Keniuj tikinpaleuiskej akin amo kinyolnotsa kitemoskej Dios

1. ¿Toni yankuixtok mopatani itech seki altepemej?

MIAKEJ nochipa kipianij inintaneltokalis. Sayoj ke yankuixtok mopatani nejon. Axkan okachi momiakiliaj akin amo kipiaj se taneltokalis.b Itech seki altepemej, okachi onkakej akin kijtouaj ke amo pouij itech se taneltokalisc (Mat. 24:12).

2. ¿Keyej okachi momiakiliaj akin amo kipiaj se taneltokalis?

² ¿Keyej axkan okachi momiakiliaj akin amo kipiaj se taneltokalis? Sekin xa sayoj kitemouaj moyolpaktiskej oso kiyektaliskej ininkuejmoluan (Luc. 8:14). Oksekin amo kineltokajok Dios. Sekin kemaj, sayoj ke kinemiliaj ke amo taixejekol maj se poui itech se taneltokalis, ke amo tapaleuiaok uan ke amo mouika ika tein kiajsinij tamatinij. Xa kinkakilianij tamachtianij, inintasojikniuan uan kampa moteixmatiltia miak taman ke nemilis iselti peuak. Sayoj ke amo semi kikakij tein kinpaleuis maj kineltokakan Dios. Oksekin kinkuejmoloua kiitaskej keniuj tayekananij itech taneltokalis sayoj kitemouaj kipiaskej tanauatil uan tomin. Uan itech seki altepemej, tekiuanij amo kinkauaj taltikpakneminij maj taueyichiuakan kemej kinekij.

3. ¿Keniuj techpaleuis nejin tamachtilis?

³ Jesús technauatij: “Xikinnextilikan nochi in taltikpakuani ma [...] mochiuakan nomomachtijkauan” (Mat. 28:19). ¿Keniuj uelis tikinpaleuiskej akin amo kipiaj inintaneltokalis maj kitasojtakan Dios uan maj mochiuakan imomachtijkauan Cristo? Maj tikelnamikikan ke keman tikinnojnotsaskej taltikpakneminij tataman kemej tanankiliskej porin tataman kampa moskaltijkej. Kemej neskayot, xa se akin kayot Europa taman technankilis porin miakej tepitsin kiixmatij Biblia uan kikakinij ke Dios kichijchiuak nochi. Sayoj ke miakej akin kayomej Asia amo semi kiixmatij Biblia oso nion tepitsin uan xa amo kineltokaskej ke nemi Dios. Nejin tamachtilis techpaleuis maj tikintaneltoktikan akin seseko kayomej oso kipiaj tataman taneltokalis.

MAJ AMO TIKNEMILIKAN KE AMO TIKINTANELTOKTISKEJ

4. ¿Keyej moneki tikpiaskej se kuali tanemilil?

⁴ Maj tikpiakan se kuali tanemilil. Xijxiujtika, akin amo kipiayaj se taneltokalis mochiuaj itaixpantijkauan Jiova. Miakej ipa kuali monejnemiltiayajya uan kinkuejmolouaya maj taneltokalismej amo kichiuanij kemej Biblia tamachtia, sayoj ke oksekin amo chipaujkanemiaj. Tel miakej monekik kikauaskej vicios. Ika inepaleuil Jiova, uelis tikinajsiskej akin kinekij kipiaskej nemilis nochipaya (Hech. 13:48; 1 Tim. 2:3, 4).

5. ¿Toni tapaleuia maj seki taltikpakneminij kuali techkakikan?

⁵ Maj tikualtakamej uan maj kuali tiknemilikan tein tikijtoskej. Miakpa, taltikpakneminij kuali techkakij amo ika tein tikiniluiaj, ta porin keniuj tikiniluiaj. Kiuelitaj maj tikualtakamej uan maj ininka timotekipachokan. Amo tikinchikaujkauiaj maj techkakikan, ta tiktemouaj tikajsikamatiskej keyej amo kipiaj se taneltokalis. Sekin amo kiuelitaj ika tajtoskej taneltokalis iniuan akin amo kinixmatij. Oksekin amo kuali kiitaj maj se kintajtani ox kineltokaj Dios. Uan oksekin pinauaj maj kinitakan ke kiixtajtoltijtokej Biblia, okachiok iuan se itaixpantijkauj Jiova. Akin yeski akin iuan titajtoskej, tiknekij maj kuali momachili (2 Tim. 2:24).

6. ¿Keniuj Pablo kinnojnotsak tataman taltikpakneminij uan keniuj uelis tikchiuaskej kemej yejua?

