Maj tiknextikan ke itokay Jehová semi ueyi

1, 2. ¿Keniuj kinextij Jesús ke kiitaya ke semi monekia maj moueyitali itokay Jehová?

JESÚS kiita ke semi moneki maj moueyitali Jehová. Sayoj yejua kichiuani miak taman para kiteixmatiltis itokay Jehová. Itech okse tamachtilis tikitakej ke Jesús kinekik momikilis para kinextis ke Jehová semi ueyi uan ke nochi tein kichiua kuali yetok (Mar. 14:36; Heb. 10:​7-9). Keman panos mil xiujmej, Jesús kikauas maj Jehová oksepa taixyekana porin kineki maj nochin kiueyitalikan (1 Cor. 15:​26-28). Nochi tein Jesús kichiuani uan tein kichiuasok kinextia ke semi kitasojta Jehová.

² Jesús ualaj nikan taltikpak para kinmatiltis oksekin nochi tein Jehová kinekia kiniluis (Juan 5:43; 12:13). Jesús kinixmatiltij imomachtijkauan itokay iTajtsin (Juan 17:​6, 26). Keman tamachtiaya uan keman kichiuaya milagros kinextij ke Jehová kipaleuiaya maj tamatkej uan maj uelini kichiuani nochi nejon (Juan 10:25). Uan keman Jesús kitataujtij Jehová maj kinpaleui imomachtijkauan, kitajtanij maj kinpaleuiani para ‘maj moueyitali itokay’ (Juan 17:11). Nochi nejin kinextia ke Jesús kiita ke semi moneki maj moueyitali itokay Jehová. Komo ijkon, ¿uelis aksa kijtos ke kichiua kemej Cristo komo amo kiixmati itokay Dios uan nion no kikui?

3. ¿Toni tikitaskej itech nejin tamachtilis?

³ Kemej yekmelauj tikchiuaj kemej Cristo, no semi tiktasojtaj uan tikpoujkaitaj itokay Jehová kemej kichiuak Jesús (1 Ped. 2:21). Itech nejin tamachtilis tikitaskej keyej Jehová kikui itokay para maj ika kinixmatikan akin kitematiltiaj “kuali tanauatilmej tein ika tajtoua iTaixyekanalis Dios” (Mat. 24:14). No timomachtiskej keyej tisejsemej moneki tikitaskej ke semi moneki maj moueyitali itokay Jehová.

“SEKIN AKIN NO KIUIKASKEJ ITOKAY”

4. 1) ¿Toni kiniluij Jesús imomachtijkauan achto ke mokepaskia iluikak? 2) ¿Toni tiknankiliskej itech nejin tamachtilis?

⁴ Tepitsin achto ke Jesús mokepaskia iluikak, kiniluij imomachtijkauan: “Keman Dios namechmakas ichikaualis, nanyeskij nanchikaujkej. Uan nanechteixmatiltiskej ompa Jerusalén, itech nochi Judea uan Samaria, uan itech nochi taltikpak” (Hech. 1:8). Nejin kinextia ke imomachtijkauan Jesús amo sayoj tanojnotsaskiaj ompa Israel, ta ijkon kemej panoskia tiempo, “akin nemij itech nochi taltikpak” no ueliskia mochiuaskej imomachtijkauan Jesús (Mat. 28:​19, 20). Sayoj ke yejua no kijtoj: “nanechteixmatiltiskej”. ¿Kijtosnekia ke sayoj mochiuaskiaj itaixpantijkauan Jesús oso no monekia kiixmatiskej Jehová uan kiteixmatiltiskej? Tein kijtoua Hechos capítulo 15 techpaleuis maj tikmatikan.

5. Keman mosentilijkej tatitanilmej uan tayekananij de Jerusalén, ¿keniuj kinextijkej ke nochin monekia kiixmatiskej itokay Jehová? (No xikonita taixkopin).

