¿Keniuj mitsonpaleuis komo tionmotataujtia?

Pamela kitemoj mopajtis keman kokolispeuak, sayoj ke no kitataujtij Dios uan kitajtanij maj kipaleui maj taxiko. ¿Kipaleuij keman motataujtij?

Yejua kijtoua: “Kemej nikpia cáncer, nimopajtijtok uan kemansa nimoui. Sayoj ke keman niktataujtia Jiova okachi kuali nimomachilia uan niyektanemilia. Kisentoka nechtajyouiltia kokolis tein nikpia, sayoj ke kemej nimotataujtia, nechpaleuia maj kuali nitanemili. Keman sekin nechtajtaniaj keniuj niyetok, nikiniluia: ‘Niksentoka nimokokoua, sayoj ke niyolpaki’”.

Amo moneki timotataujtiskej hasta maj techpano tein amo kuali. Sekin kipiaj uejueyi kuejmolmej uan sekin amo uejueyi, maski ijkon, tinochin moneki maj techpaleuikan. Sayoj ke, ¿tapaleuia maj se motataujti?

Biblia kijtoua: “Xikauili Jiova motamamal, uan yejuatsin mitspaleuis. Amo keman kikauas maj uetsi akin yolmelauak” (Salmo 55:22). ¡Semi techyolchikaua! ¿Uan keniuj techpaleuia timotataujtiskej? Keman tiktataujtiaj Dios ijkon kemej yejuatsin kiuelita, techpaleuis maj tikixnamikikan kuejmolmej (xikonita taxelol “Keniuj techpaleuia timotataujtiskej”).

Keniuj techpaleuia timotataujtiskej

Kichiua maj tiyolseujtokan

“Ximoteixpantikan iixpantsinko Totajtsin Dios ika namonetatatautilis uan [...] Dios namechtayokolijtiyas ne yolseuilis ten kachi kuika uelilis hasta amo uelis se kajsikamatis ok de keniu. Uan [...] kinyekantinemis namoyolojuan uan namotamachilisuan porin Cristo Jesús yetinemi namouan” (Filipenses 4:6, 7). Komo tikiluiaj Dios tein techtekipachoua, techpaleuis maj tiyolseujtokan uan maj tikchiuakan tein kuali maski semi timotekipachojtoskej.

Ueli tikpiaj tamatilis

“Komo aksame [...] kipoloaj in kuali taixejekolis, ijkuakon ma kitajtanilikan Totajtsin Dios uan Yejuatsin kinmakas [...]. Porin [...] nachipa kitetayokolijtika uan amo aken kinixtopeua” (Santiago 1:5). Keman timotekipachojtokej, kemansa amo kuali titaixpejpenaj. Sayoj ke, komo tiktajtaniaj Dios maj techmaka tamatilis, yejuatsin techpaleuis maj tikelnamikikan tein techyolmajxitia itech iTajtol, Biblia.

Techyolchikaua

“Itech nochi taman nikpia chikaualis itechkopa akin nechmaka chikaualis” (Filipenses 4:13, TNM). Kemej Jiova yejuatsin akin kipia nochi chikaualis, uelis techpaleuis maj tikixnamikikan kuejmolmej uan maj titaxikokan (Isaías 40:29). Biblia kijtoua ke Jiova “techyolseuijtinemi” keman “titajyouijtinemij” (2 Corintios 1:3, 4).