Okachi xitetasojtakan
1. ¿Toni moneki tikchiuaskej tinochin?
1 Kemej tipouij itech inechikol Dios, tinochin moneki titapaleuiskej maj kuali timouikakan itech nechikol (1 Ped. 1:22; 2:17). Nejon mochiua keman tiknextiaj ke okachi tikintasojtaj oksekin (2 Cor. 6:12, 13). ¿Keyej moneki kuali tikinixmatiskej nochin tokniuan?
2. ¿Keyej moneki kuali timouikaskej iniuan tokniuan?
2 Okachi kuali timoyekuikaj. Ijkon kemej okachi tikinixmatij tokniuan, okachi tikinpoujkaitaj porin takuaujtamatij, taxikouaj uan kinextiaj okseki kualneskayomej. Ininnepololuan amo semi techkuejmoloua, uan okachi kuali timoyekuikaj. Keman kuali timoixmatij, tikmatij keniuj okachi kuali timoyolchikauaskej uan timoyolseuiskej se iuan okse (1 Tes. 5:11). Uelis timosenyolchikauaskej uan ijkon tikixnamikiskej nochi tein amo kuali tein onkak kampa taixyekantok Satanás (Col. 4:11). Kemej itech nejin itamian tonalmej onkak miak taman tayejyekolis, ¿melauj ke tiktasojkamatij tikinpiaskej kuali totasojikniuan akin kitekitiliaj Jiova? (Prov. 18:24.)
3. ¿Keniuj uelis tikinyolchikauaskej oksekin?
3 Akin okachi kuali iniuan timouikaj senkis techyolchikauaj uan techyolseuiaj keman tikpanouaj uejueyi tayejyekolis (Prov. 17:17). Se tokniuj siuat akin miakpa kimachiliaya ke amo teyi chiujkej kielnamiki: “Nikinpiaya notasojikniuan akin nechiluiayaj toni kualneskayomej nikpia uan ijkon nechpaleuiayaj maj kuali nitanemili”. Tikinpiaskej totasojikniuan kemej nejin se itatiochiualis Jiova (Prov. 27:9).
4. ¿Keniuj uelis okachi kuali timouikaskej iniuan tokniuan?
4 Maj timotekipachokan ininka oksekin. ¿Keniuj okachi tikintasojtaskej tokniuan? Amo sayoj maj tikintajpalokan itech nechikolmej, ta maj timochikauakan iniuan titajtoskej ika se taman tein tapaleuis. Maj tiknextikan ke ininka timotekipachouaj, sayoj ke maj amo timokalakikan itech ininnemilis (Filip. 2:4; 1 Ped. 4:15). Okse taman kemej tiknextiaj ke ininka timotekipachouaj yejua keman tikinyoleuaj maj takuatij tochan (Luc. 14:12-14). No uelis tikixtaliskej se tonal tisentanojnotsaskej (Luc. 10:1). Keman tejuan tiktemouaj okachi kuali tikinixmatiskej tokniuan, titapaleuiaj maj nochin kuali timouikakan itech nechikol (Col. 3:14).
5. ¿Keniuj uelis tikintemoskej okachi totasojikniuan?
5 ¿Sayoj tikintemouaj totasojikniuan iniuan touampoyuan oso akin tanemiliaj kemej tejuan? Amo kuali yeskia maj nejon kichiua maj amo tikintemokan okseki tokniuan kemej totasojikniuan. Kemej David uan Jonatán ijkon kemej Rut uan Noemí tel kuali mouikakej maski amo uampoymej katkaj uan tataman nemilis kipiayaj (Rut 4:15; 1 Sam. 18:1). ¿Uelis tikintemoskej okachi totasojikniuan? Komo ijkon tikchiuaj, tikseliskej tatiochiualismej tein techtelyolpaktis.
6. ¿Keniuj techpaleuia okachi tikintasojtaskej tokniuan?
6 Komo okachi tikintasojtaj oksekin, timosenyolchikauaj uan titapaleuiaj maj onka yolseuilis itech nechikol. Uan no, Jiova techtatiochiuia porin tiknextiaj ke tikintasojtaj tokniuan (Sal. 41:1, 2; Heb. 6:10). Hasta kampa tiueliskej, ¿uelis tikixtaliskej okachi kuali tikinixmatiskej okseki tokniuan?