⁵ Itech xiuit 49, tatitanilmej uan tayekananij de Jerusalén mosentilijkej para kiitaskej ox akin amo katkaj judíos monekia motekiskej para mochiuaskej tokniuan. Keman yaya tamitia nejon nechikol, Santiago akin katka itakpaikniuj Jesús, kijtoj: “Symeón [Pedro] techtapouij ke Dios kinselijya akin amo judíos uan peuak kinijita sekin akin no kiuikaskej itokay”. ¿Akoni itokay? Santiago kijtoj tein tanauatijkej Amós kijtojka: “Para maj akin mokauaskejok kitemokan Jehová ika nochi ininyolo iniuan akin kayomej itech nochin altepemej, akin kiuikaj notokay. Ijkon kijtoua Jehová” (Hech. 15:​14-18). Akin satepan mochiuaskiaj imomachtijkauan Jesús amo sayoj kimatiskiaj seki taman de Jehová, ta no kiuikaskiaj itokay Dios. Kijtosneki ke kinixmatiskiaj ika nejon tokayit uan ke kiteixmatiltiskiaj.

6, 7. 1) ¿Keyej ualaj Jesús nikan taltikpak, uan toni tein okachi monekia ika ualajka?

⁶ Maj tikelnamikikan ke tokayit Jesús kijtosneki “Jehová temakixtia”. Uan nejin ipa melauj, porin Jehová kichiuak maj Jesús kinmakixti nochin akin iuan takuaujtamatiskiaj Dios uan iKonetsin. Jesús momikiliko nikan taltikpak para techmakixtis (Mat. 20:28). Ijkon Jehová ueli techtapojpoluilia totajtakoluan uan satepan uelis tinemiskej nochipaya (Juan 3:16).

⁷ ¿Keyej monekia maj aksa taxtaua para techmakixtis? Porin itech okse tamachtilis tikitakej ke itech xochital Edén, Adán uan Eva kiixnamikkej Jehová uan amo uelikok nenkej nochipaya (Gén. 3:​6, 24). Sayoj ke Jesús ualaj nikan taltikpak para kichiuas se taman tein okachi monekia ke techmakixtis. Satanás semi kitakajkayauilijka Jehová (Gén. 3:​4, 5). Yejua ika monekia maj nochin kimatikan ke Dios amo kichiujka tein amo kuali uan ke semi tetasojta. Sayoj Jesús uelia kinextiaya nejin porin yejua ualaj itokaykopa Jehová uan kichiuak nochi tein yejua kinekia.

8. ¿Toni monekia kiajsikamatiskej nochin akin mochiuaskiaj imomachtijkauan Jesús?

⁸ Judíos uan akin amo judíos akin mochiuaskiaj imomachtijkauan Jesús, monekia kiajsikamatiskej ke Jehová oso iTajtsin Jesús yejua akin uelia kinmakixtiaya (Juan 17:3). Uan ijkon kemej Jesús, yejuan no kinixmatiskiaj ika itokay Dios. No monekia kiajsikamatiskej ke semi monekia maj kiueyitalikan itokay Jehová. Monekia kichiuaskej nejin para kiyolpaktiskej Dios uan nemiskej nochipaya (Hech. 2:​21, 22). Nejon kinextia ke nochin imomachtijkauan Jesús monekia kuali kiixmatiskej yejua uan iTajtsin. Yejua ika Jesús kitamiltij inetataujtil kemej kijtoua Juan capítulo 17: “Nikinixmatiltij motokay uan niksentokas nikteixmatiltis, para maj tetasojtakan ijkon kemej tejua tinechtasojta, uan ijkon uelis iniuan nietos” (Juan 17:26).

“NAMEJUAN NANOTAIXPANTIJKAUAN”

9. ¿Toni moneki tikchiuaskej akin yekmelauj tikchiuaj kemej Cristo?

⁹ Tikitakejya ke tinochin akin yekmelauj tikchiuaj kemej Cristo moneki tiktayekanaltiskej tikueyitaliskej itokay Jehová (Mat. 6:​9, 10). Tejuan tikmatij ke sayoj itokay Jehová okachi ueyi. Sayoj ke, ¿toni uelis tikchiuaskej para tikueyitaliskej uan tiknextiskej ke amo melauj tein Satanás kijtouilij? Moneki tiknextiskej ika tein tikchiuaj.

10. ¿Toni ika tajtoua Isaías capítulos 42 hasta 44? (Isaías 43:9; 44:​7-9; no xikonita taixkopin).

¹⁰ Itech Isaías capítulos 42 hasta 44, techmachtia toni moneki tikchiuaskej para maj monexti ke Jehová semi ueyi. Itech nejin capítulos, Jehová kiniluia akin kinueyichiuaj tatadiosmej maj kinextikan ox yekmelauj yoltokej uan kinpaleuiaj. Uan ijkon kemej kichiua se juez keman kimelaua aksa, Jehová kiniluia maj semej de yejuan kinexti keyej kinemilia ke yekmelauj tein kineltoka. Sayoj ke amo akin uelini kinextiani nejon (xikonlero Isaías 43:9; 44:​7-9).

