Keniuj tiksentokaskej timochiaskej

1. ¿Keyej uelis peuas tiyolijsiuiskej?

TEIN mochiujtok nikan taltikpak kampa taixyekantok Satanás moajsi itech itamian tonalmej, tein peuak itech xiuit 1914 keman moixtalij iTekiuajyo Mesías. Itech nejon xiuit mochiuak se neteuilis ompa iluikak uan Jesús kipantamotak Satanás uan iamokuali ejekauan nikan taltikpak (xikonixtajtolti Apocalipsis 12:7-9). Biblia kijtoua ke Satanás “amo kipia ok miak tonalme” (Apoc. 12:12). Sayoj ke nejon amo miak tonalmej uejkauakya miak xiujmej uan sekin itekitikauan Dios xa kinemiliaj ke itamian tonalmej tel uejkauakya. Uan tejuan ¿peua tiyolijsiuij itech nejin tonalmej keman tikchiaj maj Jiova tayektali?

2. ¿Toni tikitaskej itech nejin tamachtilis?

² Semi tamouilil komo peua tiyolijsiuij porin uelis techuikas maj tikchiuakan teisa tein amo kuali tiknemiliaj. ¿Toni techpaleuis maj amo tiyolijsiuikan, ta maj tiksentokakan timochiakan? Itech nejin tamachtilis monankilis nejin netajtanilmej tein techpaleuis maj amo tiyolijsiuikan: 1) ¿Toni techmachtia neskayot tein kikauak tanauatijkej Miqueas keman amo yolijsiuik? 2) ¿Toni tachiualismej kinextis ke amo uejkaua ejkos tamilis? 3) ¿Keniuj uelis tiknextiskej ke tiktasojkamatij maj Jiova amo yolijsiui?

¿TONI TECHMACHTIA NESKAYOT TEIN KIKAUAK MIQUEAS?

3. ¿Keniuj moajsiaj israelitas itech itonaluan Miqueas?

³ (Xikonixtajtolti Miqueas 7:2-6.) Miqueas kiitak keniuj israelitas kikaujtiyajkej Jiova keman tekiuajtitoya Acaz akin semi amo yolkuali katka hasta keman senkis kichiuayaj tein tel amo kuali. Tanauatijkej kijtoj ke nejon israelitas akin kielkaujkej Dios katkaj kemej uitskoujtaktson. Ijkon kemej uitskoujmej kinxokoliaj akin motokiaj ompa, yejuan kinijtakouayaj nochin akin motokiayaj iniuan. Semi tel amo yolkualmej katkaj hasta amo motasojtayaj kemej kalyetouanij. Kemej Miqueas kimatia ke amo ueliskia kiyektalis nejon tein tel amo kuali, kitapouij Jiova kemej momachiliaya uan kisentokak mochiak. Kiyekmatia ke Jiova kichiuaskia tein monekia keman kiitaskia ke okachi kuali.

4. ¿Toni ouijkayomej tikixnamikij?

⁴ Ijkon kemej kipanok Miqueas, axkan no semi moajsij akin sayoj yejuan motasojtaj. Miakej ‘amo no teyi ika motasojkamachiliaj’ uan “amo kipiaj ok tetasojtalis” (2 Tim. 3:2, 3). Semi techijtakoua keman tikinitaj ke kitemouaj sayoj inintanejnekilis akin nemij ompakauin kampa tichanchiuaj, akin iniuan titekitij oso timomachtiaj. Sayoj ke sekin itekitikauan Jiova kipiaj se okachi ueyi ouijkayot. Jesús kijtoj ke itatojtokakauan kinixnamikiskiaj ininchankauan uan kikuik tajtolmej kemej tein ixnesi itech Miqueas 7:6 keman kimelauak keniuj tanankiliskiaj ijkuak kikakiskiaj itamachtilis. Kijtoj: “Niuala para ma in tekoneu de se kalyetoni kixnamiki itat, uan para ma in teichpoch moxejxelos de inan, uan para ma in tesiuamon ma amo kiyekitas imonan. Uan kuak se tagat takuautamatis nouan, ijkuakon yejua kitauelitaske ichankauan” (Mat. 10:35, 36). ¡Semi techouijmaka tikxikoskej maj techkejkelokan uan maj techixnamikikan tochankauan akin amo kitekitiliaj Jiova! Komo tikpiaj nejon tayejyekolis, maj amo timosenkauakan. Maj amo tikauakan Jiova uan maj tiksentokakan tikchiakan maj kimelaua ouijkayot. Komo tiktajtaniaj maj techpaleui, techmakas chikaualis uan tamatilis tein kichiuas maj titaxikokan.

