Majtaktiomome taman keyej moneki titanojnotsaskej

¿Keyej titanojnotsaj kajkalpan uan titamachtiaj ika Biblia? ¿Porin okachi tiknekij maj taltikpakneminij akin kipiaj kuali ininyolo kiajsikan ojti tein teuika itech nemilis? (Mat. 7:14.) Nejin yejua yekinika taman itech majtaktiomome tein ixnesi tani, sayoj ke amo yejua tayekantok. ¿Katiyejua okachi tayekantok tein kinextia keyej moneki titanojnotsaskej?

1. Tapaleuia maj taltikpakneminij makisakan (Juan 17:3).

2. Kinnejmachtia akin amo yolkualmej (Eze. 3:18, 19).

3. Ijkon mochiua tein achtook moijtojka itech Biblia (Mat. 24:14).

4. Ika monextia imelaujkayo Dios. Keman Jiova kinixpolos akin amo yolkualmej, amo akin uelis kijtos ke amo kinkauak maj moyolnonotsakan (Hech. 17:30, 31; 1 Tim. 2:3, 4).

5. Keman titanojnotsaj tikchiuaj tein Dios technauatijtok, uan ika tikinpaleuiaj taltikpakneminij maj motokikan iuan, ta yejuatsin kinkouak ika iesyo Cristo (Rom. 1:14, 15).

6. Ijkon amo yeski totajtakol keman ixpoliuiskej akin amo yolkualmej (Hech. 20:26, 27).

7. Se taman tein moneki uan ijkon uelis timomakixtiskej (Eze. 3:19; Rom. 10:9, 10).

8. Ijkon ueli tikinnextiliaj taltikpakneminij ke tikintasojtaj (Mat. 22:39).

9. Ika tiknextiaj ke tiktakamatij Jiova uan iKonetsin (Mat. 28:19, 20).

10. Se taman tein ika tikueyichiuaj toTajtsin (Heb. 13:15).

11. Ika tiknextiliaj Dios tonetasojtalis (1 Juan 5:3).

12. Tapaleuia maj moueyitali itokay Dios (Isa. 43:10-12; Mat. 6:9).

Tein melauj onkak okachi miak taman keyej titanojnotsaj. Keman titanojnotsaj mochikaua totakuaujtamatilis uan ijkon ueli tisentekitij iuan Dios (1 Cor. 3:9). Sayoj ke tein okachi motelneki keyej titanojnotsaj, yejua tapoual 12. Kuali tanankiliskej taltikpakneminij oso amo, totanojnotsalis tapaleuia maj moueyitali itokay Dios. No tapaleuia maj Jiova kinankili akin kikejkelojtok (Pro. 27:11). Kemej tikitaj onkak miak taman keyej motelneki maj ‘amo keman timokauakan ke maj amo titamachtikan uan titanojnotsakan’ (Hech. 5:42).