Komo titanemiliaj techpaleuis maj tiknekikan titanojnotsakan
1. ¿Toni kipaleuij Jesús maj amo kielkauani tekit tein okachi tayekantok?
1 Yaluatika tiotak Jesús kinpajtijtoya akin mokokouayaj uan kinkixtilij akin kipiayaj amokuali ejekamej. Mostika keman imomachtijkauan kiajsikej, kiiluijkej: “Nochi pueblojuanij mitsontemojtokkej”, porin kinekiaj maj kisentoka tapajti. Sayoj ke Jesús amo kikauak maj nejon kikaualtiani tekit tein okachi tayekantok, tein kijtosneki maj tetapoui kuali tanauatilmej. Yejua tanankilij: “Tiyouej tejuan nepakauin tech ne pueblitos amo uejka para no [...] [nikinmachtis] ika in yankuik Tajtoltsin, porin [...] yejika Nejuatsin niualaj”. ¿Toni kipaleuij Jesús maj amo kielkauani tein okachi tayekantok? Yejua meuaya kualkan, tanemiliaya uan kichiuaya netataujtil (Mar. 1:32-39). Uan tejuan, ¿keniuj techpaleuis komo titanemiliaj?
2. ¿Itech toni uelis titanemiliskej tein techpaleuis maj tiknekikan titanojnotsakan uan maj amo tikauakan?
2 ¿Itech toni uelis titanemiliskej? Jesús kinitak ke taltikpakneminij “tayokoyayaj kemej ichkamej ten kuamoyaujtokkej uan kemej ne ichkamej ten amo kipiaj in tajpixkej” (Mat. 9:36). No ijkon tejuan uelis timonemiliskej ke tel miakej moneki kikakiskej kuali tanauatilmej, uan ke tinemij itech tonalmej keman moneki timoijsiuiliskej (1 Cor. 7:29). Uelis titanemiliskej itech nochi tein Jiova kichiujtok uan itech kualneskayomej tein kinextia. Uan no itech tatiochiualis tein tikpiaj titekitiskej kemej itaixpantijkauan Jiova uan tel kuali tamachtilis tein tikajsij itech iTajtol Dios, tein taltikpakneminij kampa titanojnotsaj ayamo kiixmatij (Sal. 77:11-13; Isa. 43:10-12; Mat. 13:52).
3. ¿Kemanian uelis titanemiliskej?
3 ¿Kemanian uelis titanemiliskej? Kemej Jesús kichiuaya, sekin kualkan meuaj keman taseujtok. Oksekin kiitaj ke okachi kuali tanemiliaj youak achto ke kochiskej (Gén. 24:63). Uan maski tikpiaskej miak tekit, uelis tikajsiskej tiempo keman titanemiliskej. Sekin kichiuaj keman yajtokej itech tepos. Oksekin tanemiliaj itech tiempo tein kikuij keman monepantajuiaj. Miakej tokniuan kiitaj ke tanemiliskej achto ke tanojnotsaskej, uan maski amo uejkaua, kinpaleuia maj kinekikan tanojnotsakan uan kichiuaskej ika yolchikaualis.
4. ¿Keyej moneki titanemiliskej?
4 Komo tein itech titanemiliaj tikijtouaj itech netataujtil, techpaleuis maj okachi tiknekikan tiktekitiliskej Jiova, maj tikitakan ke okachi tayekantok tikueyichiuaskej Dios uan techmaka chikaualis tein techpaleuia maj tiksentokakan titanojnotsakan. Komo Jesús, Yekinika iTekitikauj Dios, kitelpaleuij tanemilis, tejuan no uelis techtelpaleuis.