Amo ximokauakan maj namechtapololtikan

1, 2. ¿Keyej axkan okachi miakej takajkayauaj, uan keniuj momoyaua nejon takajkayaualis? (Xikonita taixkopin ipeujyan tamachtilis.)

ITECH nejin taltikpak kampa tinemij, okachi miakej takajkayauaj. Nejin maj amo tikmoujkaitakan, porin Biblia kiyekijtoua ke Amokuali, akin taixyekantok nikan taltikpak, tel kuali takajkayaua (1 Tim. 2:14; 1 Juan 5:19). Ijkon kemej motokijtiuj itamilis tein amo kuali tein mochiujtok itech taltikpak, Satanás okachi kualani porin “kimati ke amo kipia ok miak tonalme” (Apoc. 12:12). Yejua ika, akin mokauaj maj kinixyekana okachi takajkayauaj uan kinekij tetapololtiskej. Okachi kinekij kintapololtiskej akin kitekitiliaj Dios akin melauak.

² Keman itech televisión, periódico uan Internet ininka tajtouaj itaixpantijkauan Jiova uan tein kineltokaj, kemansa kijtouaj seki taman tein amo nochi melauak oso tein senkis takajkayaualis. Yejua ika, sekin mokuejmolouaj oso hasta kualanij porin kineltokaj nejon tein amo melauak.

3. ¿Toni techpaleuis maj amo timokauakan maj techtapololtikan?

³ Tiktasojkamatij maj ueli tikixtopeuakan itakajkayaualis Amokuali tein taijtakoua, porin tikpiaj iTajtol Dios tein ‘uelis se kuitinemis para [...] ika [se] tayolmelautiyas’ (2 Tim. 3:16). Tein tatitanil Pablo kiniluij tokniuan akin nemiaj Tesalónica, kinextia ke sekin mokaujkaj maj kintapololtikan keman kineltokakej tein amo melauak. Pablo kijkuiloj: “Amo ximotekauilikan ke ma aksa eliuis namechtamachilispapata [oso namechtapololti]” (2 Tes. 2:1, 2). ¿Toni techmachtia tein kinnejmachtij ika netasojtalis, uan keniuj uelis techpaleuis axkan?

MOTEMAKAK TANEJMACHTILIS KEMAN MONEKIA

4. 1) ¿Keniuj kinnejmachtijkej ika itonal Jiova tokniuan akin nemiaj Tesalónica? 2) ¿Keniuj technejmachtiaj axkan?

⁴ Itech yekinika amat tein Pablo kinijkuilouilij tokniuan akin nemiaj Tesalónica, kinnejmachtij ke ualaskia itonal Jiova. Yejua amo kinekia maj tokniuan moajsinij itech “tayouayanilot” nion maj amo kichixtonij nejon tonal. Yejua ika kinelnamiktij ke kemej yejuan katkaj “keme se tanextsin”, monekia tachixtoskej. Kiniluij: “Moneki ma tiijsatokan uan ma tikuatamatkanentinemikan” (xikonixtajtolti 1 Tesalonicenses 5:1-6). Itech nejin tonalmej tikchiaj maj ixpoliui Ueyi Babilonia, oso nochi taneltokalismej tein amo melaujkej tein moajsij itech nochi taltikpak. Ika nejin tachiualis peuas iueyi tonal Jiova. Axkan okachi kuali tikajsikamatij keniuj Dios kichiuas itanejnekilis. Uan no, itech nechikol nochipa tikseliaj tanejmachtilis keman moneki tein techpaleuia maj tikchixtokan nejin tonal. Komo tiknejmachkakij nejon tanejmachtilis, okachi tiknejnekiskej tiktekitiliskej Jiova uan ‘tiktekitiltiskej totanemilil’ (Rom. 12:1, TNM).

5, 6. 1) ¿Toni ika tajtoj Pablo itech ojpatika amat tein kinijkuilouilij tokniuan akin nemiaj Tesalónica? 2) ¿Toni kichiuas Dios amo uejkaua itechkopa Jesús? 3) ¿Toni moneki timotajtaniskej?

