Maj nochipa titayoleuakan maj kiselikan se nemachtil ika Biblia
1. ¿Keniuj uelis tiktakamatiskej tanauatil tein ixnesi itech Mateo 28:19, 20?
1 Jesús tanauatij maj tikinchiuakan ‘imomachtijkauan [...] uan maj tikinmachtikanʼ (Mat. 28:19, 20). Yejika, maj nochipa titayoleuakan maj kiselikan se nemachtil ika Biblia, uan amo sayoj itech itamian semana keman ixyetok tikchiuaskej nejon. Axkan tikitatij keniuj uelis tikchiuaskej tein semi techpaleuis.
2. ¿Akonimej uelis se kinyoleuas maj kiselikan se nemachtil ika Biblia?
2 Maj titayoleuakan. Keman okachi titayoleuaj maj kiselikan se nemachtil, okachi uelis tikajsiskej akin kiselis (Ecl. 11:6). ¿Tiontayoleuania? Ompa Estados Unidos, nochin tokniuan itech se nechikol kiixtalijkej kichiuaskej nejon itech nochi metsti. ¡Uelik kipeualtijkej 42 nemachtilmej! No moajsij akin tikonkalpanoua uan kinekij kimatiskej okachi. Amo xikonnemili ke kimatijya ke titamachtiaj ika Biblia. Keman oksepa tikonkalpanos, ¿keyej amo tikoniluia ox kiuelitaskia kiselis se nemachtil? Komo amo kiselia, amo teyi tikpolouaj. Uelis tiksentokaskej tikinkalpanoskej uan xa satepan kinekiskej kiseliskej. Oso no uelis tikontajtanis akin tikonixmati, mochankauan, akin imiuan tiontekiti oso tionmomachtia xa no kiuelitaskiaj momachtiskej ika Biblia mouan. Uan akin momachtijtokya, ¿moajsi se itasojikniuj oso ichankauj tein no kiuelitaskia momachtis?
3. ¿Toni nepaleuil tikpiaj tein ika uelis tikpeualtiskej nemachtilmej ika Biblia uan kemanian uelis tikuiskej?
3 Maj tikuikan nejin nepaleuil. Tratado ¿Tikonuelitaskia tikonmatis itanankililuan netajtanilmej tein motelneki? techtelpaleuia maj tikpeualtikan nemachtilmej ika Biblia. Uelis tikinmakaskej akin kiseliaj amaixmej oso amo. Tel tapaleuia keman titanojnotsaj kampa tanamakaj, itech ojti, ika carta, akin tikinkalpanojtokej uan keman amo akin yetok kalijtik. ¿Keyej amo tikonuika keman tionyoui itech tepos, keman tiontakouati oso tiontekititi? Itamian amat kimelaua ika ome eyi tajtolmej keniuj titamachtiaj ika Biblia uan kinextilia amaix Tamachtia Biblia tein tiktekitiltiaj.
4. ¿Keniuj ika tratado Tikonuelitaskia tikonmatis itanankililuan uelis tikpeualtiskej se nemachtil ika Biblia?
4 ¿Keniuj uelis tikuiskej? Keman tikonmakas tratado taltikpaknenkej, xikonnextili netajtanilmej tein moajsi ipeujyan amat uan xikonijto: “¿Katiyejua tikonuelitaskia tikonmatis?”. Ompa, xikitakan tanankilil tein kitemaka tratado, uan xikonixtajtolti oso xikonijto tanemilil tein kiualkui itamian amat kampa kijtoua keniuj titamachtiaj. Satepan, xikonnextili kani itech amaix Tamachtia Biblia okachi kimelaua nejon tanankilil. Xikonkauili amaix uan xikonilui kemanian nankisentokaskej namomachtiskej.
5. ¿Keyej nochipa moneki titayoleuaskej maj kiselikan se nemachtil ika Biblia?
5 Kampa titanojnotsaj, moajsijok akin kinejnekij momachtiskej tein yekmelauj tamachtia Biblia. Se ueyi yolpakilis teualkuilia se kinpaleuis oksekin maj kiajsikan ojti tein melauak. Uan komo nochipa titayoleuaj maj kiselikan se nemachtil ika Biblia, okachi uelis tikpiaskej nejon yolpakilis (Mat. 7:13, 14).