Se okachi ueyi netetayokolil

SACAPUNTAS tein tamati kemej se barco tein Jordan kipia imako amo moita maj semi patiyoj. Sayoj ke, yejua kitelpatiuita. Yejua kijtoua: “Keman katka ninojnel nechtayokolij Russell akin nochipa kuali mouikak iniuan nochankauan”. Satepan ke Russell momikilij, Jordan kimatik ke iueyitat uan itatuan semi kitasojtayaj uan ke semi kinpaleuijka keman kipanokaj ouijkayomej. Jordan kijtoua: “Axkan ke okachi nikmati tein kichiuak, nejon netetayokolil tein nechmakak, okachi nikpatiuita”.

Tein Jordan techtapouia kinextia ke aksa uelis kiitas ke se netetayokolil amo semi patiyoj, sayoj ke akin motasojkamati uelis kitelpatiuitas, kiitas ke amo onkak okse kemej nejon. Biblia ika tajtoua se ueyi netetayokolil ika nejin tajtolmej tein semi moixmatij: “Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa” (Juan 3:16).

¡Se netetayokolil tein uelis kimakas nemilis nochipaya akin kiselia! ¿Moajsi okse netetayokolil tein okachi ueyi? Maski sekin amo ijkon kiitaj, akin yekmelauj kichiuaj kemej Cristo kiitaj ke “semi ueyi” uan ke kitelpia ipatiuj (Salmo 49:8; 1 Pedro 1:18, 19). Sayoj ke, ¿keyej Dios kitemakak inemilis iKonetsin kemej se netetayokolil?

Pablo se imomachtijkauj Jesús kimelaua ijkon: “Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan no tikmatij ke ongak mikilis nochi senmanauak ika por ne tajtakol de Adán. Uan no ne mikilis mosouako uan takitskijtinemiko inpan nochi in taltikpakuani” (Romanos 5:12). Yekinika takat, Adán, tajtakoj keman kiixtalij amo kitakamatis Dios, yejua ika kitatsakuiltijkej ika mikilis. Ika tein kichiuak Adán, tinochin tiikoneuan techpanoltilij mikilis.

“In tajtakol keme yeskia se patrón ten tetaxtauia sayo ika mikilis. Pero Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús” (Romanos 6:23). Dios kiualtitanik iKonetsin, Jesucristo nikan taltikpak maj kitemakaki inemilis uan ijkon techmakixtiskia itech mikilis. Nejon tein kichiuak Jesús, moixmati kemej ‘taxtauil’ uan akin itech takuaujtamatiskej kipiaskej nemilis nochipaya (Romanos 3:24).

Keman Pablo ika tajtoj tatiochiualismej tein Dios itechkopa Jesucristo kinmaka akin kitekitiliaj, kijtoj: “Ma tikueyitasojkamachilijtiyakan Totajtsin Dios ika por ne ueyi tetayokolil” (2 Corintios 9:15). Kemej tikitaj, taxtauil se netetayokolil tein semi ueyi, tein amo ueliskia tikmelauaskej ika tajtolmej. Dios techmakani miak netetayokolilmej, sayoj ke ¿keyej taxtauil tein kitemakak yejua tein okachi ueyi? ¿Keyej nejon netetayokolil tein Dios techmakak semi taman?a ¿Uan keniuj uelis tiknextiskej ke tiktasojkamatij? Itech okseki ome tamachtilismej tiknankiliskej nejin netajtanilmej.