Maj tikchiuakan tein kichiuaj ángeles

1, 2. 1) ¿Keyej amo titamatij kemej ángeles? 2) ¿Toni tein kichiuaj ángeles no tikchiuaj tejuan?

TINOCHIN akin tipouij iniuan ichankauan Jehová, timotasojtaj uan tikueyichiuaj. Itech nejon kalyetonij amo sayoj pouij miakej tokniuan itech nochi taltikpak, ta no millones de ángeles (Dan. 7:​9, 10). Keman ininka titanemiliaj ángeles, xa tiknemiliaj keniuj tel tamamej ke tejuan porin yejuan ipa nemiajya achto ke tinemiskiaj (Job 38:​4, 7). Ángeles okachi chikaujkej, senkis chipaujkej uan nochipa kichiuaj tein kuali yetok, amo kemej tejuan porin tejuan titajtakolejkej (Luc. 9:26).

² Sayoj ke maski amo titamatij kemej ángeles, seki taman tein kichiuaj no tikchiuaj tejuan. Ijkon kemej ángeles, tejuan no ueli tiknextiaj seki taman tein Jehová kinextia, uan ueli toselti titaixpejpenaj. Ángeles no kipiaj inintokay uan tatamamej, uan no kipiaj tataman tekit para kitekitiliskej Jehová. Uan ijkon kemej yejuan kichiuaj, tejuan no tiknekij tikueyichiuaskej toDios akin techchijchiuak (1 Ped. 1:12).

3. ¿Toni techmachtia tein kichiuaj ángeles?

³ Seki taman tein kichiuaj ángeles tejuan no tikchiuaj, yejua ika uelis techyolchikauas uan techmachtis miak taman. Itech nejin tamachtilis tikitaskej keniuj ijkon kemej kichiuaj ángeles, tejuan no uelis amo timoueyimatiskej, titetasojtaskej, titaxikoskej uan titapaleuiskej maj itech nechikol amo onka nion teyi tein uelis taijtakos.

ÁNGELES AMO MOUEYIMATIJ

4. 1) ¿Keniuj kinextiaj ángeles ke amo moueyimatij? 2) ¿Keyej ángeles amo moueyimatij? (Salmo 89:7).

⁴ Ángeles amo moueyimatij. Maski yejuan ueli kichiuaj miak taman uan semi tamatinij uan chikaujkej, nochipa kitakamatij Jehová (Sal. 103:20). Amo moueyimatij keman kichiuaj tein Jehová kinnauatia uan amo kikuij ininchikaualis para maj oksekin kinueyitalikan. Kichiuaj tein yeski taman tein Jehová kinnauatia maski oksekin amo keman kimatiskej keniuj monotsaj (Gén. 32:​24, 29; 2 Rey. 19:35).a Amo mokauaj maj kinueyitalikan porin kimatij ke sayoj Jehová kinamiki nejon. ¿Keyej ángeles amo moueyimatij? Porin semi kitasojtaj Jehová uan semi kipoujkaitaj (xikonlero Salmo 89:7).

5. ¿Keniuj kinextij se ángel ke amo moueyimatia keman kitakaualtij tatitanil Juan? (No xikonita taixkopin).

⁵ Maj tikitakan tein panok ne uejkauj tein kinextia ke ángeles amo moueyimatij. Kemej itech xiuit 96 se ángel akin amo tikmatij keniuj monotsa, kichiuak maj tatitanil Juan kiita se taman tein se kimojkaita (Apoc. 1:1). Keman Juan kiitak nejon, moixpiloj para kiueyichiuas ángel. Sayoj ke yejua niman kitakaualtij uan kiluij: “¡Amo! ¡Amo xikchiua nejon! ¡Xikueyichiua Dios! Porin nejua sayoj niitakeual Dios ijkon kemej tejua uan mokniuan” (Apoc. 19:10). ¡Nejin ángel nion tepitsin moueyimatia! Amo kinekia maj kiueyichiuanij nion maj kiueyitalianij uan niman kiyolchikauak Juan maj kiueyichiuani sayoj Jehová. Amo no kinemilij ke katka okachi ueyichiujkej ke Juan. Maski yejua okachi miak xiujmejya kitekitilijtoya Jehová uan okachi chikauak katka ke tatitanil Juan, amo moueyimatik uan kiluij: “Nejua sayoj niitakeual Dios ijkon kemej tejua”. Uan maski ángel monekik kimelauas Juan akin xiuejya katka, amo kiajuak ta kuali kinojnotsak. Ángel xa kiajsikamatik ke Juan kimojkaitak tein kiitak uan yejua ika moixpilojka.

