“Maj tatiochiual mokuali taixejekolis”

DAVID, akin ne uejkauj tekiuajtik Israel, kiluij nejin kualtsitsin tajtolmej se siuat akin motokaytiaya Abigail. ¿Keyej kiluij nejon? ¿Toni techmachtia ineskayo nejin siuat?

David kiixmatik Abigail keman tekiuaj Saúl kitemojtinemia. Abigail monamiktijka iuan Nabal, se takat akin kipiaya miak tomin uan miak ichkamej tein kintakualtiayaj itech tepemej ompa Judá kampa ika sur. David uan itateuijkauan mochiujkaj kemej se “tepamit” tein kinmatampauijka ichkatajpianij akin kitekitiliayaj Nabal uan iichkauan. Satepan, David kintitanik seki takamej maj kitajtanitij Nabal tein yeski takual tein ueliskia kinmakas (1 Sam. 25:8, 15, 16). Taixejekol tein tajtaniaj, porin yejuan kimatampauijkaj tein iaxka Nabal.

Itokay Nabal kijtosneki “Amo tamati” oso “Mijmikilot”, uan kitelnamikik itokay. Yejua chikauak kinnankilij uan kinuijuikaltij nejin takamej. Yejua ika David kiixtalij kitatsakuiltis porin tel amo kuali kinnankilij. Imijmikiloyo Nabal kinualkuiliskia tein amo kuali yejua uan akin iuan nemiaj (1 Sam. 25:2-13, 21, 22).

Keman Abigail kimatik tein amo kuali tein yaya panoti porin David tel kualanik, ika yolchikaualis kitemoj tapaleuis. Ika poujkaitalis, kiluij David maj okachi kuali tanemiliani, uan kielnamiktij maj kitayekanaltiani ikuali uikalis iuan Jiova. Uan no, kimakak miak takual akin satepan yeskia tekiuaj uan itateuijkauan. David kiajsikamatik ke itechkopa Abigail, Dios kitsakuilijka maj amo kichiuani tein amo kuali iixpan. Kiluij: “Maj tatiochiual mokuali taixejekolis, uan xitatiochiual tejua porin tinechtsakuilij nejin tonal maj amo nitemikti” (1 Sam. 25:18, 19, 23-35).

Ika nejin tikitaj ke moneki se motasojkamatis, amo kemej kichiuak Nabal. Uan no, keman tikitaskej ke mochiuati tein amo kuali, maj tikchiuakan tein tapaleuis maj amo mochiua. Maj tiktajtanikan Dios tein kijtoj semej itekitikauan: “Xinechmachti maj kuali nitaixejeko uan maj nitaixmatkej” (Sal. 119:66).

Oksekin xa kiitaskej ke tiknextiaj tamatilis, oso kuali taixejekolis, itech tein tikchiuaj. Maski kijtoskej oso amo, xa no kinemiliskej: “Maj tatiochiual mokuali taixejekolis”.