¿Toni ika ‘uelis tionmoyolpaktis’?
1. ¿Toni ika moneki tiyolpakiskej keman tami sejse metsti?
1 Keman tami sejse metsti, ijkuak tikamataliaj uan titemakaj tekit tein tikchiujkej itech tanojnotsalis, yekmelauj tiyolpakij (Gál. 6:4). Yeski tikchiujtoskej tekit kemej precursor especial uan titanojnotsaskej ciento treinta horas oso titanojnotsanij akin titekitij ika quince minutos oso okachi, tinochin moneki tiyolpakiskej porin tiktekitiliaj Jiova ika nochi toyolo (Sal. 100:2).
2. ¿Keyej moneki tikmakaskej Jiova tein okachi kuali?
2 Jiova yejuatsin Ueyi Taixyekankej uan kinamiki maj tikmakakan tein okachi kuali tein tikpiaj (Mal. 1:6). Porin tiktasojtaj, timotenkaujkej iuan ke tikchiuaskej itanejnekilis itech nochi tonemilis. Ijkon, titelyolpakij keman tami se tonal oso metsti porin tikmachiliaj ke titemakakej tein okachi kuali ika totonaluan, tochikaualis uan totamatilis itech itekiyo Jiova (Pro. 3:9). Sayoj ke, komo totanemilil kinextia ke ueliskia titekitiskiaj okachi, moneki tikixejekoskej keniuj uelis okachi kuali titekitiskej (Rom. 2:15).
3. ¿Keyej amo kuali maj tiktamachiuakan totekiuj ika tein kichiuaj oksekin?
3 Maj amo tiktamachiuakan tekit tein tikchiuaj. Amo kuali yetok maj tiktamachiuakan totekiuj ika tein kichiuaj oksekin oso ika tein tikchiuayaj keman okachi tichikaujtoyaj. Nochi mopata uan amo ueli nochi tikchiuaj tein sekin uelij kichiuaj. Komo tiktamachiuaj totekiuj, tiknekiskej timotataniskej oso tiknemiliskej ke amo teyi tichiuanimej (Gál. 5:26; 6:4). Jesús amo kitamachiuaya iuan oksekin tein kichiuayaj taltikpakneminij, ta kiniluiaya tein kuali kichiuayaj (Mar. 14:6-9).
4. ¿Toni techmachtia neskayot ika tomin tein Jesús kijtoj?
4 Itech neskayot tein Jesús kijtoj, takeualmej kiselijkej tomin ijkon kemej “kipiayaj uelilis para tekitiske” (Mat. 25:15). Keman ininteko mokepak uan kintajtanij toni tekit kichiujkej, akin kuali tekitikej ijkon kemej ueliaj kichiuayaj ininteko kiniluij ke kuali tekit kichiujkej uan maj iuan yolpakinij (Mat. 25:21, 23). Komo no ijkon titekititokej itech tanojnotsalis, Dios kiselis totekiuj uan titelyolpakiskej.