Maj tikueyichiuakan Jiova itech nechikol

1. ¿Keniuj David kiitaya Jiova, uan toni kiolinij maj kichiua nejon?

TEKIUAJ David kijkuiloj: “Jiova ueyi uan kitelnamiki maj kiueyitalikan” (Sal. 145:3). Yejua kitasojtaya Jiova, uan nejon netasojtalis kiolinij maj kiueyitali “itech nechikol” (Sal. 22:22; 40:5). Tejuan no tiktasojtaj Jiova uan tiknemiliaj ke melaujkej nejin itajtoluan David: “Xitaueyichiual, Jiova iDios topopaj Israel, nochipaya” (1 Crón. 29:10-13).

2. 1) ¿Katiyejua se taman kemej tikueyichiuaj Jiova? 2) ¿Toni kinpanoua seki tokniuan, uan toni tikitatij?

² Axkan, se taman kemej uelis tikueyitaliskej Jiova yejua keman titanankiliskej itech nechikolmej. Sayoj ke miakej tokniuan kintelouijmaka. Kinekij tanankiliskej, sayoj ke mouij. ¿Toni uelis kinpaleuis maj amo mouikan? ¿Uan toni tayolmajxitilis techpaleuis tinochin maj titanankilikan tein kinyolchikauas oksekin? Achto ke tiknankiliskej nejin netajtanilmej, maj tikitakan naui taman tein motelneki tein kinextia keyej moneki titanankiliskej itech nechikolmej.

KEYEJ TITANANKILIAJ ITECH NECHIKOLMEJ

3-5. 1) Kemej kijtoua Hebreos 13:15, ¿keyej titanankiliaj itech nechikolmej? 2) ¿Keniuj tikmatij ke Jiova amo kichia maj tinochin tel kuali titanankilikan?

³ Jiova techmakatok tinochin tatiochiualis maj tikueyichiuakan (Sal. 119:108). Ika totanankililuan ‘tikueyipanchiuaj toTajtsin Dios’, uan nejon amo akin uelis toka kichiuas (xikonixtajtolti Hebreos 13:15). Jiova amo kichia maj tinochin sayoj se taman kemej titanankiliskej.

⁴ Jiova kimati ke tinochin titatamamej uan tataman tein tikpanouaj, uan semi kipatiuita nochi tein ika tikueyichiuaj. Maj titanemilikan itech nemaktilmej tein kimakayaj israelitas. Sekin uelia kimakayaj se cordera oso se cabrita. Akin amo kipiayaj tomin ueliskia kimakaskej “ome tórtolas oso ome pichones”. Uan komo aksa tel amo kipiaya tein ika kitemakaskia ome totomej, Jiova kiseliaya tepitsin harina tein okachi kuali (Lev. 5:7, 11). Maski harina okachi amo patiyoj katka, Dios kipatiuitaya maj kimaktilianij nejon, sayoj ke monekia yeski tein okachi kuali harina.

⁵ ToDios kisentoka ijkon tanemilia axkan. Keman titanankiliaj, amo kichia maj tinochin tel kuali titajtokan kemej Apolos oso maj titetanemililpatakan kemej Pablo (Hech. 18:24; 26:28). Sayoj techtajtania maj titanankilikan kemej okachi kuali tiueliskej. Maj tikelnamikikan siuatsin akin kitemakak ome tomintsin. Jiova kipatiuitak porin kimakak nochi tein kipiaya (Luc. 21:1-4).

6. 1) Ika tein kijtoua Hebreos 10:24, 25, ¿keniuj uelis techpaleuiskej tanankililmej tein tikakij itech nechikolmej? 2) ¿Keniuj uelis tikonnextis ke tikonpatiuita inintanankililuan tokniuan?

⁶ Timosenyolchikauaj ika totanankililuan (xikonixtajtolti Hebreos 10:24, 25). Tinochin tikuelitaj tikakiskej tataman tanankililmej itech nechikolmej. Kemej neskayot, techyolpaktia tikakiskej keniuj tanankilia se konetsin. No techyolchikaua keman aksa kijtoua itech itanankilil se taman tein yekin kiajsikamatik. Uan no semi tikuelitaj keman moyolchikauaj tanankiliskej akin semi pinauaj oso yekin peua momachtiaj totajtol (1 Tes. 2:2). ¿Keniuj uelis tiknextiskej ke tikpatiuitaj chikaujkayot tein kichiuaj? Se taman yejua keman tikintasojkamatiliskej satepan ke tamis nechikol uan tikiniluiskej ke semi techyolchikauak inintanankilil. Okse taman yejua keman tejuan titanankiliskej. Ijkon amo sayoj techyolchikauaskej, ta no titeyolchikauaskej (Rom. 1:11, 12).