⁵ Tepitsin satepan ke Pablo kintitanilij yekinika amat tokniuan akin nemiaj Tesalónica, kinijkuilouilij okse. Itech nejin ojpatika amat ika tajtoj tajyouilis tein ualas keman toTekotsin Jesús kinualkuilis itatsakuiltilis Dios “nochi nekes ten amo moteixmatiltijke iuan Dios. Yejuan nojonkes amo kitakamatke in yankuik Tajtoltsin de Cristo” (2 Tes. 1:6-8). Itech capítulo 2 tein kipia nejon amat, kinextia ke sekin tokniuan mokaujkaj maj kinmojmoujtianij uan kineltokakej ke itonal Jiova amo uejkaok moajsia (xikonixtajtolti 2 Tesalonicenses 2:1, 2). Tokniuan itech nejon tonalmej amo senkis kiajsikamatiaj keniuj mochiuaskia itanejnekilis Dios. Tein melauj, keman Pablo ika tajtoj tein achtook moijtoua toni panos, kijtoj: “Tejuan tikajsikamatij seki san tamachilis de Dios uan no sayo ika tepitsin san tikselijtinemij tanauatil ten Dios nechmaktilia para tikinnojnotstinemi ika in Tajtoltsin de Dios. Pero ne tonal kuak nochi tikajsikaixmatiske in tamachilis de Dios, ijkuakon nochi in tejtepitsitsin ten tikmatinemiaj nochi nojon pojpoliuis” (1 Cor. 13:9, 10). Maski ijkon, uelik kipiakej se chikauak takuaujtamatilis porin Dios kinnejmachtij ika tein kijkuilojkej Pablo, Pedro uan oksekin tokniuan taixpejpenalmej akin amo kikaujkej Dios.

⁶ Kemej Pablo kinekia maj tanemilikan kemej moneki, kimelauak ke achto ke ualaskia itonal Jiova, moajsiskiaj sekin akin kikauaskiaj uan kiixnamikiskiaj tamachtilis tein melauak uan nesiskia tein yejua kitokaytij “ne ueyi tamajkaual tagat”.a Satepan, itech tonal tein ixyetok, toTekotsin Jesús “kitamiuejuelos[kia]” “ne ueyi tamajkaual tagat” uan nochin akin kinkajkayauas. Pablo kinextij keyej ixpoliuiskej: “Amo kinekke kitasojtaske ne melauak Tajtoltsin de Dios” (2 Tes. 2:3, 8-10). Yejua ika, kuali komo timotajtaniaj: “¿Niktasojta tamachtilis tein melauak? ¿Nimomachtia nejin amaix uan okseki amaixmej tein kinmakaj itekitikauan Jiova akin moajsij noyampa taltikpak uan ijkon nikpias yankuik taajsikamatilis ika tein kijtoua Biblia?”.

MAJ KUALI TIKINIXPEJPENAKAN AKIN INIUAN TIMOUIKAJ

7, 8. 1) ¿Toni taman tein tamouilil ika moixnamikiaj tokniuan ne uejkauj? 2) ¿Toni taman tein tamouilil ika timoixnamikij axkan akin tikchiuaj kemej Cristo?

⁷ Akin kichiuayaj kemej Cristo amo sayoj ueliskia kinijtakos inintamachtilis akin kikauaj uan kiixtopeuaj tamachtilis tein melauak, ta no moixnamikiskiaj ika okseki taman. Pablo kijkuilouilij Timoteo ke “itanejnekilis de tomin kichiua ma onka miak tataman ten amo kuali tachiualisme”. Uan no kinextij ke ika nejon tanejnekilis “sekin kipolojke nintakuautamatilis uan motajyouiltikoj ika miak tataman ouijkayome” (1 Tim. 6:10). Okse taman tein no tamouilil yejua “totanejnekilis ten kuika tajtakol” (Gál. 5:19-21).