⁶ ¿Toni uelis tikchiuaskej komo tikitaj ke aksa amo kiuelita maj ika tiknojnotsakan Biblia, Dios oso taneltokalis? Maj tikchiuakan kemej tatitanil Pablo. Keman kinnojnotsak judíos ika kintanemililtij iTajtol Dios. Sayoj ke, keman kinnojnotsak tamatinij griegos ompa Areópago, amo kiniluij ke ika tajtojtoya iTajtol Dios (Hech. 17:2, 3, 22-31). ¿Keniuj uelis tikchiuaskej kemej yejua? Komo titajtouaj iuan akin amo kineltoka tein Biblia kijtoua, xa techpaleuis maj amo tikiluikan ke ika titajtojtokej. Komo tiknemiliaj ke akin tiknojnotstokej amo kineki maj kiitakan ke tikixtajtoltilijtokej Biblia, maj tiknextilikan kemej amo kiitaskej, uelis itech tepos tein tikuikatinemij.

7. Kemej kijtoua 1 Corintios 9:20-23, ¿toni uelis techpaleuis maj tikchiuakan kemej tatitanil Pablo?

⁷ Maj titeajsikamatikan uan maj titekakikan. Moneki tiktemoskej tikajsikamatiskej keyej taman tanemiliaj taltikpakneminij (Prov. 20:5). Maj oksepa tikitakan ineskayo Pablo. Yejua katka judío uan monekik kipatas kemej kinnojnotsaya akin amo katkaj judíos porin amo semi kimatiaj tein kijtoua Biblia uan amo no kiixmatiaj Jiova. No ijkon, komo tiknekij tikinajsikamatiskej akin tikinnojnotsaj, xa monekis okachi tiktemoskej tamachtilis oso tikiluiskej se tokniuj akin kuali tanojnotsa maj techpaleui (xikonixtajtolti 1 Corintios 9:20-23).

8. ¿Keniuj uelis tipeuaskej ika titajtoskej Biblia?

⁸ Maj tikixtalikan tikinajsiskej akin kinekij kiixmatiskej Dios (Mat. 10:11, TNM). Yejua ika, moneki tikinpaleuiskej maj kijtokan tein kinemiliaj uan maj kuali tikinkakikan. Se tokniuj akin kayot Inglaterra kintajtania taltikpakneminij toni kinemiliaj ke tapaleuis maj namikuanij yolpakikan, maj tetatmej kuali kinojtokaltikan ininkoneuan oso maj se kixiko keman tetajyouiltiaj. Satepan ke tanankiliaj, tokniuj kintajtania: “¿Keniuj tikonita nejin tayolmajxitilis tein moijkuiloj kemej ome mil xiuit achto?”. Ompa, ika icelular kinnextilia seki textos tein kinamiki maski amo kiniluia ke moajsij itech Biblia.

MAJ TIKINPALEUIKAN MAJ KITEMOKAN DIOS

9. ¿Keniuj uelis tikinpaleuiskej akin amo kinekij ika tajtoskej Dios?

⁹ ¿Keniuj uelis tikintaneltoktiskej akin amo kinekij ika tajtoskej Dios? Miakej kiuelitaj ika tajtoskej tein onkak itech taltikpak uan iluikak, yejua ika ueliskia tikijtoskej: “Xa tikonmati ke miak teposmej tein tamatinij kichijchiuanij kikixtianij itech se tapialtsin oso okseki taman tein ipa moajsi itech taltikpak. Kemej neskayot, akin kichijchiuaj micrófonos kiitaj keniuj takakij tapialmej uan akin kichijchiuaj cámaras kiitaj keniuj chijchiujtok ininixtololo. ¿Tikonnemilia ke nejon tapialtsin uan nochi tein onkak sayoj ijkon nesik oso aksa kichijchiuak?”. Satepan ke technankilis, ueliskia tikiluiskej: “Keman ingenieros momachtiaj keniuj takaki se tapialtsin uan keniuj chijchiujtok iixtololo, ¿amo momachtijtokej itachijchiualis aksa? Nikuelitak tein se tajkuilojkej tajtanik: ‘Akin kichiuak maj titakakikan, ¿amo ueli takaki? Akin kichiuak maj titachiakan, ¿amo ueli tachia?’. No kijtoj ke akin kichiuak nochi nejon no techmatiltia miak taman. Seki tamatinij kijtouaj ke nejon melauak” (Sal. 94:9, 10). Ompa, ueliskia tiknextiliskej taltikpaknenkej se video tein moajsi itech jw.org^® itech taxelol “Opiniones sobre el origen de la vida”, kampa kijtoua “Entrevistas y experiencias” (xikontemo PUBLICACIONES > VIDEOS). Oso ueliskia tikmakaskej folleto ¿Es la vida obra de un Creador? oso folleto El origen de la vida. Cinco cuestiones dignas de análisis.