6. ¿Keniuj no uelis tikchiuaskej kemej ángeles uan amo timoueyimatiskej?

⁶ ¿Keniuj no uelis tikchiuaskej kemej ángeles uan amo timoueyimatiskej? Komo amo timoueyimatij keman tikchiuaj tein technauatiaj nion tiknextiaj ke tel kuali tikchiuaj teisa (1 Cor. 4:7). Amo no moneki tiknemiliskej ke okachi tiueyichiuanimej ke oksekin porin miak xiujmejya tiktekitilijtokej Jehová oso porin techmakanij okseki tekimej. Komo tikpiaj okachi tekimej itech inechikol Dios, moneki maj okachi tiyolyemankej (Luc. 9:48). Ijkon kemej kichiuaj ángeles, tejuan no tiknekij tikinpaleuiskej oksekin uan amo tiknekij maj kinemilikan ke okachi tiueyichiuanimej.

7. Keman tikmelauaj oso tikyolmajxitiaj aksa, ¿keniuj uelis tiknextiskej ke amo timoueyimatij?

⁷ Amo no moneki maj timoueyimatikan keman tikmelauaskej oso tikyolmajxitiskej se tokniuj oso tokoneuan. Kemansa xa monekis tikiluiskej aksa ke amo kuali tein kichiujtok. Sayoj ke ijkon kemej ángel kinextilij Juan ke kitasojtaya keman kimelauak, tejuan no uelis ijkon tikchiuaskej para amo titeyolkokoskej. Komo amo tiknemiliaj ke okachi tiueyichiuanimej ke oksekin, techpaleuis maj tikintasojtakan uan tikinpoujkaitakan keman tikinyolmajxitiskej ika Biblia (Col. 4:6).

ÁNGELES TETASOJTAJ

8. 1) Kemej kijtoua Lucas 15:​10, ¿keniuj tikmatij ke ángeles tetasojtaj? 2) ¿Keniuj techpaleuiaj keman titanojnotsaj? (No xikonita taixkopin).

⁸ Ángeles kiitaj tein techpanoua uan amo kinemiliaj ke tejuan amo teyi tichiuanimej, ta yejuan techtasojtaj. Yolpakij keman se akin tajtakolchiujka moyolpata, oso aksa akin amo kitekitiliayaok Jehová oksepa peua kitekitilia. Uan no yolpakij keman aksa kiixmati Dios uan kiixtalia kitekitilis (xikonlero Lucas 15:10). Ángeles no techpaleuiaj keman titanojnotsaj (Apoc. 14:6). Maski amo uelij tajtouaj iuan aksa, techpaleuiaj maj tikinajsikan akin kinekij kiixmatiskej Jehová. Sayoj ke amo ueli senkis tikijtouaj ke yejuan techpaleuijkej maj tikajsikan aksa, porin Jehová no ueli kikui ichikaualis para kinpaleuis oksekin oso para techixyekanas maj tikinajsikan (Hech. 16:​6, 7). Jehová semi kinkui ángeles, yejua ika keman titanojnotsaj ueli tikmatij ke yejuan techpaleuiaj maj tikchiuakan nejin tekit. (Xikonita recuadro “Kinnankilijkej ininnetataujtiluan”).b

9. ¿Keniuj no uelis titetasojtaskej ijkon kemej kichiuaj ángeles?