5, 6. ¿Keniuj Jiova kitatiochiuij Miqueas, sayoj ke toni tein achtook kijtojka amo kiitak keniuj mochiuak?

⁵ Miqueas kiitak tein kuali porin amo yolijsiuik. Kiitak keniuj tamik Acaz uan iamo kuali tekiuajyo, uan kiitak keman Ezequías, ikonetsin nejon tekiuaj, kiselij tekiuajyot uan kinpaleuij israelitas maj oksepa kiueyichiuanij Jiova. Uan no, tein Dios kiolinij Miqueas maj kitematiltiani toni kipanoskia Samaria, mochiuak keman asirios moaxkatilijkej tekiuajyot Israel tein kiyekanaya majtakti kalyetouanij (Miq. 1:6).

⁶ Sayoj ke Miqueas amo nochi kiitak keniuj mochiuak tein Jiova kiolinij maj kijtouani toni panoskia satepan. Kemej neskayot, kijkuiloj: “Itech itamian tonalmej, tepet kampa moajsi ichan Jiova moneki ompa kuali yekyetos okachi ajko ke ininkuapan tepemej, uan yekmelauj moajsis okachi ajko ke okseki tepemej; uan ompa moneki yaskej xolalmej. Uan miakej altepemej yekmelauj yaskej uan kijtoskej: ‘Xiualakan, maj tipankisakan itech tepet tein iaxka Jiova’” (Miq. 4:1, 2). Maski Miqueas amo uelik kiitak keniuj mochiuak nejin tein achtook kijtojka, porin momikilij tel miak xiujmej achto, senkis kiixtalij amo kikauas Jiova itech nochi inemilis maski oksekin amo kichiuaskiaj. Tein melauj, kijkuiloj: “Nochin xolalmej, yejuan nentinemiskej itech itokay inindios; sayoj ke tejuan, tinentinemiskej itech itokay Jiova toDios nochi tonalmej uan nochipaya” (Miq. 4:5). Miqueas uelik kisentokak mochiak itech nejon tonalmej tein semi ouijkej katka, porin senkis takuaujtamatik ke Jiova kichiuaskia nochi tein motenkaujka. Kemej tikitaj, tanauatijkej akin tatakamatik takuaujtamatik iuan Jiova.

7, 8. 1) ¿Keyej uelis titakuaujtamatiskej iuan Jiova? 2) ¿Toni techpaleuis maj tikmachilikan ke ijsiujka panouaj tonalmej?

⁷ ¿No ijkon titakuaujtamatij iuan Jiova? Onkak miak taman tein kinextia ke uelis tikchiuaskej, ta tikitanij keniuj mochiujtok tein achtook kijtojka Miqueas. Itech nejin “itamian tonalmej”, tel miakej akin kayomej itech tataman altepemej uan akin kimatij tataman tajtolmej, pankistokej itech “tepet kampa moajsi ichan Jiova”. Miakej kayomej itech altepemej tein moixnamikij, maski ijkon, ‘ininespadas kichiujkej tameualonimej’ uan senkis kiixtopeuaj momachtiskej keniuj tateuiskej (Miq. 4:3). ¡Se ueyi tatiochiualis maj tipouikan iniuan itekitikauan Jiova akin amo tateuiaj!