10. ¿Keniuj no uelis tipeuaskej titajtoskej iuan akin amo kineki ika tajtos Dios?

¹⁰ Tel miakej kinekij okachi kuali nemiskej satepan. Sayoj ke miakej mouij maj taltikpak ixpoliui oso maj amo ueliok itech se nemi. Se tokniuj takalpanojkej ompa Noruega kijtoua ke miakpa akin amo kinekij ika tajtoskej Dios, kiuelitaj ika tajtoskej tein mochiujtok itech taltikpak. Satepan ke kitajpaloua taltikpaknenkej, kitajtania: “¿Tikonnemilia ke okachi kuali tinemiskej satepan? ¿Akoni uelis kichiuas nejon? ¿Akin tekitij itech política, tamatinij oso okse aksa?”. Satepan ke kinankiliaj, kiixtajtoltia oso ika tajtoua se texto tein kinextia keniuj tinemiskej satepan. Sekin kinyolnotsa maj Biblia kijto ke taltikpak amo ixpoliuis uan ke akin yolkualmej nochipaya itech nemiskej (Sal. 37:29; Ecl. 1:4).

11. 1) ¿Keyej moneki tikpapataskej tein ika tipeuaj titanojnotsaj? 2) Kemej kijtoj Pablo itech Romanos 1:14-16, ¿toni moneki tikchiuaskej?

¹¹ Semi techpaleuis komo tikpapataj tein ika peua tikinnojnotsaj taltikpakneminij. ¿Keyej? Porin sejse taman kemej tanemilia. Tein aksa uelis kiyolnotsas okse xa amo. Sekin kinekij ika tajtoskej Dios oso Biblia, sayoj ke oksekin okachi kuali techkakij komo achto ika tikinnojnotsaj okse taman. Moneki tikinnojnotsaskej nochin maski tataman kemej tanemiliskej (xikonixtajtolti Romanos 1:14-16). Uan maj amo keman tikelkauakan ke Jiova kichiua maj iuan motoki akin kitasojta tein melauak (1 Cor. 3:6, 7).

KENIUJ TIKINNOJNOTSASKEJ IKA BIBLIA AKIN AMO KINELTOKAJ DIOS

12. ¿Toni techpaleuis maj iniuan titajtokan akin kayomej Asia akin amo kinemilianij ox yekmelauj nemi se akin tachijchiuak?

¹² Noyampa taltikpak, miakej tokniuan tajtouaj iniuan akin amo kineltokaj Dios. Sekin kayomej kampa tekiuanij amo kinkauaj taltikpakneminij maj taueyichiuakan kemej kinekij. Itech miak altepemej ompa Asia, miakej amo keman kinemilianij ox yekmelauj nemi se akin tachijchiuak. Sekin kinyolnotsa kimatiskej uan keman kintajtaniaj ox kinekij momachtiskej Biblia, kijtouaj ke kemaj. Sayoj ke oksekin, yekinika amo kinekij kimatiskej tein amo keman kikaktoyaj. ¿Keniuj uelis tikintaneltoktiskej? Seki tokniuan kiitanij ke tapaleuia maj peua se kinnojnotsa ika tein yeski taman, maj se kintajtani keniuj yetokej uan satepan keman tikitaskej ke ueli, maj tikiniluikan keniuj techpaleuij tikchiuaskej se taman tein Biblia tayolmajxitia.

13. ¿Toni uelis tapaleuis maj taltikpakneminij kinekikan ika tajtoskej Biblia? (Xikonita taixkopin ipeujyan amaix.)

¹³ Tein miakej kinyolnotsa yejua tein Biblia tayolmajxitia (Ecl. 7:12). Ompa Nueva York, se tokniuj siuat akin kinkalpanoua akin tajtouaj chino mandarín kijtoua: “Nimochikaua ininka nimotekipachos uan nikinkakis. Komo nikmati ke yekin nemikoj itech altepet, nikintajtania keniuj kinyajtok, ox kiajsinijya tekit uan ox kuali kinselianij”. Kemansa, nejon kipaleuiani maj ika kinnojnotsa Biblia. Keman kiita ke ueli, kintajtania: “¿Toni tikonnemilia ke tapaleuiskia maj tinochin kuali timouikakan? Nikuelitaskia nimitsonnextilis tein Biblia tayolmajxitia. Kijtoua: ‘Se kipeualtis se neteuilis kemej yeskia se kikajkauaskia miak at tein sentiliujtoya; achto ke peuas neteuilis, xiyouj’. ¿Tikonnemilia ke nejin tayolmajxitilis uelis techpaleuis maj kuali timouikakan iniuan oksekin?” (Prov. 17:14). Nejon techpaleuis maj tikmatikan akonimej kuali techseliskej keman oksepa tikinkalpanoskej.