⁸ Sayoj ke ueli tikajsikamatij keyej Pablo kintelnejmachtij akin nemiaj Tesalónica maj amo mosentilianij iniuan takamej akin kintokaytij “amo melau tanojnotsani de Cristo”. Itech nechikol moajsiaj akin tajtouayaj “ika xolopijyot san, sayo para ma nochi in taneltokani” kintojtokanij (2 Cor. 11:4, 13; Hech. 20:30). Satepan, Jesús kiniluij tokniuan akin nemiaj Éfeso ke kuali tein kichiuayaj porin amo kinseliayaj “nekes ten kichiutinemij sayo ten amo kuali chiualisme”. Nejin tokniuan kiitakej tein tamachtiayaj uan kiajsikej ke katkaj “xolopijme san” (Apoc. 2:2). Itech ojpatika amat tein kinijkuilouilij tokniuan akin nemiaj Tesalónica, semi tetanemililtia tein kijtoj: “Uan namejuan, tokniuan, tamechnajnauatiaj ika itenkopa Totekotsin Jesucristo ke ximosekokauakan de ne taneltokani ten kinekij sayo tatsiukanemiske”. Satepan ininka tajtoj tokniuan akin “amo kinekiske tekitiske” (2 Tes. 3:6, 10). Komo monekia maj amo iniuan mosentilianij akin amo kinekiaj tekitiskej, ¡okachi monekia maj amo iniuan mouikanij akin peuayaj monejnemiltiayaj kemej akin kikauaj uan kiixnamikij tamachtilis tein melauak! Semi tamouilil katka maj iniuan mosentilianij uan monekia senkis kinixtopeuaskej. Uan no ijkon panoua axkan (Prov. 13:20).

9. ¿Keyej moneki timoyekpiaskej keman aksa peua ika tajtoua seki taman tein Biblia amo kimelaua oso kinijijtoua akin pouij itech inechikol Dios?

⁹ Okachi ueyi tajyouilis uan itamilis tein amo kuali tein mochiujtok nikan taltikpak amo uejkaua ejkos, yejua ika tanejmachtilis tein kinmakakej tokniuan itech yekinika siglo, okachi moneki axkan. Tejuan amo tiknekij maj “nenkajtitiu san [...] teiknelilis de Dios” tein tikseliaj, porin uelis tikpoloskej nemilis nochipaya, yeski iluikak oso nikan taltikpak (2 Cor. 6:1). Komo aksa akin youi nechikolmej kemansa kineki maj iuan titajtokan ika seki taman tein Biblia amo kimelaua oso peua kinijijtoua akin pouij itech inechikol Jiova, moneki maj timoyekpiakan (2 Tes. 3:13-15).

“XIKTAKAMATIYAKAN [...] TEN TAMECHNEXTILIJKE”

10. ¿Toni tamachtilismej monekia maj amo kikauanij tokniuan akin nemiaj Tesalónica?

¹⁰ Pablo kinyolmajxitij tokniuan akin nemiaj Tesalónica maj kisentokanij takuaujtamatinij uan maj amo kikauanij tein momachtijkaj (xikonixtajtolti 2 Tesalonicenses 2:15). ¿Katiyejua tamachtilismej kiselijkaj? Amo katka tamachtilis tein kiteixmatiltiaj akin pouij itech taneltokalis tein amo melauak uan tamachtiaj kemej yeskia ualeujtok itech Biblia. Pablo ika tajtojtoya tamachtilis tein Jesús kimatiltij yejua uan oksekin uan tein Dios ika ichikaualis kiolinij Pablo maj kitematiltiani, tein miak moijkuiloj itech Biblia. Pablo kiniluij tokniuan akin nemiaj Corinto ke kuali tein kichiujtoyaj. Kijtoj: “Namejuan nachipa nannechelnamiktinemij uan no [...] nankitakamatinemij nochi nijin neyolmajxitilisme ten namechmaktilijka ya” (1 Cor. 11:2). Nejin tamachtilismej kitemakaj Jiova uan Jesús akin nochipa kijtouaj tein melauak uan uelis itech se takuaujtamatis.

11. ¿Keniuj uelis mosekokauaskej iuan Jiova akin mokauaj maj kinkajkayauakan?

