Tinochin moneki maj techyolseuikan

¿Kemansa tionuetsik ijkuak katka tionnojnel? Xa tionmomatekik oso tionmotankuaxitomak. ¿Keniuj mitsonpaleuij momomaj? Xa kichipauak uan kipikik kampa tionmokokoj. Tejuatsin tionchokaya, sayoj ke yejua niman mitsonyolseuij ika itajtoluan uan mitsonnauaj ika netasojtalis. Keman tejuatsin katka tionnojnel, amo mitsonouijmakaya tikonajsis akin mitsonyolseuiskia.

Ijkon kemej timoskaltijtiyouij, okachi tikixnamikij tataman ouijkayomej. Kuejmolmej okachi ouij se kinixnamiki uan okachi ouij se kiajsi yolseuilis. Tetayokoltij tikijtoskej ke kuejmolmej tein kipiaj akin uejueykej amo niman moyektaliaj kemej ijkuak se temomaj kipajtia ikonetsin. Maj tikitakan tein kinpanouani sekin.

• ¿Tionmotekipachojtok porin tikonpoloj motekiuj? Julián kielnamiki ke ijkuak kipoloj itekiuj, amo kimatiaok toni kichiuas. Motajtaniaya: “¿Keniuj nikinixpanoltis nochankauan? Satepan ke nitekitik chikauak miak xiujmej, ¿keyej kampa nitekitia kinemiliaj ke amo teyi ueliok nikchiua?”.

• ¿Semi tiontajyouijtok porin tamik monemilis kemej namikuanij? Raquel kijtoua: “Panoua se xiuit uan tajko, nonamik nechkauak. Semi nimotayokoltij, nikmachilij kemej yeskia noyolo tapania. Amo kuali nimomachiliaya uan nimoyolkokouaya. Semi nimouia”.

• ¿Tikonpia se ueyi kokolis uan nesi ke amo tionpajti? Xa tionmomachilia kemej Job se taixyekankej akin ika tayokol kijtoj: “Niktauelita nonemilis uan amo nikneki niksentokas ninemisok” (Job 7:16). Oso xa tionmomachilia kemej Luis, akin kipia 80 xiujmej. Yejua kijtoj: “Kemansa nikmachilia ke sayoj nikchixtok nimomikilis”.

• ¿Uan komo tikonneki maj mitsonyolseuikan porin momikilij se akin tikontasojta? Robert kijtoua: “Keman nikmatik ke nokonetsin momikilij keman mochiuak tein amo kuali ika avión, amo uelia nikneltokaya. Satepan nimoteltayokoltij... nikmachilij tekokojkayot tein Biblia kijtoua ke tamati kemej yeskia mitstokiliaj se ueyi espada” (Lucas 2:35).

Maski Julián, Raquel, Luis uan Robert semi tajyouijtoyaj, kipiakej yolseuilis porin kiajsikej akin okachi kuali ueliskia kinyolseuis: Dios akin kipia nochi chikaualis. ¿Keniuj techyolseuia yejuatsin? ¿No mitsonyolseuis Dios keman tiontajyouijtos?