¿Uelis oksepa tiontekitis kemej precursor regular?
1. ¿Toni tatiochiualis kipiaj miakej, sayoj ke toni monekik kichiuaskej sekin?
1 Ijkon kemej panotiuj xiujmej, miakej kipiaj tatiochiualis ‘tamachtiskej uan tanojnotsaskej’ kemej precursores regulares (Hech. 5:42). Sayoj ke sekin kipanokej seki taman tein kichiuak maj kikauakan nejon tekit tein semi kinyolpaktiaya. Komo tejuatsin tikonpanok nejon, ¿kemansa tikonitani keniuj tionmoajsi axkan uan tikonixejekouani ox uelis oksepa tikonpeualtis nejon tekit?
2. ¿Keyej tein achto katkaj precursores semi kuali maj kiitakan keniuj moajsij axkan?
2 Mopata tein tikpanouaj itech tonemilis. Xa axkan mopatakya tein achto mitsontsakuiliaya xiontekiti kemej precursor. Se neskayot, komo tikonkauak nejon tekit porin amo tikonajxitiaya 90 horas kemej motajtania itech se metsti, ¿uelis oksepa tiontekitis axkan ke sayoj motajtani 70 horas? ¿Amo miakejok moneki tikontekipanos oso tikonitas mochankauan kemej achto? Se tokniuj siuat akin kikauak tekit kemej precursor porin mokokouaya, uelik oksepa kipeualtij keman kipiaya 89 xiujmej. Kemej amo monekik yas tapajtiloyan panoua se xiuit, momachilij ke kuali oksepa kipeualtiskia nejon tekit.
3. ¿Keniuj kalyetouanij uelis tapaleuiskej maj se akin moajsi kalijtik mochiua precursor?
3 Xa tejuatsin achto amo tiontekitini kemej precursor, sayoj ke se mochankauj kikauak nejon tekit porin monekia kiyekpias xa semej namotatuan tein xiuejya (1 Tim. 5:4, 8). Komo ijkon, tejuatsin oso okse tein moajsi kalijtik, ¿uelis okachi nankipaleuiskej akin kikauak nejon tekit? ¿Keyej amo namosenixejekoltiaj? (Pro. 15:22.) Keman nochin kalyetouanij tapaleuiaj maj semej ueli tekiti kemej precursor, nochin uelis kimachiliskej ke tapaleuijtokej itech nejon tekit.
4. ¿Toni uelis tikonchiuas komo axkan amo ueli tiontekiti kemej precursor?
4 Amo xionmoyolkoko komo tein tikonpanotok axkan amo mitsonkaua oksepa xikonpeualti tekit kemej precursor. Jiova kiyolpaktia xikonnejneki nejon tekit (2 Cor. 8:12). Nochi tein uelik tikonchiuak keman tiontekitik kemej precursor, xikontekitilti axkan itech tanojnotsalis. Ika xiontajto motanejnekilis itech monetataujtiluan uan nochipa xikonita toni mopata itech monemilis (1 Juan 5:14). Xa satepan Jiova kichiuas maj ‘monexti miak tekit tein uelis tikonchiuas’ uan ijkon uelis oksepa tikonpias tatiochiualis tiontekitis kemej precursor regular (1 Cor. 16:9).