14. ¿Toni kichiua se tokniuj akin kayot Lejano Oriente tein ika kinpaleuia akin kijtouaj ke amo kineltokaj Dios?

¹⁴ ¿Toni uelis tikiniluiskej akin kijtouaj ke amo kineltokaj Dios? Ompa Lejano Oriente, se tokniuj akin kimati keniuj kinnojnotsas akin amo kipiaj se taneltokalis, kijtoua: “Miakpa, nikan keman aksa kijtoua ke amo kineltoka Dios kijtosneki ke kiita ke amo tapaleuia maj se kinueyichiua tiotsitsin. Nikiluia ke nejua no nikneltoka ke tiotsitsin amo melaujkej, ta sayoj kinchijchiuanij. Nikixtajtoltilia Jeremías 16:20, kampa kijtoua: ‘¿Uelis taltikpaknenkej mochijchiuilis diosmej ta yejuan amo yekmelauj diosmej?’. Satepan, niktajtania keniuj uelis tikmatiskej katiyejua dios akin melauak uan katiyejua diosmej tein sayoj kinchijchiuanij. Kuali nikaki tein nechnankilia uan nikixtajtoltilia Isaías 41:23: ‘Xiktematiltikan tein mochiuas satepan, ijkon tikmatiskej ke namejuan nandiosmej’. Satepan, niknextilia se taman tein Jiova motenkaua kichiuas satepan”.

15. ¿Toni techmachtia tein kichiua se tokniuj akin kayot Este de Asia?

¹⁵ Maj tikitakan tein kichiua se tokniuj akin kayot Este de Asia keman oksepa kinkalpanoua taltikpakneminij. Yejua kijtoua: “Nikinnextilia keniuj Biblia semi tapaleuia, keniuj mochiuani tein ompa ijkuiliujtok uan ika nitajtoua keniuj chijchiujtok tein onkak itech taltikpak uan iluikak. Satepan, nikinpaleuia maj kiitakan keniuj nejon kinextia ke moajsi se Tachijchiujkej. Keman taltikpaknenkej peua kineltoka ke nejon melauak, niknextilia itech Biblia kampa ika tajtoua Jiova”.

16. Kemej kijtoua Hebreos 11:6, ¿keyej akin tikinmachtiaj ika Biblia moneki kineltokaskej Dios uan Biblia uan keniuj uelis tikinpaleuiskej?

¹⁶ Keman tikinmachtiaj akin amo kipiaj se taneltokalis, moneki okachi tikinpaleuiskej maj kineltokakan ke Dios nemi (xikonixtajtolti Hebreos 11:6). No moneki tikinpaleuiskej maj kineltokakan ke Biblia tapaleuia. Yejua ika, xa monekis maj miakpa ika titajtokan seki tamachtilis tein kipia. Keman tikmachtiskej, xa monekis maj tiksenitakan tein kinextis ke Biblia iTajtol Dios. Kemej neskayot, uelis tikitaskej keniuj mochiuani tein achto kijtojka Biblia, keniuj tein kijtoua mouika ika tein kiajsinij tamatinij oso keniuj techpaleuia.

17. ¿Toni uelis panos komo tikintasojtaj taltikpakneminij?

¹⁷ Keman tikintasojtaj taltikpakneminij maski amo kipiaskej se taneltokalis tikinpaleuiaj maj kitojtokakan Cristo (1 Cor. 13:1). Keman tikinmachtiaj ika Biblia tiktemouaj maj kiajsikamatikan ke Dios techtasojta uan kineki maj no tiktasojtakan. Xijxiujtika, moauiaj tel miakej akin achto amo semi oso nion tepitsin kinyolnotsaya taneltokalis sayoj ke momachtianij kitasojtaskej Dios. Yejua ika, maj tikpiakan se kuali tanemilil uan maj nochin tikinnextilikan ke tikintasojtaj uan ke ininka timotekipachouaj. Maj tikinkakikan uan maj tiktemokan tikinajsikamatiskej. Maj kiitakan ke tejuan tiktojtokaj Cristo, ijkon yejuan no kichiuaskej.