“Tejua timochiuaskia se kuali precursor”

1. ¿Keniuj se tokniuj siuat kiitaya tekit kemej precursor?

¹ “Amo ueliskia nikajsiskia okse tekit tein nechualkuiliskia tel ueyi yolpakilis, niono tatiochiualismej tein axkan nikpia.” Ijkon kijtoj Kathe B. Palm, se precursora tein miak xiujmej uejuejka tanojnotstinemik itech altepemej tein pouia Chile ompa Sudamérica. Ika nochi taman tein kiualkui nejon tekit, xa se tokniuj mitsoniluij: “Tejua timochiuaskia se kuali precursor”.

2. Xikonijto keyej keman tikchiuaj itekiyo Dios techualkuilia ueyi yolpakilis.

² Kiualkui ueyi yolpakilis. Jesús akin techkauilij okachi kuali neskayot, keman kichiuaya itanejnekilis Jiova, kimachiliaya kemej eskia takual tein kimakaya chikaualis (Juan 4:34). Yejika, kimatia toni kijtojtoya keman kiniluij imomachtijkauan ke kipiaskiaj yekmelauj yolpakilis komo kitekitiliaj Jiova. Kemaj, tikpiaj yolpakilis keman senkis tikchiuaj itanejnekilis Dios. Uan keman ika totonal, tochikaualis uan totomin okachi ika tikinpaleuiaj oksekin, no okachi tiyolpakij (Hech. 20:31, 35).

3. ¿Keniuj uelis timomachiliskej komo okachi miak tonalmej titanojnotsaj?

³ Uan no, titekitiskej miak tonalmej itech tanojnotsalis, okachi uelis tikpeualtiskej uan tikyekanaskej nemachtilmej ika Biblia, uan nejon semi techyolpaktis. Uan maski yekinika tikonitas ke amo akin kineki kikakis iTajtol Dios, tikonitas ke okachi moajsij tein kemaj kinekij ijkuak tionmomachtijtias keniuj tiontanojnotsas. Keman tikonuikas kemej se xiuit kemej precursor, no tikonselis ueyi nemachtil itech Escuela tein Kipiaj akin Tekitij kemej Precursor. Nejon semi mitsonpaleuis itech tanojnotsalis (2 Tim. 2:15). Komo tikonsentoka tiontekiti, uelis tikontokas xinach tein mouika iuan iTajtol Dios tein satepan uelis kitemakas itakilo (Ecl. 11:6).

4. ¿Toni moneki kinemiliskej telpochmej tein amo uejkaua kisaskej itech escuela?

⁴ Xiknemili telpoch. Komo tikisatia itech escuela, ¿tiknemilijya toni tikchiuas satepan? Hasta axkan motiempo tikuitok itech escuela uan itech tekit tein mitskauiliaj ompa. ¿Kani tikuis nejon tiempo satepan? Semi kuali eskia komo amo tiknemilia tiktemos se tekit kampa mitskuilis nochi tonalmej. ¿Toni uelis tiknemilis tikchiuas? ¿Keyej amo tikchiua netataujtil uan tikita ox uelis timochiuas precursor regular? Tein axkan timomachtis tikchiuas —kemej tikinnojnotsas akin yeski, tikpanouis ouijkayomej, timochiuas titamachtil uan tiuelis kuali titamachtis— mitspaleuis itech nochi monemilis.

5. ¿Keniuj tetatmej uan tokniuan itech nechikol uelis kinyolchikauaskej oksekin maj tekitikan kemej precursor?

⁵ Namejuan tetatmej, ¿nankichiuaj tein kinpaleuis konemej maj kinekikan tekitiskej kemej precursor? Namotajtoluan uan kuali neskayot tein nankinkauiliskej, kinpaleuis maj kitayekanaltikan tekit tein mouika iuan iTekiuajyo Dios (Mat. 6:33). Ray, tein peuak tekiti kemej precursor keman kisak escuela, kielnamiki: “Nomomaj nochipa kinemilij ke se mochiuas precursor kiualkui ueyi yolpakilis”. Uan nochin tokniuan itech nechikol, no uelis tayolchikauaskej ika imin tajtol uan imin tapaleuil. José tein kayot España, kijtoua: “Tokniuan itech nonechikol kiitayaj ke okachi kuali maj telpochmej tekitikan kemej precursor. Imin tajtoluan tein kinextiaya ke kuali kiitayaj tekit kemej precursor uan tapaleuil tein nechmakakej, necholinij maj okachi ijsiujka nikpeualtiani nejon tekit”.

6. ¿Toni uelis tikonchiuas komo axkan amo kisa itech moyolo tiontekitis kemej precursor?