⁹ ¿Keniuj no uelis titetasojtaskej ijkon kemej kichiuaj ángeles? Keman itech nechikol motanauatis ke aksa oksepa itaixpantijkauj Jehová, no uelis tiyolpakiskej ijkon kemej ángeles. Maj tiknextilikan tokniuj ke tiktasojtaj uan ke semi tiyolpakij porin oksepa kitekitilijtok Jehová (Luc. 15:​4-7; 2 Cor. 2:​6-8). No tikchiuaj kemej ángeles keman timochikauaj titanojnotsaskej (Ecl. 11:6). Ijkon kemej yejuan techpaleuiaj keman titanojnotsaj, tejuan no moneki tiktemoskej tikinpaleuiskej tokniuan keman tanojnotsaj. Xa ueliskia iuan titanojnotsaskej se tokniuj akin yankuixtok peuak tanojnotsa. Oso no ueliskia tikpaleuiskej maj tanojnotsa se tokniuj akin xiuejya oso akin mokokoua.

10. ¿Toni techmachtia tein kipanok Sara?

¹⁰ ¿Uan toni uelis tikchiuaskej komo amo ueliok tiktekitiliaj Jehová kemej tiknekiskiaj? Maski ijkon, ipa uelis titekitiskej iniuan ángeles para maj motanojnotsa. Maj tikitakan tein kipanok Sara,c se tokniuj akin nemi India. Yejua kemej 20 xiujmej katka precursora, sayoj ke kokolispeuak uan amo ueliaok nejnemia nion meuaya. Maski semi motayokoltiaya, peuak oksepa yolpaki porin tokniuan kipaleuiayaj uan no porin kiixtajtoltiaya Biblia. Sayoj ke no monekik kitemos keniuj oksepa uelis tanojnotsas. Kemej nion uelia motaliaya para kichijchiuas cartas, sayoj uelia tanojnotsaya ika teléfono. Yejua ika kinnotsaya akin achto kinkalpanouaya, uan yejuan kiluiayaj ke oksekin no kinekiaj momachtiskej Biblia. Uan seki metsti satepan, Sara peuak kinmachtia 70. Yejua iselti amo ueliskia kinmachtis nochin, yejua ika kiniluij seki tokniuan itech nechikol maj kinmachtikan sekin. Uan miakej akin kinmachtijtokej yajtokej nechikolmej. Tikmatij ke ángeles semi yolpakij porin ueli tekitij iniuan tokniuan kemej Sara akin semi mochikauaj tanojnotsaskej.

ÁNGELES TAXIKOUAJ

11. ¿Keniuj ángeles kinextianij ke taxikouanij miak xiujmejya?

¹¹ Ángeles technextiliaj keniuj moneki titaxikoskej. Miak xiujmejya kiitanij keniuj mochiua tein amo kuali, maski ijkon kisentokaj taxikouaj. Kiitakej keniuj Satanás uan tel miakej ángeles akin iniuan kitekitiliayaj Jehová kiixnamikkej (Gén. 3:1; 6:​1, 2; Jud. 6). Biblia ika tajtoua se ángel akin miak tonalmej moteuij iuan se amokuali ejekat tein semi chikauak katka (Dan. 10:13). Uan no, desde ke nemiaj Adán uan Eva, ángeles kiitanij ke tel miakej amo kitekitilianij Jehová. Maski ijkon, yejuan amo kikauaj Jehová uan kisentokaj kitekitiliaj uan yolpakij. Kimatij ke Dios kiixtalijya kemanian kiixpolos nochi tein amo kuali.

12. ¿Toni uelis techpaleuis maj titaxikokan?

¹² ¿Keniuj no uelis titaxikoskej kemej kichiuaj ángeles? Xa tejuan no tikitaj ke mochiujtok tein amo kuali oso techixnamikij, sayoj ke no tikmatij ke Dios kiixtalijya kemanian kiixpolos nochi tein amo kuali. Yejua ika ijkon kemej ángeles, “maj tiksentokakan tikchiujtokan tein kuali” (Gál. 6:9). Uan no, Jehová motenkaua ke techpaleuis maj titaxikokan (1 Cor. 10:13). Uelis tiktajtaniskej Dios maj techmaka ichikaualis tein techpaleuis maj amo tiyolijsiuikan uan maj tiyolpakikan (Gál. 5:22; Col. 1:11). ¿Toni uelis tikonchiuas komo mitsonixnamikij? Semi xiontakuaujtamati iuan Jehová uan amo xionmoui. Yejua amo keman mitsonkauas uan mitsonchikauas (Heb. 13:6).

