TAMACHTILIS ITECH IPEUJYAN AMAIX | ÁNGELES. ¿YEKMELAUJ NEMIJ? ¿TECHPALEUIAJ?
¿Keniuj uelis techpaleuiskej ángeles?
Ángeles akin amo kikauaj Dios semi toka motekipachouaj uan senkis kichiujtokej itanejnekilis Jiova. Keman Dios kichijchiuak taltikpak, ángeles “senoloch tsajtsikej ika yolpakilis uan nochin ikoneuan Dios peuak kiueyichiuaj ika tajtol chikauak” (Job 38:4, 7). Ijkon kemej panouanij xiujmej, ángeles kinekinij kiajsikamatiskej tein achto moijtojka ke mochiuas nikan taltikpak (1 Pedro 1:11, 12).
Biblia kinextia ke ángeles kemansa kinyekpianij itekitikauan Dios uan ijkon mochiuas itanejnekilis (Salmo 34:7). Maj tikitakan tein kichiujkej.
Keman Jiova kiixpoloj xolal Sodoma uan Gomorra kampa senkis kichiuayaj tein amo kuali, ángeles kipaleuijkej Lot akin yolmelauak uan ichankauan maj cholouanij (Génesis 19:1, 15-26).
Ne uejkauj ompa Babilonia, Dios “kiualtitanik iángel uan kinmakixtij itekitikauan”, eyi telpochmej hebreos akin kinpantamotkej itech se ueyi tikomit kampa momikiliskiaj (Daniel 3:19-28).
Daniel se itekitikauj Dios amo teyi kipanok satepan ke moajsik se youal iniuan tekuanimej tein tel mayantoyaj. Yejua kimelauak ke Dios “kiualtitanik iángel uan kintentsakuak tekuanimej” (Daniel 6:16, 22).
Ángeles tapaleuiaj maj moteixmatilti kuali tanauatilmej semanauak taltikpak
ÁNGELES KINPALEUIJKEJ YEKINIKA IMOMACHTIJKAUAN CRISTO
Keman monekia mochiuas itanejnekilis Jiova itech nechikol kampa kichiuayaj kemej Cristo itech yekinika siglo, yejuatsin kinualtitania ángeles maj tapaleuikij. Maj tikitakan tein kichiujkej.
Se ángel kitapoj puertas kampa tsaktoyaj imomachtijkauan Cristo uan kiniluij maj kisentokakan kiteixmatiltikan iTajtol Dios itech templo (Hechos 5:17-21).
Se ángel kinauatij Felipe akin kiteixmatiltiaya iTajtol Dios, maj yani itech se ojti tein teuikaya Jerusalén hasta Gaza uan maj kinojnotsani ika iTajtol Dios se takat akin kayot Etiopía akin yajka Jerusalén kiueyichiuato Dios (Hechos 8:26-33).
Keman Dios kiitak ke monekia maj akin amo judíos mochiuakan imomachtijkauan Cristo, kichiuak maj se ángel monexti iixpan Cornelio akin katka romano uan kinyekanaya 100 tateuianij uan kiluij maj kiyoleuani ichan Pedro, se imomachtijkauj Jesús (Hechos 10:3-5).
Se ángel monextij iixpan Pedro uan kikixtij kampa tsaktoya (Hechos 12:1-11).
KENIUJ UELIS TECHPALEUISKEJ ÁNGELES
Nion se taman kinextia maj itech totonaluan Dios kichiua uejueyi taman tein ika techpaleuia inintechkopa ángeles, ijkon kemej kichiuak ne uejkauj. Sayoj ke, Jesús kijtoj tein mochiuaskia itech totonaluan: “Nejin kuali tanauatilmej ika tekiuajyot motetapouis semanauak taltikpak kampa nemij uan ijkon nochin kimatiskej; uan ompa ejkos tamilis” (Mateo 24:14, TNM). ¿Tikonmatia ke yejuan ángeles akin kiixyekanaj nejin tekit?
Ne uejkauj uan hasta axkan ángeles kinpaleuianij akin amo kikauaj Dios
Amatajkuilol Apocalipsis oso Revelación kinextia ke ángeles senkis tapaleuiskiaj maj nochin akin nemij noyampa taltikpak kiixmatikan Jiova uan tein yejuatsin kiixtalijtok kichiuas nikan taltikpak. Juan, se imomachtijkauj Jesús, kijkuiloj: “Nikitak okse ángel patantinemi ne ejekaixko. Uan nojon ángel kipixtinemik ne Tajtoltsin de Dios ten kualkui ne nemakixtilis uan ne Tajtoltsin amo keman ixpoliuis. Uan nojon ángel tanojnotstinemia intsalan nochi in taltikpakyetoni uan intsalan nochi paísme [...] tataman tagayot [...] tataman pueblojuani uan intsalan [...] ten tajtoaj ika tataman tajtolis. Uan [...] kinchikaukailiaya ijkuin: ‘Xikmouistilikan Totajtsin Dios uan xikmouiskapouakan Yejuatsin porin ejkok ya in tonal kuak Yejuatsin namechixkomakas namejuan nantaltikpakuani. Uan xikmouistilikan Yejuatsin ten kichijchiuak in eluiyaktsinko uan in taltikpak uan nochi at den mar uan nochi in amelmeʼ” (Apocalipsis 14:6, 7). Seki taman tein miakej kipanouanij kinextia ke ángeles senkis tapaleuijtokej maj moteixmatilti iTajtol Dios noyampa taltikpak. Uan no, keman se akin tajtakolchiua moyolkokoua ika tein kichiuak uan mokepa iuan Jiova, ángeles semi yolpakij (Lucas 15:10).
¿Toni panos keman amo moteixmatiltisok iTajtol Dios? Tel miakej ángeles tateuiskej iuan Jesucristo, Tekiuaj akin okachi ueyi ke oksekin tekiuanij, itech “guerra iuan Dios tech ne ueyi tonal” tein itokay Armagedón keman Jiova akin kipia nochi chikaualis kinteuis akin kiixnamikij (Apocalipsis 16:14-16; 19:14-16). Ángeles akin semi chikaujkej kichiuaskej tein Dios kiixtaliani keman Jesucristo “kintatsakuiltis nochi nekes ten [...] amo kitakamatke in yankuik Tajtoltsin de Cristo ten kualkui ne nemakixtilis” (2 Tesalonicenses 1:7, 8).
Yejua ika, senkis xikonmati ke ángeles moka motekipachouaj uan senkis kintekipachoua tein kipanouaj akin kinekij kitekitiliskej Dios. Kemej tikitanij, Jiova miakpa kinyolchikauani uan kinyekpiani itekitikauan akin moajsij nikan taltikpak inintechkopa ángeles (Hebreos 1:14).
Yejua ika, tisejsemej moneki tikixpejpenaskej se taman tein motelneki: ¿tikakiskej uan tikseliskej kuali tanauatilmej tein moteixmatiltijtok noyampa taltikpak? Itaixpantijkauan Jiova ika miak pakilis mitsonpaleuiskej xikonseli nepaleuil tein iángeluan Dios kitemakaj ika netasojtalis.