7. ¿Keniuj techpaleuia titanankiliskej?

⁷ Titanankiliskej techpaleuia (Is. 48:17). ¿Keniuj? Yekinika, komo tikixtaliaj timomaajokuiskej, okachi kuali timomachtiskej tein moitas itech nechikol, okachi kuali tikajsikamatiskej iTajtol Dios uan okachi tikchiuaskej tein tikajsikamatij. Ojpatika, xa okachi techyolpaktis nechikolmej, porin amo sayoj titakaktoskej. Uan expatika, kemej moneki timochikauaskej keman titanankiliaj, okachi amo tikelkauaskej tanemililmej tein tikijtoskej.

8, 9. 1) Ika tein kijtoua Malaquías 3:16, ¿keniuj tikonnemilia ke kiita Jiova keman timochikauaj titanankiliskej? 2) Maski ijkon, ¿keniuj uelis momachiliskej sekin?

⁸ Jiova kiyolpaktia maj ika titajtokan tein tikneltokaj. Uelis tikyekmatiskej ke yejuatsin techkaki uan semi kipatiuita keman timochikauaj titanankiliskej itech nechikolmej (xikonixtajtolti Malaquías 3:16). Uan no, kinextia ke kipatiuita keman techtatiochiuia porin timochikauaj tikyolpaktiskej (Mal. 3:10).

⁹ Tikitakejya keyej moneki titanankiliskej. Maski ijkon, sekin xa mouijok momaajokuiskej. Komo ijkon tionmomachilia, amo xionmosenkaua. Maj tikitakan seki tayolmajxitilis uan neskayomej tein moajsij itech Biblia, uan no seki taman tein techpaleuis tinochin maj okachi titanankilikan.

TONI TECHPALEUIS MAJ AMO TIMOUIKAN

10. 1) ¿Keyej sekin mouij tanankiliskej? 2) ¿Keyej tikijtouaj ke uelis kuali yeski komo timouij titanankiliskej?

¹⁰ ¿Peua tionteluiuiyoka nochipa keman tikonnemilia tionmomaajokuis itech nechikol? Komo ijkon, amo sayoj tejuatsin mitsonpanoua. Tein melauj, timiakej tepitsin tiuiuiyokaj keman titanankiliaj. Sayoj ke, komo yejua nejon mitsontsakuilia, moneki tikontemos tikonmatis keyej ijkon tionmomachilia. ¿Tikonmouilia xikonelkaua tein tikonijtosneki oso amo xikonyekijto teisa? ¿Mitsontekipachoua amo tel kuali xiontanankili kemej oksekin? Tein melauj, nochi nejon uelis kinextis ke tionyolyemanik uan ke tikonita ke oksekin okachi kiyekchiuaj teisa. Jiova semi kiyolpaktia maj se yolyemanik (Sal. 138:6; Filip. 2:3). Sayoj ke no kineki xikonueyichiua uan xikonyolchikaua mokniuan itech nechikolmej (1 Tes. 5:11). Yejuatsin mitsontasojta uan mitsonpaleuis xionmoyolchikaua.

11. ¿Toni tayolmajxitilis tein kitemaka Biblia uelis techpaleuis?

¹¹ Maj tikitakan seki tayolmajxitilis tein kitemaka Biblia. ITajtol Dios techelnamiktia ke tinochin timopolouaj keman titajtouaj (Sant. 3:2). Jiova amo kichia maj amo keman timopolokan, uan tokniuan amo no kichiaj nejon (Sal. 103:12-14). Yejuan kemej yeskiaj tochankauan uan techtasojtaj (Mar. 10:29, 30; Juan 13:35). Kiajsikamatij ke kemansa amo tikijtouaj teisa kemej tiknekij.

12, 13. ¿Toni techmachtia tein kinpanok Nehemías uan Jonás?