⁸ Tinochin tiknekij maj Jiova niman kitami tein amo kuali nikan taltikpak. Sayoj ke tein techpaleuis maj tiksentokakan timochiakan, moneki tikitaskej teisa kemej Dios kiita. Yejuatsin kiixtalij tonal keman kijtos toni kinnamiki kiseliskej taltikpakneminij, uan nejon kichiuas itechkopa Jesucristo “ten Yejuatsin kijitak ya” (Hech. 17:31). Sayoj ke achto kinkaua maj nochin uelikan “kajsikamatikij in melauak Tajtoltsin” uan ijkon kichiuaskej kemej momachtiaj uan uelis momakixtiskej. Moajsij akin uelisok momakixtiskej (xikonixtajtolti 1 Timoteo 2:3, 4). Komo tiksentokaj tikinpaleuiaj oksekin maj kiixmatikan Dios, tikmachiliskej ke ijsiujka panouaj tonalmej tein poliuijok. Amo uejkaua, uan xa ijsiujka, nejon tonalmej tamis. Uan keman panos nejon, ¡semi techyolpaktis tikmatiskej ke semi titekitikej itech tanojnotsalis!

¿TONI TACHIUALISMEJ KINEXTIS KE TAMILIS AMO UEJKA YETOK?

9-11. ¿Mochiuakya tein achtook moijtojka itech 1 Tesalonicenses 5:3?

⁹ (Xikonixtajtolti 1 Tesalonicenses 5:1-3, TNM.) Amo uejkaua moijtos ke “onkak yolseuilis uan yekyetolis”. Komo amo tiknekij maj techkajkayaua nejon tein kiteixmatiltiskej, moneki tikchiuaskej tein Pablo tayolmajxitij: “Moneki ma tiijsatokan uan ma tikuatamatkanentinemikan” (1 Tes. 5:6). Tein techpaleuis maj tiksentokakan tiijsatokan, moneki tepitsin tikitaskej seki tachiualismej tein kiuikas maj kiteixmatiltikan nejon tajtolmej tein amo ijkon mokaktoya.

¹⁰ Keman mochiuak ome neteuilis itech nochi taltikpak, satepan ke tamik sejse neteuilis, itech altepemej kijtojkej ke kitelnekiaj maj onka yolseuilis. Satepan ke panok yekinika neteuilis, taltikpakneminij kiixtalijkej Liga de Naciones maj kiualkui yolseuilis nikan taltikpak. Keman panok ojpatika neteuilis, tel miakej kichiayaj maj Naciones Unidas kichiua nejon. Tekiuanij uan taixyekananij itech taneltokalis kijtouanij ke takuaujtamatij maj nejon ome taltikpaknechikolmej kiualkuikan yolseuilis. Kemej neskayot, Naciones Unidas senkis kiteixmatiltijkej 1986 kemej Xiuit keman Noyampa Taltikpak motemoskia Yolseuilis. Nejon xiuit tekiuanij itech miak altepemej uan taixyekananij itech taneltokalismej, mosentilijkej iuan taixyekankej itech Iglesia Católica ompa Asís tein poui Italia kampa kichiujkej netataujtil maj onka yolseuilis.

¹¹ Sayoj ke keman kitematiltijkej nejon yolseuilis uan yekyetolis uan okseki tajtolmej kemej nejon, amo kijtosneki ke mochiuakya tein achtook moijtojka itech 1 Tesalonicenses 5:3. ¿Keyej amo? Porin ayamo ‘ejkotiuetsi ixpoliuilis’ tein moijtoua ke mochiuas.

12. ¿Toni kemaj tikmatij keniuj mokakis keman moijtos “onkak yolseuilis uan yekyetolis”?