11. Kemej kijtoua Isaías 43:​10-12, ¿toni kiniluia Jehová akin kitekitiliaj?

¹¹ (Xikonlero Isaías 43:​10-12). Jehová kiniluia akin kitekitiliaj: “Namejuan nanotaixpantijkauan [...], uan nejua niDios”. Yejua kiniluia maj kinankilikan nejin netajtanil: “¿Xe moajsi okse Dios kemej nejua?” (Is. 44:8). Semi kualtsin porin tejuan ueli tiknextiaj ke sayoj Jehová yejua Dios uan ke amo akin okachi ueyi ke yejua. ¿Keniuj ueli tiknextiaj nejon? Ika tein tikchiuaj uan ika tein tikijtouaj. Kemej tinemij no tiknextiaj ke tiktasojtaj Jehová uan amo tikauaj maski Satanás kinekis techtsakuilis. Ijkon uelis titapaleuiskej maj monexti ke Jehová semi ueyi.

12. ¿Keniuj mochiuak tein moijtojka itech Isaías 40:​3, 5?

¹² Isaías no kijtojka ke aksa ‘kichipauaskia iojtsin Jehová’ (Is. 40:3). Uan nejin mochiuak keman Juan akin teauia kemej yeskia kiyekchijchiuak uan kichipauak iojtsin Jesús, porin yejua ualaj para kichiuas nochi tein Jehová kinauatijka uan kijtoj nochi tein iTajtsin kinekia kitematiltis (Mat. 3:3; Mar. 1:​2-4; Luc. 3:​3-6). Isaías no kijtoj: “Monextis keniuj moueyitalia Jehová” (Is. 40:5). ¿Keniuj mochiuak tein Isaías kijtojka? Keman Jesús ualaj nikan taltikpak senkis kichiuak tein iTajtsin kinekia. Yejua ika kemej yeskia yejua Jehová akin ualajka (Juan 12:45).

13. ¿Keniuj uelis tikchiuaskej kemej Jesús?

¹³ Tikchiuaj kemej Jesús keman titapaleuiaj maj oksepa kuali kiitakan Jehová. Tejuan no tiitaixpantijkauan Jehová ijkon kemej Jesús. Techixmatij ika itokay Dios uan nochin ika tikinnojnotsaj tein yejua kichiuani. Sayoj ke para tiknextiskej ke tiitaixpantijkauan Jehová no moneki tikiniluiskej oksekin nochi tein Jesús kichiuak uan kichiuasok para kinextis ke itokay Dios semi ueyi (Hech. 1:8). Jesús yejua akin okachi kuali kiteixmatiltij Jehová uan tejuan no tikchiuaj kemej yejua (Apoc. 1:5). Sayoj ke, ¿toni no uelis tikchiuaskej para tikueyitaliskej itokay Jehová?

¿TONI NO UELIS TIKCHIUASKEJ PARA TIKUEYITALISKEJ ITOKAY JEHOVÁ?

14. Kemej kijtoua Salmo 105:​3, ¿keniuj timomachiliaj porin Jehová yejua toDios?

¹⁴ Tiyolpakij porin tikixmatij itokay Jehová (xikonlero Salmo 105:3). Jehová semi kiuelita maj tiyolpakikan oso maj timoueyitalikan keman ika titajtouaj yejua (Jer. 9:​23, 24; 1 Cor. 1:31; 2 Cor. 10:17). Nejon kijtosneki ke tiyolpakij porin Jehová yejua toDios. Tikitaj ke semi kualtsin maj ueli tikiniluikan oksekin ke Jehová semi ueyi uan ke nochi tein kichiua kuali yetok. Amo moneki timopinaujmatiskej maj oksekin kimatikan ke tiitaixpantijkauan Jehová, kampa titekitij, kampa timomachtiaj, kampa tinemij oso kampa yeski tietoskej. Satanás kineki maj amo tiktematiltikanok itokay Jehová (Jer. 11:21; Apoc. 12:17). Yejua uan akin kimoyauaj tein takajkayaua, kinekij maj nochin kielkauakan (Jer. 23:​26, 27). Sayoj ke tejuan semi tiktasojtaj itokay Jehová uan nochipa tiknekij tikueyitaliskej (Sal. 5:11; 89:16).

