Xikchiuakan ijkon kemej kichiujkej tanauatianij: Miqueas
1. ¿Toni xa motajtanij Miqueas, uan keyej amo nenkaj tein kichiuak itech itanojnotsalis?
1 Xa timotajtanianij kemanian tamis nochi tein amo kuali tein mochiujtok. Xa tanauatijkej Miqueas no motajtanij nejon keman kinnejmachtiaya akin nemiaj itech altepemej Israel uan Judá ke Jiova kinixpoloskia. Maski ijkon amo nenkaj tein kichiuak. Itech xiuit 740 achto itech totonaluan, keman yejua nemiaok, Jiova kintatsakuiltij akin nemiaj Samaria ijkon kemej kijtojka (Miq. 1:6, 7). Satepan, itech xiuit 607, Jerusalén kiixpolojkej (Miq. 3:12). Uan tejuan, ¿keniuj uelis tikchiuaskej kemej Miqueas ijkon kemej tikchiaj maj Jiova kiixpolo tein amo kuali?
2. ¿Keyej moneki maj amo tiyolijsiuikan ijkon kemej tikchiaj itonal Jiova, uan toni kijtosneki nejon?
2 Maj amo tiyolijsiuikan. Miqueas kijkuiloj: “Nejua niksentokas nitachixtos itech Jiova. Yekmelauj niknextis ke niksentoka nikchia Dios akin nechmakixtia” (Miq. 7:7). Nejon amo kijtosneki ke amo teyi kichiujtoya, ta kisentokak tekitik kemej tanauatijkej. Tejuan no, maj tiksentokakan ‘tichipaukanemikan uan tikmouistilijtiyakan Diosʼ ijkon kemej tikchiaj itonal Jiova (2 Ped. 3:11, 12). Maj tikelnamikikan ke kemej Jiova ayamo kiualkui ixpoliuilis, nejon kinpaleuia taltikpakneminij maj moyolnonotsakan (2 Ped. 3:9). Yejua ika, kemej tanauatianij maj amo tiyolijsiuikan, ijkon kemej technauatia Biblia (Sant. 5:10).
3. ¿Keyej moneki maj nochipa tiktajtanikan Jiova iyektikatsin espíritu?
3 Maj titakuaujtamatikan ke Jiova techmakas chikaualis. Tekit tein kiselij Miqueas katka ouij, yejua ika kitemoj maj Jiova kiyolchikauani (Miq. 3:8). Jiova kimati ke tejuan no moneki tikpiaskej inepaleuil, uan Biblia techyoleua maj tiktajtanikan itech netataujtil. Komo tisiouij, yejuatsin senkis techyolchikaua uan ijkon uelis tikchiuaskej tekit tein techmaka (Sal. 84:5, 7; Is. 40:28-31). Timiakej tikitanij keniuj Jiova techyolchikauani keman tipeujkej tiktekitiliaj uan hasta axkan. Yejua ika, maj nochipa tiktajtanikan iyektikatsin espíritu (Luc. 11:13).
4. ¿Toni tel kuali neskayot techkauilij Miqueas?
4 Miqueas kiitak ke okachi monekia kichiuas itanejnekilis Jiova. Kiixtalij amo kikauas Dios maski mochiuaya tein tel amo kuali itech itonaluan. Axkan mojmostaj moneki tiknextiskej ox ajsitok totaueyichiualis iuan Dios. Yejua ika, maj senkis tikixtalikan “tinentinemiskej itech itokay Jiova toDios nochi tonalmej uan nochipaya” (Miq. 4:5).