Maj tikitakan tanojnotsalis kemej se ueyi tatiochiualis
1. ¿Keniuj miakej kiitaj tanojnotsalis?
1 Itech nejin taltikpak kampa taixyekantok Satanás, miakej kiitaj tanojnotsalis kemej “mijmikiloyot” (1 Cor. 1:18-21). Komo amo timoyekpiaj, nejin tanemilil tein tel amo kuali uelis kichiuas maj amo tiktelnekikan titekitiskej itech tanojnotsalis uan maj timosenkauakan (Pro. 24:10; Isa. 5:20). ¿Keyej moneki tikitaskej kemej se ueyi tatiochiualis maj tiitaixpantijkauan Jiova? (Isa. 43:10.)
2. ¿Keyej uelis tikijtoskej ke tanojnotsalis se tekit tein yektik?
2 Se tekit tein yektik. Tatitanil Pablo kimelauak ke tanojnotsalis se tekit tein yektik ijkuak kijtoj ke tekitia kemej se tiopixkat itech itonaluan, tein kijtosneki, keman tikchiuaj itekiyo Dios (Rom. 15:15, 16). ¿Keyej? Porin keman titanojnotsaj, ‘tiksentekitiliaj Dios’ oso iuan titekitij “Yejuatsin ne Yolchipauaktsin”, Jiova, uan titapaleuiaj maj mochipaua itokay (1 Cor. 3:9; 1 Ped. 1:15). Jiova kiita ke ijkuak titanojnotsaj ‘tikueyipanchiuaj’, yejua ika nejin se tekit tein motelneki itech totaueyichiualis (Heb. 13:15).
3. ¿Keyej se ueyi tatiochiualis maj titetapouikan kuali tanauatilmej?
3 Se ueyi tatiochiualis maj titetapouikan kuali tanauatilmej, se tekit tein amo semi miakej kipiaj. Ángeles kichiuaskiaj ika miak pakilis nejon tekit, uan senkis tikmatij ke tel kuali kichiuaskiaj (1 Ped. 1:12). Sayoj ke Jiova techmakak nejon ueyi tatiochiualis tejuan, maski titajtakouanij tein titamatij “kemej se sokikomit” (2 Cor. 4:7).
4. ¿Keniuj tiknextiaj ke tikitaj tanojnotsalis kemej se ueyi tatiochiualis?
4 Se tekit tein tayekantok. Komo tikajsikamatij ke se ueyi tatiochiualis maj titanojnotsakan, tikitaskej kemej se tekit “ten kuali” oso tein tayekantok uan tikixtaliskej tonalmej itech semana keman titanojnotsaskej (Fili. 1:10). Maj timonemilikan ke tipouij imiuan tatsotsonanij tein noyampa taltikpak moixmatij. Kemej tiknekiskiaj tiksentokaskej tiyetoskej imiuan, nochipa timomachtiskiaj achto ke tiyaskiaj titatsotsonatiuij uan timochikauaskiaj okachi tiueliskej. No ijkon panoua itech tanojnotsalis, nochipa timomachtiaj achto ke tikisaskej uan ijkon uelis kuali ‘tiktekitiltiskej in Tajtoltsin de Dios’ uan timomachtiaj keniuj okachi kuali ‘tikinnextiliskej in Tajtoltsin’ (2 Tim. 2:15; 4:2).
5. ¿Akonimej kitasojkamatij totanojnotsalis?
5 Maj amo timosenkauakan komo amo kuali techitaj taltikpakneminij. Moajsijok kampa titanojnotsaj akin kitasojkamatij keman tikinkalpanouaj. Sayoj ke amo tiktemouaj maj kuali techitakan taltikpakneminij, ta okachi tiktemouaj tikyolpaktiskej Jiova. Uan uelis senkis tikmatiskej ke yejuatsin kiteltasojkamati chikaujkayot tein tikchiuaj (Isa. 52:7).