¹¹ Itech amat tein motokaytia Hebreos, Pablo kijtoj ke akin kichiua kemej Cristo uelis kipolos itakuaujtamatilis uan kikauas Jiova (xikonixtajtolti Hebreos 2:1; 3:12). Yejua ojpa kikuik tajtol “mosekokaua”. Onkak ome taman kemej uelis panos nejon. Se taman, uelis yeski yolik uan xa nion se kiitas keniuj panoua. Okse taman, uelis yeski ika totachiualisuan. Nejon ome taman kinpanouani akin mokauanij maj kinkajkayauakan uan kikauanij maj poliui inintakuaujtamatilis.

12. ¿Toni seki taman uelis kichiuas maj poliujtiuj tokuali uikalis iuan Jiova?

¹² Xa sekin tokniuan akin nemiaj Tesalónica mokaujkej maj kinkajkayauanij. ¿Uelis techpanos nejin axkan? Onkak miak taman tein uelis techtonalpololtis. Kemej neskayot, maj titanemilikan itech taltikpakneminij akin panouaj miak horas kichiujtokej teisa tein kiuelitaj, kiteltekitiltiaj redes sociales, motajkuilouiliaj iniuan oksekin itech tepos oso kitelitaj neauiltilis. Nejin tachiualismej uelis techtapololtis uan amo semi techyolpaktisok tikchiuaskej tein Dios kijtoua. Nejon uelis techuikas maj amo tikchiuakan netataujtilmej ika nochi toyolo, maj amo tiktayekanaltikan tonemachtil ika Biblia, nechikolmej uan tanojnotsalis. ¿Toni uelis tikchiuaskej tein techpaleuis maj amo techtapololtikan?

KENIUJ TIMOYEKPIASKEJ

13. 1) Ijkon kemej moijtojka achto, ¿keniuj tanemiliaj miakej taltikpakneminij? 2) ¿Toni techpaleuis maj tikyekpiakan totakuaujtamatilis?

¹³ Se taman tein techpaleuis maj tikyekpiakan totakuaujtamatilis, moneki maj tikelnamikikan ke tinentokej itamian tonalmej uan techijtakos komo timouikaj iniuan akin amo kinekij kineltokaskej nejon. Keman tatitanil Pedro ika tajtoj totonaluan kijtoj: “Monextikiue seki tamouiskapoloani ten kikejkeloaj in Tajtoltsin de Dios. Uan yejuan [akin] nentinemij ijkon keme nintanejnekilis [...] matajtaniske ijkuin: ‘¿Keye amo mochiua ya ijkon keme Cristo motenkauak touan de ke oksepa moualuikas?’ Uan no kijtoske ijkuin: ‘Touejkautatuan momikilijke ya uan desde ne tonal hasta axkan amo teyi tikitaj ten yankuik. Uan kachi no ijkon san desde ne tonalme kuak tsinpeuak in taltikpak’” (2 Ped. 3:3, 4). Motelneki maj tikixtajtoltikan uan maj timomachtikan Biblia mojmostaj, uan ijkon amo tikelkauaskej ke tinentokej itamian tonalmej. Ne uejkaujya peuak moajsij akin kikauaj uan kiixtopeuaj tamachtilis tein melauak, tein Biblia kijtojka ke moajsiskiaj, uan kisentoka hasta axkan. “Ne ueyi tamajkaual tagat” kisentoka kinixnamiki itekitikauan Dios. Yejua ika, moneki maj amo keman tikelkauakan ke itonal Jiova amo uejka yetok (Sof. 1:7).

14. ¿Keniuj komo nochipa titanojnotsaj techpaleuia maj amo timoijtakokan?

¹⁴ Se taman tein semi techpaleuis maj titachixtokan uan maj amo techkajkayauakan oso maj amo techtapololtikan yejua komo nochipa tikteixmatiltiaj kuali tanauatilmej. Keman Jesucristo, Taixyekankej itech nechikol, kinnauatij itatojtokakauan maj tapaleuianij maj mochiuakan imomachtijkauan itech nochi xolalmej uan maj kinmachtianij maj kitakamatikan tein yejua kinmachtijka, tein melauj, kinmakatoya se tekit tein kinpaleuiskia maj amo moijtakouanij yejuan (Mat. 28:19, 20). Moneki maj titanojnotsakan ika yolpakilis uan ijkon uelis tiktakamatiskej nejin tanauatil. ¿Xe tiknemiliaj ke tokniuan akin nemiaj Tesalónica tanojnotsayaj sayoj porin monekia kichiuaskej? Maj tikelnamikikan tein Pablo kiniluij: “Amo xiktsajtsakuilikan in tekit de Yektikatsin Espíritu tech namoyolijtik. Uan amo xikinixtopeutiyakan nekes tamachtiani ten namechnextilijtiyoue in tanauatil ten kiselijke de Dios” (1 Tes. 5:19, 20). Uan tein tikinixmatiltiaj oksekin semi techyolpaktia.