ÁNGELES TAPALEUIAJ MAJ ITECH NECHIKOL AMO YETOKAN AKIN UELIS TAIJTAKOSKEJ

13. ¿Toni tekit kichiuaj ángeles itech nejin tonalmej keman tatamitiya? (Mateo 13:​47-49).

¹³ Itech nejin tonalmej keman tatamitiya, Jehová kinmakak ángeles se tekit tein semi moneki (xikonlero Mateo 13:​47-49). Tel miakej akin nemij noyan kiuelkakij kuali tanauatilmej. Sekin mopataj para nemiskej kemej Jehová tanauatia uan peua kitekitiliaj, sayoj ke oksekin amo ijkon kichiuaj. Ángeles ‘kinxelouaj akin amo yolkualmej uan akin yolmelaujkej’. Ijkon tapaleuiaj maj itech nechikol amo yetokan akin uelis taijtakoskej. Nejin amo kijtosneki ke komo aksa kikauak Jehová oso amo kinekik kitekitilis, amo keman oksepa uelis mokepas. Amo no kijtosneki ke amo keman tikpiaskej kuejmolmej itech nechikol. Maski ijkon, tikmatij ke ángeles semi tekitij para tapaleuiskej maj itech nechikolmej amo yetokan akin uelis taijtakoskej.

14, 15. ¿Keniuj no uelis tikchiuaskej kemej ángeles uan titapaleuiskej maj itech nechikol amo onka nion teyi tein taijtakos? (No xikonita taixkopimej).

¹⁴ ¿Keniuj no uelis tikchiuaskej kemej ángeles uan titapaleuiskej maj itech nechikol amo onka nion teyi tein uelis taijtakos? Moneki timochikauaskej tiksentokaskej kuali timouikaskej iuan Jehová. Uan ijkon tikchiuaj keman sayoj iniuan timouikaj akin kitasojtaj uan keman amo tikchiuaj nion teyi tein uelis ika tikyolkokoskej. Ijkon titapaleuiaj maj itech nechikol amo onka nion teyi tein uelis taijtakos (Sal. 101:3). No uelis tikinpaleuiskej tokniuan maj amo keman kikauakan Jehová. Maj tiknemilikan nejin, ¿toni uelis tikchiuaskej komo tikmatij ke se tokniuj tajtakolchiuak? Kemej tiktasojtaj, tikyolchikauaskej maj iniuan tajto tayekananij. Komo amo kichiua, tejuan monekiskia tikiniluiskej tein panok. Tiknekij maj niman kipaleuikan nejon tokniuj akin amo semi kuali mouikaok iuan Jehová (Sant. 5:​14, 15).

¹⁵ Sayoj ke sekin akin semi tajtakolchiuaj ipa moneki kinkalankixtiskej de nechikol. Keman ijkon panoua, amo timouikajok iniuan (1 Cor. 5:​9-13).d Nejin tein moixtalij maj mochiua, tapaleuia maj itech nechikol amo onka nion teyi tein uelis taijtakos. Uan no, keman amo timouikajok iniuan, tiknextiaj ke tiknekij tikinpaleuiskej. Jehová technauatia maj amo timouikakanok iniuan, uan keman tiktakamatij tikinpaleuiaj maj kiajsikamatikan ke moneki iuan mokepaskej. Keman mokepaj, semi tiyolpakij ijkon kemej Jehová uan ángeles (Luc. 15:7).

16. ¿Keniuj uelis tionmochikauas tikonchiuas kemej ángeles?

¹⁶ Semi kualtsin maj Jehová kinkaua ángeles maj techmachtikan uan maj iniuan titekitikan. Maj timochikauakan titapaleuiskej ijkon kemej yejuan uan maj amo timoueyimatikan, maj tikintasojtakan oksekin, maj titaxikokan uan maj titapaleuikan itech nechikol para maj amo onka nion teyi tein uelis taijtakos. Komo tikchiuaj kemej ángeles, tejuan no uelis tipouiskej iniuan ichankauan Jehová uan tikueyichiuaskej nochipaya.