⁶ Keniuj tikpanouiskej ouijkayomej. Sayoj ke xa aksa kijtoua: “Amo kisa itech noyolo nitekitis kemej precursor”. Komo ijkon tikonmachilia axkan, xikontapoui Jiova uan xikonilui: “Amo nikmati ox nejua uelis nitekitis kemej precursor, sayoj ke nikneki nikchiuas motanejnekilis” (Sal. 62:8; Pro. 23:26). Ompa, xikontemo inepaleuil itech iTajtol uan inechikol. Miakej, achto peujkej tekitij kemej precursores auxiliares, uan kemej kintelyolpaktij, kinolinij maj peuakan tekitikan kemej precursores regulares (Sal. 34:8).

7. ¿Toni uelis tikonchiuas komo tikonmachilia ke amo uelis tikonajxitis 70 horas tein motajtani?

⁷ ¿Uan komo tikonmachilia ke amo uelis tikonajxitis 70 horas tein motajtani itech se metsti? ¿Keyej amo imiuan tiontajtoua oksekin precursores tein no ijkon kimachiliayaj achto? (Pro. 15:22.) Ompa, xikonixtali tataman horarios tein uelis tikonkuis. Xa tikonitas ke amo tel ouij tikonajxitis horas, komo tikonkui tiempo tein tikonkuiskia itech okseki taman tein amo semi moneki (Efe. 5:15, 16).

8. ¿Keyej semi kuali maj tikitakan keniuj timoajsij axkan?

⁸ Xikonita keniuj tionmoajsi axkan. Tonemilis mopatatiuj, uan yejika semi kuali maj tikitakan keniuj timoajsij axkan. Se neskayot, ¿tikonnemilia amo uejkaua tiontajtanis mojubilación? Randy, tein kichiuak nejon achto ke ajsiskia itonal, kijtoj: “Nejon taixejekolis nechpaleuij maj niueli nitekiti kemej precursor iuan nonamik, uan titapaleuitoj okseko kampa onkak okachi miak tekit. Nikselijtok miak tatiochiualismej, uan tein okachi kuali, amo nechkuejmoloua notanemilil”.

9. ¿Toni moneki kiitaskej namikuanij?

⁹ Sekin namikuanij, keman kiitaj keniuj moajsij, kiajsikamatij ke amo moneki tekitiskej omen nochi tonalmej. Kichiuaskej nejon monekis maj amo kipiakan miak taman, sayoj ke nejon amo nenkaj. Inamik John, yankuixtok kikauak tekit kampa monekia yetos nochi tonalmej, uan axkan okachi tekiti itech tanojnotsalis. John kijtoua: “Tel kuali nimomachilia nikmatis ke nonamik nochi tonal kichiujtok itekiyo Dios”.

10. Tein kichiuaj kemej Cristo ¿toni kinolinia maj kinemilikan tekitiskej kemej precursor?

¹⁰ Monextia netasojtalis uan takuaujtamatilis. Tanojnotsalis yejua tein okachi tayekantok, porin Jiova ijkon kitalijtok. Amo uejkaua, nochi tein amo kuali tein axkan mochiujtok senkis ixpoliuis, uan sayoj momakixtiskej akin kiteixmatiltiaj itokay Dios Jiova (Rom. 10:13). Komo ika nochi toyolo tiktasojtaj Dios uan tiktasojkamatiliaj nochi tein techmakatok, techolinis maj tiknekikan titanojnotsaskej ika ueyi tanejnekilis ijkon kemej technauatia iKonetsin (Mat. 28:19, 20; 1 Juan 5:3). Uan no, komo senkis tikneltokaj ke tinemij itamian tonalmej, techolinis maj titanojnotsakan nochi tein uelis achto ke ejkos tamilis, uan amo ika timotaliskej sayoj tiktemoskej yekpanolis (1 Cor. 7:29-31).

11. ¿Keniuj moneki tikonitas komo aksa mitsoniluia ke timochiuaskia se kuali precursor?

¹¹ Se mochiuas precursor regular amo sayoj kijtosneki ke tikseliaj tayoleualis tein techchiuilia inechikol Dios, ta ika nejon tiknextiaj tonetasojtalis iuan Jiova. Yejika, komo aksa mitsoniluia: “Tejua timochiuaskia se kuali precursor”, xikonajsikamati ke uelis tikonchiuas nejon tekit. Ika netataujtil, xikonita ox uelis tionmosentilis imiuan tel miakej tein tekititokej kemej precursores, se tekit tein kiualkui ueyi yolpakilis.

[Tajtolmej itech página 4]

Namejuan tetatmej, ¿nankichiuaj tein kinpaleuis konemej maj kinekikan tekitiskej kemej precursor?

[Tajtolmej itech página 5]

Tanojnotsalis yejua tein okachi tayekantok, porin Jiova ijkon kitalijtok.