NETAJTANILMEJ TEIN KISAJ ITECH BIBLIA
¿Uelis techpaleuiskej ángeles?
Ijkon kemej ne uejkauj, ángeles kipaleuijkej Daniel, se itekitikauj Dios, axkan kinpaleuiaj taltikpakneminij maj kiselikan tein kuali keman kiteixmatiltiaj iTajtol Dios
Miak xiujmej achto ke Dios kichijchiuaskia takat, kinchijchiuak tel miak ángeles (Job 38:4, 7). Nejin ángeles akin chikaujkej kitekitiliaj Dios. Kemansa, yejuatsin kintitani uan ijkon kinixyekana uan kinpaleuia akin tatakamatij (Salmo 91:10, 11). Axkan, ángeles kinpaleuiaj taltikpakneminij maj kiselikan tein kuali keman imomachtijkauan Jesús kiteixmatiltiaj iTajtol Dios. (Xikonixtajtolti Apocalipsis 14:6, 7.)
¿Moneki tikintataujtiskej ángeles maj techpaleuikan? Amo; netataujtil se taman tein ika titaueyichiuaj, uan sayoj moneki tikueyichiuaskej Dios (Apocalipsis 19:10). Kemej ángeles kitekitiliaj Dios, yejuan kitakamatij tein yejuatsin kinnauatia, amo tein tajtanij taltikpakneminij. Yejua ika, nochipa moneki tiktataujtiskej Dios itokaykopa Jesús. (Xikonixtajtolti Salmo 103:20, 21 uan Mateo 26:53.)
¿Moajsij ángeles akin amo yolkualmej?
Ijkon kemej taltikpakneminij, ángeles kinchijchiujkej maj uelikan kiixpejpenakan kichiuaskej tein kuali uan tein amo kuali. Tetayokoltij tikijtoskej ke miakej kiixpejpenkej amo kitakamatiskej Dios (2 Pedro 2:4). Yekinika ángel akin kiixnamikik Dios yejua Satanás; oksekin no ijkon kichiujkej uan mokepkej amokuali ejekamej. Amo kichiua miak xiujmej, nochin yejuan kinualpantamotkej nikan taltikpak. (Xikonixtajtolti Apocalipsis 12:7-9.)
Itech xiuit 1914 hasta axkan, neteuilis uan tein amo kuali okachi mochiuani kemej amo keman. Nejon kinextia ke amo uejkaua Dios kiixpolos Satanás uan iamokuali ejekauan, uan kichiuas maj taltikpak mokepa se xochital. (Xikonixtajtolti Apocalipsis 12:12 uan 21:3, 4.)