Tein tajtanij akin taixtajtoltiaj
¿Akonimej “ángeles taijitalmej” tein ininka motajtoua itech 1 Timoteo 5:21?
Tatitanil Pablo kitajkuilouilij Timoteo, akin no katka tayekankej kemej yejua uan kiluij: “Nimitsyeknauatia iixpan Dios, Cristo Jesús uan ángeles taijitalmej xikchiua nejin tein nimitsnauatia uan amo xitechikoita nion xitechichikotasojta” (1 Tim. 5:21). ¿Akonimej nejon “ángeles taijitalmej”?
Nejin amo yejuan 144 mil taijitalmej, porin keman Pablo kitajkuilouilij Timoteo ayamo yayaj iluikak nion semej taijitalmej. Tatitanilmej uan okseki taijitalmej ayamo mochiuayaj kemej ángeles. Yejua ika amo yejuan katkaj “ángeles taijitalmej” (1 Cor. 15:50-54; 1 Tes. 4:13-17; 1 Juan 3:2).
Amo no yejuan ángeles akin kiixnamikkej Dios keman tetsaujkakiouik. Nejon ángeles kipaleuijkej Satanás uan mochiujkej amo kuali ejekamej uan kiixnamikkej Jesús (Gén. 6:2; Luc. 8:30, 31; 2 Ped. 2:4). Amo uejkaua, Jesús kintsakuas mil xiujmej itech se ueyi ostok uan satepan ixpoliuiskej iuan Satanás (Jud. 6; Apoc. 20:1-3, 10).
Nejon “ángeles taijitalmej” tein Pablo ininka tajtoj, yejuan ángeles tein yetokej ne iluikak uan kipaleuiaj Jehová uan Jesús.
Moajsij tel miakej ángeles (Heb. 12:22, 23). Jehová xa amo kinmaka sayoj se tekit nochin ángeles (Apoc. 14:17, 18). Maj tikelnamikikan ke se tonal Jehová kinauatij sayoj se ángel maj kinmikti 185 mil soldados asirios (2 Rey. 19:35). Uan no, keman “kikixtiskej de iTaixyekanalis Dios nochi tein kichiua maj se tajtako uan akin kichiuaj tein amo kuali”, xa no kichiuaskej miakej ángeles (Mat. 13:39-41). Xa oksekin ángeles kinnauatiskej maj “kinsentilikan taijitalmej” para yaskej ompa iluikak (Mat. 24:31). Uan oksekin ángeles kinnauatiaj maj techyekpiakan kemej kijtoua Salmo 91:11 (Mat. 18:10; no xikonita Mateo 4:11 uan Lucas 22:43).
“Ángeles taijitalmej” tein ininka motajtoua itech 1 Timoteo 5:21, xa katkaj ángeles akin kinnauatijkaj maj kiitakan tekit tein mochiujtoya itech nechikolmej. Tein ika tajtoua nejin capítulo kinextia ke Pablo kiniluijtoya tayekananij keniuj kichiuaskej inintekiuj uan kinyolmajxitijtoya tokniuan maj kinpoujkaitanij. Pablo kiniluij tayekananij maj “amo techikoitakan nion maj kinchichikotasojtakan” tokniuan uan maj amo yolijsiuikan keman kiixtaliskej teisa. ¿Keyej? Pablo kijtoj ke tayekananij kintekitiliaj tokniuan “iixpan Dios, Cristo Jesús uan ángeles taijitalmej”. Nejin kijtosneki ke Jehová, Jesús uan “ángeles taijitalmej” kinitstokej tayekananij keniuj kichiuaj inintekiuj itech nechikol. Kemej tikitaj, sekin ángeles kinnauatiaj maj tapaleuikan itech nechikol, yejuan no kinyekpiaj itekitikauan Dios, kinpaleuiaj maj tanojnotsakan uan kimatiltiaj Jehová tein kiitaj (Mat. 18:10; Apoc. 14:6).