Se taman tein kinmakaj tanojnotsanij
1. ¿Toni tein yankuik peuak mochiua itech xiuit 1938 uan keyej?
1 Itech xiuit 1938, inechikol Jiova peuak kichiua asambleas de zona, tein axkan motokaytia ueyi nechikol tein uejkaua ome tonal, kampa kinyoleuayaj maj yakan seki nechikolmej. ¿Keyej? Amaix Informador (tein axkan motokaytia ITekiyo Dios tein Tikchiuaj) enero de 1939 (itech tajtol inglés) kijtoua: “Ika nejon uejueyi nechikolmej tein mochiua itech iNechikol Dios, Jiova no ika kiyekana tekit tein mouika iuan iTekiuajyo. Tamachtilis tein ompa motemaka motelneki kiseliskej tanojnotsanij tein kinekij kuali kichiuaskej tekit tein kiselijtokej”. Itech xiuit 1938 sayoj moajsiaj 58,000 tanojnotsanij. Uan itech xiuit 2009 moajsiaj panoua chikome millones. Nejin kiyeknextia ke ueyi nechikolmej kintelpaleuijtok tanojnotsanij maj ‘kichiuakan tekit tein kiselijtokejʼ.
2. Itech xiujtekit tein ualas, ¿toni ika motajtos itech ueyi nechikol tein uejkaua ome tonal?
2 ¿Katiyejua eski tema? Tikchiaj ika ueyi tanejnekilis tamachtilis tein peuas motemakas septiembre, uan yolchikaualis tein tikseliskej titanojnotsanij. Tema tein kipias yejua nejin: ‘Namejuan amo nanpoujtinemijok iuan in taltikpakuanijʼ. Nejin motaksaltia itech Juan 15:19. ¿Toni ika motajtos itech tanojnotsmej? Sábado tikakiskej se tanojnots tein techmachtis keniuj techpaleuia titekitiskej kemej precursor oso okseki tekimej. No tikakiskej se tanojnots tein exkan xeliujtok tein technextilis ke moneki maj amo timotajtakolmakakan iuan “ueyi okuilin”, “ueyi siuaauilnenkej” niono ‘uejueyi tanamakanijʼ. Domingo tikakiskej okse tanojnots tein miakkan xeliujtok tein techyolchikauas maj tiktasojtakan Jiova uan amo tein onkak nikan taltikpak. Uan itech okseki tanojnotsmej technextilis keniuj tiksentokaskej tinemiskej kemej tepalyetonij, uan moneki timoyolchikauaskej ta ijkon uelis tiktamixijxikoskej tein onkak nikan taltikpak.
3. ¿Keniuj techpaleuis komo tiyetokej itech ueyi nechikol tein uejkaua ome tonal?
3 Se tokniuj siuat tein amo semi tekititoyaok itech tanojnotsalis, yankuixtok yajka itech ueyi nechikol tein uejkaua ome tonal. Keman kitamikakik tamachtilis, kijkuiloj ke kipaleuij maj moita keniuj yekmelauj moajsi itech inemilis, uan senkis kitalij itech iyolo ‘kisentokas kichiuas itekiyo Dios uan amo kitemos tein ika motenpaleuisʼ. Senkis tikneltokaj ke ueyi nechikol tein uejkaua ome tonal itech xiujtekit tein ualas, tinochin techpaleuis maj tiktasojtakan Jiova uan amo tein onkak nikan taltikpak (1 Juan 2:15-17). Maj amo teyi techtsakuili tiyetoskej ompa uan maj kuali tikakikan tamachtilis, ijkon senkis tikseliskej tein techmakaj ika netasojtalis tinochin titanojnotsanij.