesús uelia tajtouaya itokaykopa Jehová maj tiknemilikan nejin. Se tekiuaj uelis kititanis aksa para maj kitematiltiti tein yejua kineki, yejua ika akin kititanis kipias tanauatil tein tekiuaj kipia. No ijkon, Jesús kipiaya tanauatil para kijtos tein Jehová kinekia kitematiltis porin yejua kititanka (Mat. 21:9; Luc. 13:35).

8. ¿Keyej tikijtouaj ke Jesús kichiuak nochi itokaykopa Jehová desde achto ke ualaskia nikan taltikpak? (Éxodo 23:​20, 21).

⁸ Biblia kijtoua ke Jesús yejua Tajtoltsin porin Jehová kichiuak maj Jesús kiniluiani ángeles uan akin nemiaj taltikpak tein kinekia maj kichiuakan (Juan 1:​1-3). Xa Jesús yejua ángel tein Jehová kititanik para kinixyekanas uan kinyekpias israelitas keman yetoyaj taluakyan. Jehová kiniluij israelitas keyej monekia kitakamatiskej nejon ángel, yejua kijtoj: “Nochi tein kichiua, kichiua notokaykopa” (xikonlero Éxodo 23:​20, 21).a Jehová kijtoj nejin porin Jesús kijtouaya tein Dios kinekia uan yejua akin okachi kinextia ke iTajtsin chipauak uan ke amo keman mopoloua.

“NOTAJTSIN, XIKUEYITALI MOTOKAY”

9. ¿Keniuj kinextij Jesús ke semi kinekia maj moueyitali Jehová?

⁹ Kemej tikitakejya, keman Jesús yetoya ne iluikak ipa kiitaya ke semi monekia maj moueyitali Jehová. Uan keman yetoya nikan taltikpak, ika tein kichiuak no kinextij ke semi kinekia maj moueyitali iTajtsin. Uan keman yaya mokepatia iluikak kitataujtij Jehová: “NoTajtsin, xikueyitali motokay”. Uan nimantsin desde iluikak iTajtsin kijtoj chikauak: “Nikueyitalijya uan oksepa nikueyitalis” (Juan 12:28).

10, 11. 1) ¿Keniuj Jesús kiueyitalij Jehová? (No xikonita taixkopimej). 2) ¿Keyej moneki maj moueyitali Jehová uan maj monexti ke kitakajkayauilijkej?

¹⁰ Jesús no kiueyitalij iTajtsin. Uan ijkon kichiuak keman kiniluij oksekin keniuj tamati uan nochi tein kuali tein yejua kichiuani. Sayoj ke no kichiuak okse taman. Jesús kimatia ke monekia maj moueyitali Jehová uan maj monexti ke amo melauj tein kijtouilijkej.b Uan kinextij ke kinekia maj mochiua nejin keman kinnextilij imomachtijkauan keniuj motataujtiskej. Yejua kijtoj: “ToTajtsin akin tietok ne iluikak, maj nochin kiitakan ke motokay semi ueyi” (Mat. 6:9).

¹¹ ¿Keyej moneki maj moueyitali Jehová uan maj monexti ke kitakajkayauilijkej? Porin itech xochital Edén, Satanás kijtouilij Jehová tein amo melauj. Kijtoj ke se xolopij uan ke amo kinkauaya Adán uan Eva maj kipiakan tein kuali (Gén. 3:​1-5). Keman kichiuak nejon, Satanás kiteajsikamatiltij ke Jehová amo kichiua teisa kemej moneki. Kemej Satanás kitakajkayauilij Jehová, oksekin ueliskia kinemiliskej ke amo yolkuali. Keman Job nemia, Satanás kijtoj ke tiktekitiliaj Jehová porin techmaka nochi tein tikpiaj. Nejon xolopij no kijtoj ke keman tikpiaskej ouijkayomej amo tiktekitiliskejok Jehová porin amo tiktasojtaj (Job 1:​9-11; 2:4). Yejua ika, monekia maj pano tiempo para moitas akoni takajkayaujtoya: Jehová oso Satanás.

“NIMOTEMAKAK NIMIKIS”

12. Kemej Jesús semi kitasojtaya Jehová, ¿toni kinekik kichiuas?

¹² Jesús semi kitasojtaya iTajtsin uan yejua ika kinekia maj moueyitali uan maj monexti ke amo takajkayaujtoya. Yejua ika kijtoj: “Nimotemakak nimikis” (Juan 10:​17, 18). Jesús hasta motemakak momikilis para kinextis ke Jehová chipauak uan ke nochi tein kichiua kuali yetok.c Maski Adán uan Eva amo tajtakolejkej katkaj, amo kitakamatkej Jehová uan kichiujkej tein Satanás kinekia. Sayoj ke Jesús kinekik ualas nikan taltikpak, uan kinextij ke semi kitasojtaya Jehová keman nochipa kitakamatik (Heb. 4:15; 5:​7-10). Amo keman kikauak hasta keman kiteltajyouiltijkej, kikoujpampilojkej uan kimiktijkej (Heb. 12:2). Ijkon kinextij ke kitasojtaya Jehová uan itokay.

13. ¿Keyej sayoj Jesús uelia kinextiaya ke Satanás takajkayaujtoya? (No xikonita taixkopin).

