¿Tikonelnamiki?
¿Uelis tikonnankilis nejin netajtanilmej tein kiskej itech tamachtilismej itech amaixmej Tanejmachtijkej xiuit 2019?
¿Toni kijtosneki nejin tein Dios kijtoj: “Nion se tepos tein kichijchiuaskej tein ika mitsixnamikiskej, amo kualtias”? (Is. 54:17).
Uelis titakuaujtamatiskej ke Jiova techmatampauis ijkon kemej se tepamit techmatampauia keman chikauak kiouaejeka (Is. 25:4, 5). Akin techtauelitaj amo keman uelis kichiuaskej maj titajyouikan nochipaya (w19.01, página 6, 7).
¿Keniuj monextia imelaujkayo Dios ika tein kinchiuilij cananeos uan israelitas akin amo tatakamatkej?
Jiova kintatsakuiltij akin pitsotik auilnemiaj uan akin kintajyouiltiayaj siuamej uan konemej akin amo ueliaj mopaleuiayaj. Sayoj ke, kintiochiuak israelitas keman amo kikaujkej uan kichiujkej tein melauak (w19.02, página 22, 23).
¿Toni tikchiuaskej komo se akin amo itaixpantijkauj Jiova motataujtia toixtenoj?
Uelis amo teyi tikijtoskej uan maj tiknextikan ke titapoujkaitaj, sayoj ke amo tikijtoskej “amén” nion timomakitskiskej iniuan oksekin keman mochiujtos netataujtil. Uelis tikichtakachiuaskej se netataujtil (w19.03, página 31).
¿Keyej tel amo kuali maj ininka mauiltikan konemej?
Porin kitajyouiltia akin ika mauiltiaj, kintajyouiltia tokniuan uan akin kichiua kitapanauilia inintanauatil tekiuanij uan motajtakolmaka iixpan Dios. Itech xolalmej kampa tekiuanij tanauatiaj maj moteluili akin ika mauiltia se konet, tayekananij tatakamatij (w19.05, página 9, 10).
¿Keniuj uelis tikyankuikataliskej totanemilil?
Moneki tikchiuaskej eyi taman: maj tiktataujtikan Jiova, maj titanemilikan uan maj tikitakan toni moneki tikpataskej uan maj tikinixpejpenakan kuali tasojiknimej (w19.06, página 11).
¿Toni moneki tikchiuaskej axkan tein techpaleuis keman techtajyouiltiskej?
Moneki maj okachi kuali timouikakan iuan Jiova, maj senkis tikneltokakan ke techtasojta uan ke amo keman techkauas, maj mojmostaj tikixtajtoltikan Biblia uan maj nochipa timotataujtikan. Moneki maj senkis tikneltokakan ke Dios kichiuas tein motenkaujtok itechkopa iTekiuajyo uan maj tiuelikan oso maj tikmatikan textos tein okachi tikuelitaj uan nekuikatilmej tein ika tikueyichiuaj Jiova (w19.07, páginas 2-4).
¿Keniuj uelis tikinpaleuiskej tochankauan maj momakixtikan?
Moneki maj tikinajsikamatikan, maj kiitakan ke kuali timonejnemiltiaj, maj amo tiyolijsiuikan uan maj tikualtakamej (w19.08, páginas 15-17).
Kemej kijtoua Mateo 11:28, ¿keniuj techyolseuia Jesús?
Keman akin techixyekanaj techtasojtaj, keman titekitij iniuan totasojikniuan uan keman tikchiuaj okachi kuali tekit (w19.09, página 23).
¿Keniuj Dios techmaka chikaualis uan kichiua maj tiknejnekikan tiktekitiliskej? (Filip. 2:13).
Keman tikixtajtoltiaj Biblia uan itech titanemiliaj, Dios techmaka chikaualis uan kichiua maj tiknejnekikan tiktekitiliskej. Iespíritu uelis kichiuas maj okachi kuali tiktekitiltikan tein ipa ueli tikchiuaj (w19.10, página 21).
¿Toni taman moneki tikchiuaskej achto ke tikixtaliskej tikchiuaskej teisa?
Makuil taman: maj kuali timomachtikan, maj tiktajtanikan tamatilis Dios, maj tikitakan keyej tikixtaliaj teisa, maj senkis tikixtalikan tein tikchiuaskej uan maj tikajsikamatikan ke amo nochi ueli tikchiuaj (w19.11, páginas 27-29).
Keman Satanás kinojnotsak Eva, ¿kiluij ke tikpiaj teisa tein kisentoka yoltok satepan ke timomikiliaj?
Nesi amo. Satanás amo kiluij Eva ke momikiliskia uan kisentokaskia nemis kampa nemij espíritus. Kiluij ke nochipa yoltoskia. Nochi taman tein amo melauak tein moneltokaya ixpoliuik keman mochiuak tetsaujkakiouit. Xa peuak moneltoka ke tikpiaj teisa tein kisentoka yoltok achto ke Dios kichiuaskia maj taltikpakneminij akin kichijchiujtoyaj Babel neminij noyampa taltikpak (w19.12, página 15).