Netataujtil, ¿keniuj techpaleuia?
Achto ke tikonixtalia tikonpeualtis teisa, xa tionmotajtania: “¿Keniuj nechpaleuis?”. ¿Tiknextijtoskiaj ke sayoj tiktemouaj totanejnekilis komo ijkon tikitaj netataujtil? Amo nochipa. Kuali yetok maj tiknekikan tikmatiskej keniuj techpaleuis netataujtil. Hasta Job akin amo kikauak Dios motajtanij: “Komo niknotsaskia, ¿nechnankiliskia?” (Job 9:16).
Itech tamachtilis tein achto tikitakej moijtoj ke netataujtil amo sayoj se taman tein taneltokalismej tamachtiaj oso tein tapaleuia maj kuali se momachili. Dios akin melauak kikaki netataujtilmej. Komo tiktataujtiaj Dios kemej kineki uan titajtanij tein kinamiki, yejuatsin techkaki. Uan techyoleua maj iuan timotokikan (Santiago 4:8). Yejua ika, ¿toni uelis tikseliskej komo nochipa iuan timotataujtiaj? Maj tikitakan.
Yolseuilis
Keman tikonpia kuejmolmej oso ouijkayomej, ¿tikonmachilia ke semi tionmotekipachoua? Biblia techiluia toni tikchiuaskej keman tikpanouaj nejon: “Nachipa ximoteixpantikan iixpantsinko Totajtsin Dios ika namonetatatautilis” uan “xiktajtanilikan Dios nochi ten namechpoloa” (1 Tesalonicenses 5:17; Filipenses 4:6). Uan akin kitajtaniaj maj kinpaleui, Biblia kijtoua: “Dios namechtayokolijtiyas ne yolseuilis ten kachi kuika uelilis hasta amo uelis se kajsikamatis ok de keniu. Uan nijin mouiskayolseuilis, ma yejua kinyekantinemis namoyolojuan uan namotamachilisuan” (Filipenses 4:7). Uelis okachi kuali timomachiliskej keman tikiluiskej toTajtsin Dios nochi tein tikmachiliaj uan tein techtekipachoua. Tein melauj, Biblia techyoleua maj tikchiuakan: “Xikauili Jiova motamamal, uan yejuatsin mitsmatsakuilis” (Salmo 55:22).
“Xikauili Jiova motamamal, uan yejuatsin mitsmatsakuilis” (Salmo 55:22).
Noyampa taltikpak, tel miakej kimachiliaj nejon yolseuilis keman kitataujtiaj Dios. Se siuat akin kayot Corea del Sur uan itokay Hee Ram, kijtoua: “Maski nikpia uejueyi kuejmolmej, keman niktataujtia Dios nikmachilia kemej yeskia nimokixtilia se tamamal tein etik uan nejon nechpaleuia maj nitaxiko”. Cecilia, akin nemi Filipinas, techtapouia: “Semi nechtekipachoua tein uelis kinpanos nosiuapipiluan. Uan no nikyekpia nomomaj, akin amo ueliok nechixmati. Niktataujtis Dios nechpaleuia maj niyolseujto keman nikchiua tataman tekimej mojmostaj. Nikmati ke Jiova nechpaleuis maj nikinyekpia”.
Yolseuilis uan yolchikaualis ijkuak onkak ouijkayomej
¿Semi tionmotekipachojtok, tikonmouilia maj teisa mitsonpano oso tikonpanotok se taman tein kichiua amo xionyolseujto? Komo tikontataujtia “Dios akin iaxka nochi taman yolseuilis” mitsonpaleuis amo semiok xionmotekipacho. Biblia kiyekijtoua ke yejuatsin “techyolseuia itech nochi totayejyekolis” (2 Corintios 1:3, 4, TNM). Kemej neskayot, se tonal keman Jesús semi motekipachojtoya, “motankuaketsato uan peuato motatatautilia”. ¿Toni panok? “Monextiko se ángel den eluiyaktsinko para ijkon yejua kichikaualismakaya Jesús.” (Lucas 22:41, 43.) Nehemías, okse takat akin amo kikauaya Dios, no tajyouij porin akin amo yolkualmej kitemouayaj maj amo kichiua itanejnekilis Dios. Yejua motataujtij: “Xikchikaua nomauan”. Uan tein panok satepan kinextia ke Dios kipaleuij maj kichiua tekit tein kinauatijka ika yolchikaualis (Nehemías 6:9-16). Reginald, akin kayot Ghana, techtapouia: “Keman nikchiua netataujtil, okachi keman nikpia ouijkayomej, nikmachilia kemej yeskia nikiluiskia nokuejmoluan aksa akin ueli nechpaleuia uan akin nechyekiluia maj amo nimotekipacho”. Kemej tikitaj, Dios techyolseuia komo tiktataujtiaj.
