Maj tiktemokan tikinpaleuiskej oksekin maj mochiuakan imomachtijkauan Jesús
1. ¿Keniuj uelis momakixtiskej taltikpakneminij?
1 Tein mochiuak itech xiujtekit 2014 kinextia ke ixolal Dios kisentoka kiteixmatiltia kuali tanauatilmej ika iTekiuajyo Dios ika yolpakilis uan yolchikaualis (Mat. 24:14). Ika tanojnotsalis kajkalpan, ueyi tekit tein mochiua keman tikmoyauaj tratados oso amatsitsin tein ika titayoleuaj uan tanojnotsalis senteixtenoj, okachi taltikpakneminij ueli tikinmatiltiaj tein Biblia kijtoua. Sayoj ke, moneki tikinpaleuiskej maj mochiuakan imomachtijkauan Jesús ika se nemachtil ika Biblia uan ijkon yejuan uelis momakixtiskej (1 Tim. 2:4).
2. ¿Katiyejua netajtanilmej techpaleuis maj amo tikelkauakan tikiniluiskej taltikpakneminij ox kinekij se nemachtil ika Biblia?
2 Maj amo tikelkauakan tikiniluiskej ox kinekij se nemachtil ika Biblia. Komo aksa kinextia ke kineki kimatis okachi, ¿tiktajtaniaj tein techpaleuis maj oksepa iuan titajtokan uan niman tiktemouaj uan tikiluiaj ox kineki kiselis se nemachtil ika Biblia? ¿Kemanian tiknextijkej keniuj tiktemakaj se nemachtil ika Biblia keman yekinika titakalpanojkej? ¿Kemanian tikiluijkej akin tikuikiliaj amaixmej ox kineki se nemachtil ika Biblia? ¿Tikinnextilianij videos ¿Keyej moneki timomachtiskej Biblia? uan ¿Keniuj mochiua se nemachtil ika Biblia? akin iniuan titekitij oso timomachtiaj, akin nemij ompakauin kampa tinemij, tochankauan uan oksekin akin tikinixmatij? Keman titanojnotsaj ika se taman kampa motaliaj amaixmej, ¿timochikauaj tikinmatiltiskej nochin akin kiuikaj se amaix tein ika titamachtiaj ke no uelis kiseliskej se nemachtil ika Biblia tein amo moixtaua?
3. ¿Toni moneki tikchiuaskej uan ijkon uelis kuali tikinmachtiskej oksekin tein Biblia kijtoua?
3 Jiova uan Jesús techpaleuiaj. Keman Jesús kinnauatij itatojtokakauan maj kinchiuakan imomachtijkauan, kikuik tajtol “xiyakan”. Ijkon kinextij ke moneki timochikauaskej uan tiktemoskej tikinmachtiskej oksekin. Sayoj ke, amo techkauak toselti, ta motenkauak ke touan moajsiskia (Mat. 28:19, 20). Uan no, Jiova amo sayoj techmakani iyektikatsin espíritu, ta no techmakani nepaleuilmej uan technextiliani keniuj tikinmachtiskej oksekin tein kijtoua iTajtol Dios (Zac. 4:6; 2 Cor. 4:7). Uelis tiktajtaniskej Dios maj techmaka chikaualis ijkon kemej tanejnekilis tein techpaleuis maj tikchiuakan nejin tekit tein motelneki (Filip. 2:13).
4. ¿Keyej moneki tiktemoskej tikinchiuaskej imomachtijkauan Jesús?
4 Tikteixmatiltiskej kuali tanauatilmej semi techyolpaktia. Sayoj ke, komo tikpaleuiaj aksa maj kiseli tamachtilis tein melauak uan maj touan moajsi itech “ojti kampa yajtokke in taneltokani para ajsitiue tech ne yek nemilis”, okachi tiyolpakiskej (Mat. 7:14; 1 Tes. 2:19, 20). Uan tein okachi moneki, komo tikinpaleuiaj oksekin maj mochiuakan imomachtijkauan Jesús, tikyolpaktiaj Jiova, akin “amo kineki ma senme ixpoliuikan. Ta, Yejuatsin kimonekiltia ke tinochin ma timoyolnemilikan de totajtakoluan para tikpiaske ne nemakixtilis” (2 Ped. 3:9).