“Okachi kuali netetayokolil tein nikseliani”

Yejua nejon tein kijtoj se siuapiltsin akin kipia 13 xiujmej keman kitayokolijkej se itskuintsin. Se siuat akin kipia se ueyi kaltekitiloyan kijtoua ke computadora tein ipopaj kitayokolij keman katka okachi ichpoch kipatak inemilis. Uan se takat akin yankuixtok monamiktij kinemilia ke tein kijkuilouilij isiuauj keman kiajxitijkej se xiuit kemej namikuanij, yejua okachi kuali netetayokolil tein kiseliani.

Xijxiujtika, miakej kikuij inintiempo uan mochikauaj kitemoskej “okachi kuali” netetayokolil tein uelis kimakaskej semej inintasojikniuan oso semej ininchankauan itech se tonal tein motelneki. Uan tinochin tikuelitaskiaj maj tonetetayokoliluan kiselikan ika miak pakilis ijkon kemej kiselijkej akin ininka titajtojkej. ¿Tikonuelitaskia tikontemakas se netetayokolil ijkon oso tikonselis?

Nejin uelis semi teyolnotsas, amo sayoj porin uelis kipaleuis akin kiselia, ta no porin kemej momachilia akin kitemaka. Biblia kijtoua: “Kachi yolpaktok in tagat ten tapaleuijtinemi [...] ke ne tagat ten sayo kiselia tapaleuilis” (Hechos 20:35). Tein melauj, okachi teyolpaktia se kitemakas se netetayokolil keman akin kiselia semi motasojkamati.

¿Toni uelis tikchiuaskej uan ijkon titemakaskej netetayokolilmej tein techyolpaktis uan tein kiyolpaktis akin kiselia? Uan komo amo ueli tiktemakaj “okachi kuali” netetayokolil, ¿keniuj uelis tikchiuaskej maj tonetetayokolil yekmelauj kipatiuita akin tikmakaj?