¿Katiyejua okachi kuali netetayokolil?

“Nochi in tetayokolil ten kuali uan ten chipauak, [...] ualeutok de ne ajko kampa yetika Totajtsin Dios ten kinchijchiuak in tanexme den ne eluiyak.” (Santiago 1:17.) Nejin tajkuilol ika tajtoua keniuj toTajtsin, Jiova Dios, kiuelita kitemakas teisa. Dios techmakani miak netetayokolilmej, sayoj ke moajsi se tein okachi kuali. ¿Katiyejua? Itajtoluan Jesús tein motelixmatij tein moajsij itech Juan 3:16, kinextia: “Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin [...] para ma nochi ne ten iuantsin takuautamatiske, [...] ma amo ixpoliuikan. Ta, ma kipiakan ne yek nemilis nachipa”.

Maj Dios techmakani iKonetsin akin sayoj setsin, yejua okachi kuali netetayokolil tein ueliskia tikseliskej. Porin ika nejon uelis amo techijtakosok tajtakol, ueuentsiyot uan mikilis (Salmo 51:5; Juan 8:34). Maski senkis tiktemoskiaj timokixtiliskej tajtakol, amo keman tiueliskiaj. Sayoj ke Dios semi techtasojta, yejua ika kichiuak tein monekia tein ika techmakixtiskia. Keman kitemakak iKonetsin, Jesucristo, kemej taxtauil, Jiova kichiuak maj nochin akin kitakamatiskiaj kichiakan nemiskej nochipaya. Sayoj ke, ¿toni nejon taxtauil? ¿Keyej moneki? Uan ¿keniuj uelis techpaleuis?

Se taxtauil yejua ipatiuj tein motemaka tein ika oksepa se kipia tein se kipoloj oso tein ika se kimakixtia aksa akin kiichtekkej. Biblia kimelaua ke Dios amo kichijchiuak ika tajtakol yekinika takat Adán uan yekinika siuat Eva, ta maj nemikan nochipa itech se xochital iniuan ininkoneuan akin kinpiaskiaj satepan (Génesis 1:26-28). Tetayokoltij tikijtoskej ke kipolojkej nochi keman kiixtalijkej amo kitakamatiskej Dios uan mochiujkej tajtakouanij. ¿Toni kiualkuik nejon? Biblia kijtoua: “Itechkakopaka ne achtopa tagat Adán [...] in tajtakol momauak ya tech nochi senmanauak. Uan [...] ongak mikilis nochi senmanauak ika por ne tajtakol de Adán. Uan no ne mikilis mosouako [...] inpan nochi in taltikpakuani porin nochi [...] motajtakolmakakke” (Romanos 5:12). Adán amo kinmakak ikoneuan se kuali nemilis, ta kinpanoltilij tajtakol uan tein kiualkui: mikilis.

Keman motemaka se taxtauil, ipatiuj tein motemaka moneki yeski ipatiuj kemej tein mopoloj. Adán tajtakolchiuak keman kiixtalij amo kitakamatis Dios uan nejon kichiuak maj kipolo inemilis tein amo kipiaya tajtakol. Ijkon kemej kijtoua Biblia, nochin ikoneuan Adán senkis kinijtakoj tajtakol uan mikilis. Yejua ika monekia maj motemaka okse nemilis tein amo kipiaya tajtakol: inemilis Jesús (Romanos 5:19; Efesios 1:7). Komo Dios amo kitemakaskia nejon taxtauil, amo tiueliskiaj tikpiaskej tein Adán uan Eva kipolojkej: nemilis nochipaya itech se xochital (Apocalipsis [Revelación] 21:3-5).

Senkis tikmatij ke taxtauil yejua “netetayokolil tein okachi kuali” tein Dios techmaka porin kichiua maj ueli tikpiakan nemilis nochipaya. Okachi kuali tikajsikamatiskej keyej nejin netetayokolil yejua tein okachi kuali, komo tikitaj keniuj kipia naui taman tein tikitakej itech achto tamachtilis tein tapaleuia maj motemaka okachi kuali netetayokolilmej.

Techmaka tein tikyolnejnekij. Tinochin senkis tikyolnejnekij tinemiskej nochipaya (Eclesiastés 3:11). Sayoj ke toselti amo tiuelij tikchiuaj nejon, sayoj ke ika taxtauil kemaj. Biblia kijtoua: “In tajtakol keme yeskia se patrón ten tetaxtauia sayo ika mikilis. Pero Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús” (Romanos 6:23).

Techmaka tein techpoloua. Amo akin ueliskia kitemakas nejon taxtauil. Biblia kijtoua ke tel patiyoj katka uan amo akin ueliskia kiixtauas (Salmo 49:8). Yejua ika, motelnekia maj Dios techkixtili tajtakol uan mikilis. Uan Dios kitemakak tein monekia keman “Jesús kixtauak ya nochi totajtakoluan uan techmakixtij” (Romanos 3:23, 24).

Keman okachi monekia. Biblia kijtoua: “Maski tejuan tech ne tonal tikatkaj semi titajtakolejke. [...] Cristo momikilij toixpatka” (Romanos 5:8). Dios kitemakak taxtauil keman “tikatkaj semi titajtakolejke”, nejon techmatiltia ke semi techtasojta maski titajtakolejkej. Uan maski monekiok tikxikoskej tein kiualkui tajtakol, taxtauil kichiua maj tikchiakan tein kuali ika miak pakilis.

Kinextia ke kiyololinij tein kuali. ¿Toni kiyololinij Dios maj kitemaka iKonetsin kemej se taxtauil? “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis [...]. In tetasojtalis de Dios monextijtinemi ijkuin, ke amo tejuan achtopa tiktasojtakke Totajtsin Dios. Ta, achto Yejuatsin techtasojtak.” (1 Juan 4:9, 10.)

¿Keniuj uelis tikonnextis ke tikontasojkamati nejin okachi kuali netetayokolil? Xikonelnamiki tein Jesús kijtoj itech Juan 3:16, sayoj “nochi ne ten iuantsin takuautamatiske” momakixtiskej. Biblia kijtoua ke se takuaujtamatis kijtosneki ke “timoyekmatiltiaj ya ke se tonal tikselijtiue nochi ne ten axkan tikyolikachixtokke” (Hebreos 11:1). Semi moneki maj timomachtikan tein kijtoua Biblia, porin sayoj ijkon senkis tikmatiskej ke tikseliskej tein tikchixtokej. Yejua ika, timitsonyoleuaj xikonxelo tiempo uan xikonixmati Dios, Akin techmakak nejin okachi kuali netetayokolil, xikonmati tein moneki tikonchiuas uan ijkon tikonpias nemilis nochipaya tein ika imikilis Jesús uelis tikpiaskej.

Uelis tikonmatis tein yekmelauj tamachtia Biblia komo tikontemoua itech Internet kampa timoteixmatiltiaj www.jw.org/ncj. Itaixpantijkauan Jiova mitsonpaleuiskej ika miak pakilis. Senkis tikmatij ke ijkon kemej okachi tikonmatis keniuj mitsonpaleuia nejin netetayokolil, mitsonyololinis xikonijto: “Niktasojkamachilia ke Totajtsin Dios nechmakixtis ika por ichikaualis de Totekotsin Jesucristo” (Romanos 7:25).