¹² ¿Akoni kiteixmatiltis ke “onkak yolseuilis uan yekyetolis”? ¿Keniuj tapaleuiskej tayekananij itech taneltokalis kampa kijtouaj ke kitojtokaj Cristo uan okseki taneltokalismej? ¿Keniuj no ompa mokalakiskej tekiuanij itech tataman altepemej keman moteixmatiltis nejon? Biblia amo kijtoua. Sayoj ke maski amo tikmatij keniuj mochiuas oso mokakis ke senkis melauak, tikmatij ke nejon tein kiteixmatiltiskej sayoj yeski se takajkayaualis. Tein mochiujtok nikan taltikpak kisentokas kiixyekantos Satanás. Moajsi kemej yeskia nochi palaktik uan ijkon kisentokas. Yejua ika semi tetayokoltij yeskia komo timokauaj maj techkajkayaua nejon tein Satanás taolinis maj moteixmatilti uan peua tiktojtokaj nejon.

13. ¿Keyej ángeles kitsakuilijtokej ejekat oso ixpoliuilis?

¹³ (Xikonixtajtolti Apocalipsis 7:1-4.) Itech nejin tonalmej keman tikchiaj maj mochiua 1 Tesalonicenses 5:3, chikaujkej ángeles kitsakuilijtokej ejekat tein taixpoloua, tein kijtosneki, okachi ueyi tajyouilis. ¿Toni kichixtokej? Se taman tein motelneki yejua tein kinextij tatitanil Juan: maj senkis kinselikan “nijin itekitikauan de Dios” kemej taixpejpenalmej.a Keman mochiuas nejon tein motelneki, ángeles kemej yeskia kimajkauaskej ejekat oso ixpoliuilis. ¿Toni panos satepan?

14. ¿Toni kinextia ke Ueyi Babilonia amo uejkaua ixpoliuis?

¹⁴ Ueyi Babilonia, tein kijtosneki, taneltokalismej tein amo melaujkej itech nochi taltikpak, ixpoliuis ijkon kemej kinamiki. Ijkuak, “pueblojme [...,] tagayot [...,] paísme uan [...] tagayot ten tajtoaj ika tataman tajtolis” tein inintech mopaleuia, amo uelis kimakixtiskej. Tikitstokejya tein kinextia ke amo uejkaua ixpoliuis (Apoc. 16:12; 17:15-18; 18:7, 8, 21). Moyekita ke kipolojtokej nepaleuil: kampa motematiltia teisa semi kinijijtouaj taneltokalismej uan akin ompa taixyekanaj. Maski ijkon, akin taixyekanaj itech Ueyi Babilonia kinemiliaj ke amo onkak keyej motekipachoskej. ¡Semi mopolojtokej! Satepan ke kiteixmatiltiskej ke “onkak yolseuilis uan yekyetolis”, tekiuanij tein pouij nikan taltikpak kampa taixyekantok Satanás, niman kiixpoloskej taneltokalis tein amo melauak uan amo keman moajsisok. Moyekita ke motelneki maj tiksentokakan timochiakan maj mochiua nejon tein motelneki (Apoc. 18:8, 10).

¿KENIUJ UELIS TIKTASOJKAMATISKEJ MAJ JIOVA AMO YOLIJSIUI?

15. ¿Keyej Jiova amo yolijsiui?

¹⁵ Maski taltikpakneminij semi kichiuanij maj amo kuali ika tajtokan itokay Jiova, yejuatsin kisentoka kichia tonal keman tayektalis. ¿Keyej? Porin amo kineki maj nion se akin kipia kuali iyolo ixpoliui (2 Ped. 3:9, 10). ¿No ijkon tiknekij? Axkan ke tikchiaj nejon tonal, moajsi seki taman keniuj uelis tiknextiskej ke tiktasojkamatij maj Dios amo yolijsiui. Maj tikitakan seki.

16, 17. 1) ¿Keyej moneki tikinpaleuiskej akin amo tanojnotsajok? 2) ¿Keyej motelneki maj ijsiujka mokepakan iuan Jiova akin amo tanojnotsajok?

