¿Keyej moijtoua ke inemilis Jesús tein kitemakak kinmakixtia miakej?
Tein Biblia kijtoua
Ika inemilis Jesús tein kitemakak, Jehová kinmakixtia akin nemij nikan taltikpak den tajtakol uan mikilis. Biblia kijtoua ke Jesús taxtauak ika iesyo para techmakixtis (Efesios 1:7; 1 Pedro 1:18, 19). Yejua ika, Jesús ualaj para “kitemakas inemilis uan ijkon taxtauas para kinmakixtis miakej” (Mateo 20:28).
Keyej monekia “taxtauas para kinmakixtis miakej”
Yekinika takat Adán akin Dios kichijchiuak, amo tajtakolej katka. Uan ueliskia nemis nochipaya, sayoj ke kinemilij amo kitakamatis Dios uan yejua ika amo uelikok nemik nochipa (Génesis 3:17-19). Ikoneuan Adán yoliaj tajtakolejkej (Romanos 5:12). Yejua ika Biblia kijtoua ke Adán monamakak uan kinnamakak ikoneuan imako tajtakol uan mikilis (Romanos 7:14). Amo akin ueli kipia tein yejua kipoloj porin tinochin titajtakouanij (Salmo 49:7, 8).
Dios kiniknelij ikoneuan Adán, porin kiitak ke amo ueliskia ininselti momakixtiskej (Juan 3:16). Uan no, toTajtsin yolmelauak, yejua ika amo uelik sayoj ijkon kintapojpoluij inintajtakoluan (Salmo 89:14; Romanos 3:23-26). Kemej semi techtasojta, kitemakak iKonetsin para taxtauas uan ijkon amo sayoj techtapojpoluis totajtakoluan, ta no kitamis tajtakol (Romanos 5:6-8). Yejua ika taxtauak iKonetsin.
Toni kijtosneki keman moijtoua ke taxtauak
Itech Biblia, keman moijtoua ke aksa taxtaua, kijtosneki eyi taman:
Yejua ipatiuj tein aksa taxtaua (Números 3:46, 47).
Keman aksa taxtaua, kimajkauaj aksa oso oksepa kipia tein kipoloj (Éxodo 21:30).
Kitemaka ipatiuj tein poliuik.a
Maj tikitakan keniuj mochiuak nejin taman keman Jesucristo kitemaka inemilis.
Ipatiuj tein aksa taxtaua. Biblia kijtoua ke ‘Dios kinkouak’ akin kichiuaj kemej Cristo (1 Corintios 6:20; 7:23). Kinkouak ika iesyo Jesús, “akin pouij itech tataman uejueyi kalyetonij, akin tajtouaj tataman tajtolmej, tataman ininxolal uan tataman ininaltepeuj” (Apocalipsis 5:8, 9).
Kimajkauaj. Inemilis Jesús tein kitemakak kichiua maj techmakixtikan den tajtakol (1 Corintios 1:30; Colosenses 1:14; Hebreos 9:15).
Ipatiuj kemej tein poliuik. Inemilis Jesús tein kitemakak katka kemej inemilis Adán tein kipoloj, akin amo katka tajtakolej (1 Corintios 15:21, 22, 45, 46). Biblia kijtoua: “Ijkon kemej miakej peujkej kipiaj tajtakol porin sayoj se takat [Adán] amo tatakamatik, no ijkon Dios kinitas miakej ke yolmelaujkej porin sayoj se takat [Jesucristo] tatakamatik” (Romanos 5:19). Nejin tajtolmej kimelaua keyej inemilis tein kitemakak sayoj se takat ueli kichiua maj momakixtikan miakej tajtakouanij. Inemilis Jesús tein kitemakak, “ika kiixtauak tein monekia para kinmakixtis nochin” akin tatakamatij (1 Timoteo 2:5, 6).
a Itech Biblia, keman moijtoua ke aksa “taxtaua”, kijtosneki ke kiixtaua ipatiuj tein moneki oso kitemaka teisa tein no kipia ipatiuj kemej tein poliuik. Tajtol hebreo kafár kijtosneki “kiixtsakua” (Génesis 6:14). Ijkon mokui keman moijtoua ke kiixtsakuaj totajtakoluan (Salmo 65:3). Uan tajtol kófer kiteajsikamatiltia ipatiuj tein moixtaua para momakixtis aksa (Éxodo 21:30). Uan no, tajtol griego lýtron, tein motajtolkepa kemej “taxtaua”, no uelis motajtolkepas kemej “taxtauas para temakixtis” (Mateo 20:28, The New Testament in Modern Speech, de R. F. Weymouth). Ijkon kijtouayaj tajkuilouanij griegos keman aksa monekia taxtauas para kimajkauaskej se akin kikitskijkej keman yajka itech se neteuilis oso se takeual akin moajsia temako.