Jiova techmachtia keniuj tikchiuaskej tekit
1. ¿Toni kichiua Jiova nochipa keman kinmaka se tekit itekitikauan?
1 Keman Jiova kinmaka se tekit itekitikauan, no kinmaka nepaleuil tein moneki uan ijkon uelij kichiuaj tekit. Kemej neskayot, ijkuak kiiluij Noé maj kichijchiua se arca, se teisa tein amo keman kichiujtoya, no kiiluij keniuj kichijchiuaskia (Gén. 6:14-16). Uan keman Jiova kinauatij Moisés, akin sayoj katka se ichkatajpixkej, maj yani imin ixpan akin kinixyekanayaj israelitas uan iixpan Faraón, kiyekiluij: “Nejua niyetos iuan motenoj uan yekmelauj nimitsnextilis tein moneki tikijtos” (Éxo. 4:12). Axkan, amo no sayoj ijkon techtitani maj titetapouitij kuali tanauatilmej. Ika Escuela tein Techmachtia iTekiyo Dios uan Nechikol tein Techmachtia iTekiyo Dios yejuatsin technextilia keniuj tikchiuaskej tekit. ¿Toni uelis tikchiuaskej uan ijkon kuali tiktekitiltiskej tamachtilis?
2. ¿Keniuj uelis tikseliskej nepaleuil tein kitemaka Escuela tein Techmachtia iTekiyo Dios?
2 Escuela tein Techmachtia iTekiyo Dios. Achto xionmomachti tein ixyetok tikitaskej itech sejse nechikol. Ijkon, okachi tikonmatis keniuj tiontamachtis keman tikonitas keniuj momachtianij kikuij nejon nemachtil itech imin tanojnots (Pro. 27:17). Xikonuika amaix Benefíciese itech nechikol uan ompa xiontajkuilo. Keman akin kiixyekana escuela kijtos seki taman tein ixnesi itech amaix satepan ke kitemakas itamachtilis se momachtijkej, xikontsojkuilo tanemililmej tein tikonneki tikonkuis uan xikonijkuilo tein monekis itech amaix kampa takaujtok. Sayoj ke okachi mitsonpaleuis nejon nechikol komo no tikontemaka se tamachtilis. ¿Tionijkuiliujtokya itech nejon nechikol? Keman mitsonnauatiskej ke tikontemakas se tamachtilis, kuali xionmomachti uan xikonchiua kemej mitsonyolmajxitiaj. Uan keman tionyetos itech tanojnotsalis, xikonkui tein tionmomachtij.
3. ¿Keniuj uelis tikseliskej nepaleuil tein kitemaka Nechikol tein Techmachtia iTekiyo Dios?
3 Nechikol tein Techmachtia iTekiyo Dios. Okachi kuali tikelnamikiskej tein moijtos itech nechikol keniuj tikchiuaskej tekit, komo achto tikixtajtoltiaj tein tikitaskej uan timomachtiaj keniuj titanankiliskej. Komo amo tiuejkauaj itech totanankililuan, okachi miakej uelis tanankiliskej. Kuali xikonita tein ompa kineskayotiskej uan xikonkui tanemililmej tein tikonixejekoua ke uelis mitsonpaleuis okachi kuali xiontanojnotsa. Keman amaix ITekiyo Dios tein Tikchiuaj kiualkuis se tel kuali tamachtilis, xikonpixto uan ijkon uelis tikonitas keman monekis.
4. ¿Keyej moneki maj kuali tiktekitiltikan nemachtil tein techmaka Jiova?
4 Ijkon kemej ouij katka tekit tein kinmakakej Noé uan Moisés, titetapouiskej kuali tanauatilmej itech nochi taltikpak kemej Dios technauatia, no semi ouij (Mat. 24:14). Maski ijkon, uelis kuali tikchiuaskej komo titakuaujtamatij iuan Jiova, toUeyi Tamachtijkauj, uan kuali tiktekitiltiaj nemachtil tein techmaka (Isa. 30:20).