15. ¿Toni no uelis timomachtiskej keman titaueyichiuaj kemej kalyetouanij?

¹⁵ Tikyekmatij ke tinochin tiknekij tikinpaleuiskej tochankauan maj mochiuakan okachi kuali tanojnotsanij. Yejua ika, miakej tokniuan no kiixtaliaj momachtiskej keniuj tanojnotsaskej keman momachtiaj kemej kalyetouanij. Xa uelis timomachtiskej iniuan tochankauan keniuj uelis tikchiuaskej maj taltikpakneminij akin kuali techkakkej kinekikan kimatiskej okachi: ¿Toni ika titajtoskej keman oksepa tikinkalpanoskej? ¿Toni tamachtilis uelis kinyolnotsas? ¿Toni hora okachi uelis tikinkalpanoskej? Miakej tokniuan no kiixtaliaj momachtiskej tein moitas itech nechikolmej uan tein tanankiliskej. ¿No uelis ijkon tikchiuaskej? Keman titanankiliaj itech nechikolmej, totakuaujtamatilis mochikaua uan amo timokauaskej maj ijsiujka techtapololtikan (Sal. 35:18). Kemaj, taueyichiualis kemej kalyetouanij techpaleuia maj amo tiknekikan tikmelauaskej seki taman tein Biblia amo kimelaua uan maj amo tiomeyolouakan.

16. ¿Toni kinolinia tokniuan taixpejpenalmej maj kisentokakan kitekitiltikan inintanemilil uan maj amo kintapololtikan?

¹⁶ Ijkon kemej panouanij xiujmej, Jiova kintatiochiuiani itekitikauan maj okachi kiajsikamatikan uan maj kimelauakan tein achtook moijtojka itech Biblia. Komo titanemiliaj itech nejin, techpaleuia maj okachi titakuaujtamatikan ke tikseliskej se kualtsin netetayokolil. Tokniuan taixpejpenalmej kichiaj yetoskej iuan Cristo ompa iluikak. Nejon tel kualtsin nechialis kinolinia maj kisentokakan kitekitiltikan inintanemilil uan maj amo mokauakan maj kintapololtikan. Tikyekmatij ke no ijkon momachiliaj kemej Pablo kiniluij tokniuan akin nemiaj Tesalónica: “Nachipa moneki tiktasojkamachiliske Dios ika por namejuan, tokniuan, namejuan ten namechtasojta Totekotsin. Porin Totajtsin Dios namechijitak ya [...] porin in Yektikatsin Espíritu namechyolchipautiu uan porin namejuan nantaneltokatinemij ika ne melauak Tajtoltsin de Dios” (2 Tes. 2:13).

17. ¿Keniuj techyolchikaua tein kijtoua 2 Tesalonicenses 3:1-5?

¹⁷ Akin kichiaj nemiskej nochipaya nikan taltikpak moneki maj amo no mokauakan maj kinkajkayauakan. Komo tejuatsin tikonpia nejon nechialis, tikyekmatij ke mitsonyolchikauas tein Pablo kiniluij tokniuan taixpejpenalmej akin nemiaj Tesalónica (xikonixtajtolti 2 Tesalonicenses 3:1-5). ¡Tikteltasojkamatij nejon tajtolmej tein techyolchikauaj! Amamej tein kinijkuilouilijkej tokniuan akin nemiaj Tesalónica, technejmachtiaj maj amo tikakikan keman kijtouaj teisa tein Biblia amo kimelaua oso tanemililmej tein teomeyolotia. ¡Nejin tanejmachtilis techtelpaleuia axkan ke okachi motokia itamilis tein amo kuali!