15. ¿Toni kijtosneki maj tiknotsakan Jehová ika itokay?

¹⁵ Tiksentokaj tiknotsaj Jehová ika itokay (Joel 2:32; Rom. 10:​13, 14). Nejon amo kijtosneki ke sayoj moneki tikmatiskej keniuj monotsa uan tikuiskej itokay, ta no moneki kuali tikixmatiskej Jehová, iuan titakuaujtamatiskej uan tiktemoskej maj techpaleui uan maj techixyekana (Sal. 20:7; 99:6; 116:4; 145:18). No kijtosneki ke moneki tikiniluiskej oksekin keniuj monotsa uan keniuj tamati, uan tikinpaleuiskej maj kipatakan kemej nemij para maj ueli kiyolpaktikan Jehová uan maj momakixtikan (Is. 12:4; Hech. 2:​21, 38).

16. ¿Keniuj uelis tiknextiskej ke Satanás se xolopij?

¹⁶ Timotemakaj titajyouiskej para tikueyitaliskej Jehová (Sant. 5:​10, 11). Keman amo tikauaj Jehová maski titajyouiaj, tiknextiaj ke Satanás se xolopij. Keman Job nemia, Satanás kijtoj ke akin kitekitiliaj Jehová ‘kitemakaskiaj nochi tein kipiaj para momakixtiskej’ (Job 2:4). Yejua kijtoj ke sayoj tiktekitiliskiaj Jehová keman kuali tietoskiaj, uan ke tikauaskiaj keman tikpiaskiaj ouijkayomej. Kemej Job amo keman kikauak Jehová maski tajyouij, kinextij ke nejon amo melauj. Axkan tejuan no uelis tiknextiskej ke amo keman tikauaj Jehová maski tikpiaskej ouijkayomej oso maski Satanás kinekis kichiuas maj timosenkauakan. Tikmatij ke Jehová kisentokas techyekpias para maj moueyitali itokay (Juan 17:11).

17. Kemej kijtoua 1 Pedro 2:​12, ¿keniuj no tikueyitaliaj tokay Jehová?

¹⁷ Timochikauaj nochipa tikueyitaliskej itokay Jehová (Prov. 30:9; Jer. 7:​8-11). Kemej oksekin kimatij ke tiitaixpantijkauan Jehová, ika tein tikchiuaj uelis titapaleuiskej maj kiueyitalikan oso maj kijijtokan (xikonlero 1 Pedro 2:12). Yejua ika nochipa timochikauaj tikueyitaliskej Jehová ika tein tikijtouaj uan ika tein tikchiuaj. Ijkon ueli tikueyitaliaj Jehová maski titajtakolejkej.

18. ¿Keniuj no tiknextiaj ke tikueyitaliaj itokay Jehová? (No xikonita nota).

¹⁸ Tiktemouaj maj moueyitali itokay Jehová maski amo kuali techitaskej (Sal. 138:2). ¿Toni kijtosneki nejin? Ke tikchiuaj tein Jehová kiyolpaktia maski sekin techkejkeloskej uan techijijtoskej.a Keman kimiktijkej Jesús, miakej kiitayaj kemej se akin kichiuaya tein amo kuali uan kiixtopeuayaj. Sayoj ke motemakak ijkon momikilis para maj moueyitaliani Jehová. Kemej kijtoua Hebreos 12:​2-4, “amo mopinaujmatik” uan amo kitekipachouaya maj amo kuali ika tajtouanij, ta okachi kitekipachouaya maj mochiua tein Jehová kinekia (Mat. 26:39).

19. ¿Keniuj tikonita itokay Jehová, uan keyej?

¹⁹ Tiyolpakij tiktekitiliskej Jehová uan tikuelitaj maj techixmatikan kemej itaixpantijkauan. Yejua ika amo techtekipachoua maj techkejkelokan oso maj techijijtokan. Tikitaj ke okachi moneki maj moueyitali itokay Jehová uan amo keniuj techitaj tejuan. Yejua ika tikixtaliaj tiksentokaskej tikueyitaliskej maski Satanás kitemos techtsakuilis. Ijkon tikchiujtoskej kemej Jesús uan tiknextiskej ke semi tiknekij maj moueyitali itokay Jehová.