¹² Maj tikelnamikikan seki neskayomej tein moajsij itech Biblia tein uelis techpaleuiskej maj amo timouikanok. Maj achto ika titajtokan Nehemías, akin kitekitiliaya se ueyi tekiuaj. Keman kikakik ke tepamit tein kiyoualouaya Jerusalén uan ipuertas uejueliujtoyaj, tayokoyak (Neh. 1:1-4). Maj tiknemilikan keniuj semi mouik keman tekiuaj kitajtanij keyej tel tayokoxtoya. Achto ke kinankiliskia, Nehemías ijsiujka kichiuak se netataujtil. Yejua ika, tekiuaj semi kipaleuij ixolal Dios (Neh. 2:1-8). Tein kichiuak Nehemías techmachtia ke motelneki se kichiuas netataujtil achto ke se tanankilis. Maj no titanemilikan itech tein kipanok Jonás. Keman Jiova kinauatij maj kinnojnotsati akin nemiaj Nínive, motelmoujtij uan yajki oksekopa (Jon. 1:1-3). Sayoj ke ika inepaleuil Dios, kichiuak tein kinauatij uan itajtoluan kintelpaleuij akin ompa nemiaj (Jon. 3:5-10). Tein kipanok Jonás techmachtia ke Jiova uelis techpaleuis maj tiktekitilikan maski titelmouiskej. Tein melauj, tokniuan amo semi techmoujtiaj kemej ninivitas.

¹³ ¿Toni tayolmajxitilis techpaleuis maj titanankilikan kemej tikinyolchikauaskej tokniuan? Maj tikitakan seki.

14. 1) ¿Keyej moneki kuali timomachtiskej tein moitas itech nechikolmej? 2) ¿Kemanian uelis timomachtiskej?

¹⁴ Maj timomachtikan tein moitas itech nochi nechikolmej. Okachi amo timouiskej titanankiliskej komo achto kuali timomachtiaj (Prov. 21:5). Melauak ke tataman kemej timomachtiaj. Eloise, se tokniuj siuat akin kipia panoua 80 xiujmej uan amo nemiok inamik, peua momachtia amaix Tanejmachtijkej ipeujyan semana. Yejua kijtoua: “Okachi nechyolpaktia nechikolmej komo nimomachtia seki tonalmej achto”. Se tokniuj siuat akin monotsa Joy, akin tekiti nochi tonalmej, momachtia amaix Tanejmachtijkej se tonal achto ke mochiuas nechikol porin kijtoua ke kiuelita kielnamiktos tein momachtij. Ike, se tokniuj tayekankej akin kipia miak tekit uan no precursor, kijtoua: “Nikita ke okachi nechpaleuia komo nimomachtia tejtepitsitsin itech semana, uan amo nochi sayoj sepa”.

15. ¿Toni techpaleuis maj kuali timomachtikan tein moitas itech se nechikol?

¹⁵ ¿Keniuj uelis kuali timomachtiskej tein moitas itech se nechikol? Yekinika moneki tiktajtaniskej Jiova iyektikatsin espíritu (Luc. 11:13; 1 Juan 5:14). Ompa, itech seki minuto maj tikitakan itokay tamachtilis, tanemililmej tein tayekantokej, taixkopimej uan recuadros. Satepan, maj tipeuakan tikitakan sejse párrafo uan maj tikixtajtoltikan nochi tajkuilolmej itech Biblia tein tiueliskej. Maj titanemilikan itech tamachtilis, okachiok itech tanemililmej tein tikuelitaskiaj tikijtoskej keman titanankiliskej. Komo okachi kuali timomachtiaj, okachi techpaleuis tamachtilis uan okachi amo ouij techkisas titanankiliskej (2 Cor. 9:6).

16. ¿Toni nepaleuilmej tikonpia tejuatsin, uan keniuj tikontekitiltia?

¹⁶ Maj tiktekitiltikan nepaleuilmej itech tepos tein tikpiaskej. Jiova itechkopa inechikol techmakatok miak nepaleuilmej tein techpaleuiaj maj ika timomachtikan. Ika JW Library^® ueli tiktemouiaj amaixmej tein ika titamachtiaj itech teléfono oso tableta. Ijkon, uelis timomachtiskej, oso sayoj tikixtajtoltiskej oso tikakiskej tamachtilismej, keman tiknekiskej uan kampa tiknekiskej. Sekin ika momachtiaj keman moseuiaj inintekipan oso kampa momachtiaj, oso keman yajtokej kansaika. Uan no, ika Watchtower Library uan BIBLIOTECA ITECH TEPOS Watchtower^™, okachi amo ouij se motelmachtis tein okachi se kimatisneki.