Itamatilis Dios
Tein tikixpejpenaj tikchiuaskej uelis kipatas tonemilis, ijkon kemej ininnemilis tochankauan. ¿Toni uelis tikchiuaskej tein techpaleuis maj kuali titaixejekokan? Biblia kijtoua: “Komo aksame tokniuan taneltokani kipoloaj in kuali taixejekolis [okachi keman kiixnamikij ouijkayomej], ijkuakon ma kitajtanilikan Totajtsin Dios uan Yejuatsin kinmakas ne tamachilis ten kinpoloaj” (Santiago 1:5). Komo tiktajtaniaj Dios tamatilis, yejuatsin ika iespíritu, techpaleuia maj kuali titaixejekokan. Jesús techyekiluij: “Yejuatsin namechmajmaktilis uan namechyolpepexokaltis ika in Yektikatsin Espíritu ten nochi namejuan ten nankitajtaniliske” (Lucas 11:13).
“Nochipa niktajtanij Dios maj nechpaleui maj kuali nitaixejeko.” (Kwabena, akin kayot Ghana)
Hasta Jesucristo kitajtanij iPopaj maj kipaleui achto ke kiixejekoskia seki taman tein motelnekia. Keman monekik kiixpejpenas 12 itatitaniluan, Jesús “nochi se youal motatatautilitoya iuan Itajtsin Dios” (Lucas 6:12).
Ijkon kemej yejua, miakej okachi kuali momachilianij keman kiitaj keniuj Dios kinpaleuiani maj kuali taixejekokan. Regina, akin nemi Filipinas, techtapouia miak kuejmolmej tein kipiani: satepan keman momikilij inamik yejua peuak kintekipanoua ichankauan, kipoloj tekit tein kipiaya uan iselti kiniskaltia isiuapipiluan. ¿Toni kipaleuij maj kuali taixejeko? Yejua kijtoua: “Netataujtil yejua se taman kemej niktemoua inepaleuil Jiova”. Kwabena, akin nemi Ghana, techiluia keyej kitajtania Dios maj kipaleui: “Nikpiaya se kuali tekit itech kaltachijchiualis sayoj ke nechkixtijkej. Keman nikitaya itech toni ueliskia nitekitis, nochipa niktajtanij Dios maj nechpaleui maj kuali nitaixejeko. Senkis nikmati ke Jiova nechpaleuij maj nikixpejpenani se tekit tein ika ueli nimoixpanoltia uan tein nechpaleuia maj nikchiua itekiyo Dios”. Yejuatsin no uelis mitsonixyekanas komo tikontataujtia maj mitsonpaleui xikonchiua tein tapaleuis kuali xionmouika iuan.
Sayoj tikijtouanij seki taman tein kuali tein uelis tikonselis keman tikonchiuas netataujtil. (Uelis tikonitas okseki taman itech recuadro “Tein kuali tein tikseliaj keman tiktataujtiaj Dios”.) Komo tikonneki maj netataujtil mitsonpaleui, yekinika moneki xikonixmati Dios uan nochi tein motenkaua kichiuas. Uelis tikontajtanis se itaixpantijkauj Jiova maj mitsonpaleui xionmomachti Biblia.a Nejin uelis yeski yekinika taman tein mitsonpaleuis xionmotoki iuan ‘Akin kikaki netataujtil’ (Salmo 65:2).
a Komo tikonneki tikonmatis okachi, xiontajto iniuan itaixpantijkauan Jiova oso xikonita Internet kampa timoteixmatiltiaj www.jw.org/ncj.