¹³ Nochi tein Jesús kichiuak, kinextij ke yejua Satanás akin takajkayaujtoya uan amo Jehová (Juan 8:44). Sayoj Jesús okachi kuali kiixmati iTajtsin. Satanás semi kitakajkayauilij Jehová uan komo yekmelauj yeskia maski sayoj se taman, Jesús ipa kimatiskia. Sayoj ke Jesús nochipa kitemoj maj kuali kiitanij Jehová uan maj kuali ika tajtouanij. Hasta keman moitaya ke amo kipaleuiayaok, nochipa kitakamatik uan motemakak momikilis (Mat. 27:46).d

“NIKTAMICHIUAKYA TEKIT TEIN TINECHNAUATIJ MAJ NIKCHIUA”

14. ¿Keniuj Jehová kitatiochiuij Jesús porin amo keman kikauak?

¹⁴ Se youak achto ke Jesús momikiliskia, kitataujtij Jehová uan kiluij: “Niktamichiuakya tekit tein tinechnauatij maj nikchiua”. Yejua kimatia ke Jehová kitatiochiuiskia porin amo keman kikaujka (Juan 17:​4, 5). Uan ijkon panok porin Jehová amo kikauak Jesús maj mokauani itech taltekoch (Hech. 2:​23, 24). Kichiuak maj oksepa nemi uan kimakak se tekit ompa iluikak para maj mochiua okachi ueyichiujkej (Filip. 2:​8, 9). Miak xiujmej satepan, Jesús peuak tekiuajti itech iTaixyekanalis Dios. Yejua kijtoj toni kichiuaskia nejon Taixyekanalis keman tamachtij maj tiktataujtikan Jehová ijkon: “Maj techixyekanaki moTaixyekanalis. Maj mochiua tein tikneki nikan taltikpak, ijkon kemej ne iluikak” (Mat. 6:10).

15. ¿Toni no kichiuas Jesús?

¹⁵ Amo uejkaua, itech Armagedón Jesús kinixpolos akin kiixnamikij Dios uan akin amo yolkualmej (Apoc. 16:​14, 16; 19:​11-16). Tepitsin satepan, kitsakuas Satanás itech “ueyi ostok” kampa amo uelisok kichiuas nion teyi (Apoc. 20:​1-3). Satepan, Jesús taixyekanas mil xiujmej uan kichiuas maj tiyolseujkanemikan uan techpaleuis maj amo titajtakolejkejok. Kichiuas maj oksepa nemikan akin momikilijkejya uan maj itech nochi taltikpak mochiua se xochital. ¡Ijkon mochiuas tein Jehová kiixtalijtoya! (Apoc. 21:​1-4).

16. ¿Keniuj tinemiskej keman tamis mil xiujmej?

¹⁶ ¿Keniuj tinemiskej keman tamis nejon mil xiujmej? Amo akin tajtakolchiuasok. Kemej Jesús toka momikilij Jehová ueli techtapojpoluia, sayoj ke ijkuak amo monekisok maj tiktajtanikan maj techtapojpoluili totajtakoluan. Uan no, amo monekisok maj techtajtouikan para maj ueli timouikakan iuan Jehová. Uan “satepan ke ixpoliuiskej nochin taixnamikinij, mikilis no ixpoliuis”. Nochin akin momikilijkejya oksepa nemiskej. Uan nochin akin nemiskej nikan taltikpak amo tajtakolejkejok yeskij (1 Cor. 15:​25, 26).

17, 18. (1) ¿Toni panos keman tamis mil xiujmej? (2) ¿Toni kichiuas Jesús keman amo taixyekantosok? (1 Corintios 15:​24, 28; no xikonita taixkopin).

¹⁷ ¿Toni okseki taman mochiuas keman panoskej mil xiujmej? Amo monekisok maj monexti ke Jehová ueyi uan ke nochi tein kichiua kuali yetok. Itech xochital Edén, Satanás kijtoj ke Jehová takajkayaua, ke amo kuali taixyekana uan ke amo techtasojta. Desde ijkuak, itekitikauan Jehová miakpa kinextianij ke yejua semi ueyi. Keman panoskej nejon mil xiujmej, senkis moitas ke amo melauj tein Satanás kijtouilij. Ijkuak, toTajtsin kinextis ke yekmelauj tetasojta.

¹⁸ Keman panos nejon, nochin kimatiskej ke nochi tein Satanás kijtouilijka Jehová amo melauj katka. ¿Toni kichiuas Jesús keman amo taixyekanasok? ¿Kichiuas kemej Satanás uan kiixnamikis Jehová? Tikyekmatij ke amo (xikonlero 1 Corintios 15:​24, 28). Jesús amo kemej Satanás. Yejua kikauas maj iTajtsin oksepa taixyekana, uan no mokauas maj kiixyekana. Uan kichiuas nochi nejon porin kitasojta Jehová.

19. ¿Toni tikitakej de Jesús itech nejin tamachtilis?

¹⁹ Yejua ika Jehová kemej yeskia kimakak Jesús itokay, porin yejua senkis kichiuak uan tajtoj kemej Jehová kineki. ¿Toni kineki Jesús maj mochiua ika itokay Jehová? Kiita ke yejua tein okachi moneki maj moueyitali. Yejua ika motemakak momikilis uan kikauas maj oksepa taixyekana iTajtsin satepan ke tamis mil xiujmej. ¿Keniuj uelis tikchiuaskej kemej yejua? Tikitaskej itech okse tamachtilis.