¹⁶ Maj tikinpaleuikan akin amo tanojnotsajok. Jesús kijtoj ke semi yolpakij ne iluikak keman kiajsij se ichkat tein poliujtoya (Mat. 18:14; Luc. 15:3-7). Moyekita ke Jiova ika nochi iyolo ininka motekipachoua nochin akin kinextianij ke kitasojtaj itokay, maski axkan amo kitekitilijtokej. Keman tikinyolchikauaj maj mokepakan itech nechikol, titapaleuiaj maj Jiova uan ángeles yolpakikan.

¹⁷ ¿Tejuatsin semej akin amo tikontekitiliaok Jiova? Xa amo tionyouiok nechikolmej porin se tokniuj mitsonyolxokolij. ¿Uejkaujya panok nejon? Komo ijkon, xionmotajtani: “¿Okachi kuali ninemi axkan uan okachi niyolpaki? ¿Yejuatsin Jiova akin nechyolxokolij oso tein melauj nechijtakoj se aksa tajtakojkej? ¿Xe nechijtakouani Jiova?”. Tein melauj, yejuatsin nochipa kualtakat touan. Maski amo tiktekitilijtokej kemej timotenkaujkej iuan, techkaua maj tikselikan tein kuali tein yejuatsin kitemaka (Sant. 1:16, 17). Sayoj ke maj amo tikelkauakan ke itonal Jiova amo uejka yetok. Axkan moneki timokepaskej iuan toTajtsin tetasojtakej akin kuali techselia uan itech nechikol kampa sayoj ompa uelis tikpiaskej yekmelauj nepaleuil itech nejin itamian tonalmej (Deut. 33:27; Heb. 10:24, 25).

18. ¿Keyej moneki tikinpaleuiskej akin taixyekanaj itech nechikol?

¹⁸ Maj tiksentokakan tikinpaleuikan akin taixyekanaj itech nechikol. Kemej Ichkatajpixkej tetasojtakej, Jiova techyekana uan techyekpia. Yejua ika kiixtalij iKonetsin kemej Yekinika ininTajpixkauj ichkamej (1 Ped. 5:4). Uan moajsij ichkatajpianij akin kinyekpiaj sejsemej ichkamej itech panoua cien mil nechikolmej (Hech. 20:28). Keman tikinpaleuiaj akin taixyekanaj itech nechikol, tiknextiliaj Jiova uan Jesús ke tiktasojkamatij nochi tein kichiuanij tein ika techpaleuiaj.

19. ¿Keniuj okachi uelis timotokiskej se iuan okse?

¹⁹ Maj timotokikan se iuan okse. ¿Toni kijtosneki nejin? Keman tetauelitanij kinixnamikiaj se oloch tateuianij akin kuali tamachtilmej, yejuan okachi monetechouayaj se iuan okse. Ijkon amo kintakauiliayaj maj panokan taixnamikinij. Axkan Satanás okachi chikauak kiixnamiki ixolal Dios. Yejua ika okachi moneki maj amo timoteuijtokan, ta maj okachi timotokikan se iuan okse, maj tikintapojpoluikan akin mopolouaj uan maj titakuaujtamatikan itech itaixyekanalis Jiova.

20. ¿Toni moneki tikchiuaskej axkan?

²⁰ Tinochin moneki tiijsatoskej uan maj ‘tiknextikan ke tiksentokaj timochiaj’. Maj amo tiyolijsiuikan ta maj tikchiakan keman moijtos “onkak yolseuilis uan yekyetolis” uan keman nejon tokniuan senkis kinseliskej kemej taixpejpenalmej. Ompa, naui ángeles kimajkauaskej ejekat oso ixpoliuilis uan Ueyi Babilonia ixpoliuis. Axkan ke tikchixtokej maj mochiua nejon uejueyi taman, maj tikintakamatikan akin kinixtaliaj maj taixyekanakan itech inechikol Jiova. Maj timotokikan se iuan okse uan ijkon amo kalakis Satanás uan iamokuali ejekauan, uan maj tikchiuakan tein tayolmajxitij akin kijkuiloj Salmo: “Ximoyolchikauakan, uan maj chikauak nanmoyolo, nochin namejuan akin nankichiaj Jiova” (Sal. 31:24).