17. 1) ¿Keyej semi tapaleuia maj tikpiakan miak tanankililmej? 2) ¿Toni mitsonmachtij video Kuali ximouika iuan Jiova: Kuali ximomachti tein titanankilis?

¹⁷ Komo ueli, maj tikpiakan miak tanankililmej itech se tamachtilis. ¿Keyej? Porin amo nochipa techmakaskej tanankilil keman timomaajokuiskej. Xa oksekin no momaajokuiskej uan akin kiixyekana tamachtilis xa kiluis okse maj tanankili. Uan no, xa amo semi miakej kinmakas tanankilil uan ijkon nechikol tamis itech tiempo tein ixyetok. Yejua ika maj amo tikualanikan nion maj timosenkauakan komo amo ueli titanankiliaj itech yekinika párrafos. Komo tikpiaj miak tanankililmej okachi miakpa uelis timomaajokuiskej. Se taman tein uelis tikchiuaskej yejua tikixtajtoltiskej se tajkuilol itech Biblia. Sayoj ke, komo ueli, maj timomachtikan se tanankilil kampa tikijtoskej tein tikajsikamatkej.b

18. ¿Keyej moneki amo tiuejkauaskej keman titanankiliskej?

¹⁸ Maj amo uejkauakan totanankililuan. Miakpa, tanankililmej tein amo uejkauaj uan tein amo ouijkej yejua tein okachi teyolchikauaj. Yejua ika, keman titanankiliskej, maj tikixtalikan maj amo pano treinta segundos (Prov. 10:19; 15:23). Semi moneki maj akin uejkaujya peuak tanankiliaj kitemakakan se kuali neskayot ika nejin. Komo kitemakaj tanankililmej tein ouijkej uan uejkauaj, xa oksekin amo kinekiskej momaajokuiskej, porin kinemiliskej ke amo uelis tanankiliskej kemej yejuan. Uan no keman tanankililmej amo uejkauaj, okachi miakej uelis tanankiliskej. Komo tejuan yekinika titanankilitij, okachiok moneki maj sayoj tiknankilikan netajtanil tein kipia párrafo, uan amo maj tiktemokan tikijtoskej nochi tanemililmej tein kipia. Keman momelauakya tanemilil tein tayekantok, uelis tikijtoskej okseki tanemililmej (xikonita kampa kijtoua “¿Toni uelis nitanankilis?”).

19. ¿Keniuj uelis techpaleuis akin kiixyekana tamachtilis, sayoj ke toni moneki tikchiuaskej?

¹⁹ Maj tikiluikan akin kiixyekana tamachtilis ke tikuelitaskiaj titanankiliskej itech se párrafo tein tikixpejpenkej. Komo tiknemiliaj tikchiuaskej nejin, maj iuan titajtokan tokniuj achto ke peuas nechikol. Keman ajsis itech párrafo, maj niman timomaajokuikan kemej uelis techitas.

20. ¿Keniuj nechikolmej tamatij kemej keman tisentakuaj iniuan totasojikniuan?

²⁰ Nechikolmej tamatij kemej keman tisentakuaj iniuan totasojikniuan. Komo seki tokniuan techyoleuaj maj iniuan titakuatij uan techiluiaj maj tikuikakan teisa tein amo ouij se kichijchiua, ¿toni tikchiuaskej? Xa tepitsin tiyolmouiskej, sayoj ke timochikauaskej uan tikuikaskej tein nochin kiueliliskej. Itech nechikolmej, Jiova yejua akin techyoleua, uan techchijchiuilia miak taman tein kuali (Sal. 23:5; Mat. 24:45). Yejuatsin kiyolpaktia maj tiktemakakan teisa, tein okachi kuali tein uelis tiktemakaskej. Yejua ika, maj kuali timomachtikan uan maj titanankilikan nochipa keman tiueliskej. Ijkon, amo sayoj tikseliskej tein Jiova techmaka, ta no titapaleuiskej maj oksekin no kiselikan.