Moneki tikintemoskej achto ke tikinnojnotsaskej
1. Itech xolalmej kampa motajtoua miak tajtolmej, ¿keyej ixyetokej nechikolmej maj tanojnotsakan itech sayoj se taman tajtol?
1 Itech Pentecostés itech xiuit 33, satepan ijkuak kiselijkej yektikatsin espíritu, itatojtokakauan Jesús “peuke tajtoayaj ika miak tataman tajtolis” iniuan akin ompa yetoyaj akin uejuejka kayomej katkaj (Hech. 2:4). Yejua ika, kemej eyi mil taltikpakneminij moauijkej. Miak taltikpakneminij tein ompa yetoyaj, xa no tajtouayaj hebreo oso griego. Maski ijkon, Jiova kiixtalij maj kinnojnotsanij ika iTekiuajyo Dios itech inintajtolkopa. Uan nejin tapaleuij porin taltikpakneminij kuali tanankiliaj keman kikakij itanauatil Dios itech inintajtol. Yejua ika, axkan, itech xolalmej kampa motajtoua miak tajtolmej, sejse nechikol ixyetok tanojnotsas itech sayoj se taman tajtol (xikonita Organizados, pág. 107 § 1, 2). Tein ayamo nechikolmej uan tanojnotsaj itech se tajtol tein kayot okse ueyi altepet, ayamo kiseliaj kani tanojnotsaskej, ta yejuan kintemouaj akin tajtouaj nejon tajtol itech xolalmej kampa tanojnotsa nechikol uan okseki nechikolmej tein moajsij ompakauin.
2. 1) ¿Toni moneki mochiuas uan ijkon tikmatiskej akonimej tajtouaj se tajtol uan kemanian monekis mochiuas? 2) ¿Keniuj uelis mosenpaleuiskej nechikolmej tein tanojnotsaj itech tataman tajtolmej? 3) ¿Toni moneki tikchiuaskej komo tikajsij se taltikpaknenkej akin tajtoua se tajtol uan kineki kimatis okachi?
2 Komo tanojnotsanij nemij kampa nochin tajtouaj sayoj se tajtol, uelis tanojnotsaskej itech nochi kalmej. Sayoj ke, taman yeski komo nemij itech se xolal kampa motajtoua miak tajtolmej. Xa nechikolmej itech tataman tajtolmej uelis tanojnotsaskej itech sayoj se xolal. Keman kiajsiskej akin tajtoua okse tajtol, uelis kijkuiloskej tein monekis uan ijkon tokniuan akin tanojnotsaj itech nejon tajtol kinkalpanoskej; sayoj ke akin moneki kintemoskej nejon taltikpakneminij yejuan akin pouij itech nechikol oso tein ayamo nechikol itech nejon tajtol (xikonita kampa kijtoua “Maj timosenpaleuikan”). Yejua ika, monekis tatemoskej uan tajtaniskej kani nemij akin tajtouaj se taman tajtol. ¿Keniuj uelis mochiuas?
3. ¿Itech toni xolalmej moneki tikintemoskej taltikpakneminij, uan kanachi tiempo moneki titekitiskej?
3 Keniuj mochiuas tekit. Keman kintemoskej akin tajtouaj okse tajtol tataman uejkauaskej itech tataman nechikolmej. Kemej neskayot, ¿kanachin nemij itech se xolal akin tajtouaj se taman tajtol? ¿Kanachi tanojnotsanij moajsij ompa? ¿Kanachi taltikpakneminij kinajsikejya itech nejon nechikol oso tein ayamo nechikol? Amo moneki maj nechikol kintemo taltikpakneminij itech nochi xolalmej kampa ixyetok tanojnotsas kemej kichiua itech okseki xolalmej, ta moneki okachi kintemos kampa tel miakej nemij uan amo semi uejka. Sayoj ke motelneki maj moyekixtali tekit keman kintemoskej taltikpakneminij, ta ijkon uelis okachi miakej kinpaleuiskej maj kiixmatikan Jiova (Rom. 10:13, 14).
4. 1) ¿Keniuj moneki moixtalis tekit keman tikintemoskej taltikpakneminij? 2) ¿Toni okseki taman uelis tapaleuis tein ika se kinajsis taltikpakneminij akin tajtouaj se taman tajtol?
4 Tayekananij, uan okachiok akin kiixyekana tanojnotsalis itech nechikol, moneki kiixtaliskej uan kiixyekanaskej tekit keman kintemoskej taltikpakneminij, ta nejon tapaleuis maj amo moneki ojpa mochiuas tekit (1 Cor. 9:26). Kampa ayamo nechikol uan motanojnotsas itech okse tajtol tein kayot itech okse ueyi altepet, tekit uelis kiyekanas se tokniuj akin kuali tekititok, se tayekankej oso se tapaleuijkej, akin kiixtaliskej tayekananij itech nechikol kampa poui nejon tein ayamo nechikol. Miak nechikolmej uan tein ayamo nechikolmej achto kiixtaliaj keniuj kintemoskej taltikpakneminij, xa kitemouaj itech se amaix kampa moajsij tokaymej, oso itech Internet uan ijkon kitemouaj tokaymej tein okachi mokuij itech nejon tajtol. Ompa, peua kintemouaj ika teléfono oso kinkalpanouaj, uan ijkon moixtalia itech katiyejua kalmej moneki tanojnotsatiuij. Komo moneki, tayekananij itech nechikol tein taixyekanaj kampa ayamo nechikol uelis kiixtaliskej maj tokniuan kemansa tapaleuikan keman kintemoskej taltikpakneminij (xikonita kampa kijtoua “Keniuj tikinajsiskej akin tajtouaj okse tajtol”).
5. 1) ¿Toni moneki kielnamikiskej tanojnotsanij keman kintemotiuij taltikpakneminij? 2) ¿Toni uelis tikiniluiskej taltikpakneminij?
5 Moneki tikixtaliskej tein tiknekij tikpiaskej keman tikintemotiuij taltikpakneminij. Kemej nejin se taman tein ika tikueyichiuaj Dios, moneki kuali timotakentiskej kemej nochipa keman tiyouij titanojnotsatij. Miakej kiitaj ke komo momamachtiaj keniuj tanojnotsaskej uan tajtouaj itech nejon tajtol keman kintemouaj taltikpakneminij, kinpaleuia maj yolpakikan uan maj okachi uelikan tajtokan nejon tajtol. Uelis mopouas tiempo keman tikintemoskej taltikpakneminij, sayoj ke amo mopouas ijkuak moixtalijtos kani uan akoni tikalpanoskej. Keman tikajsiskej aksa akin tajtoua tajtol, moneki timochikauaskej tiknojnotsaskej ika iTajtol Dios, uan maj niman tiknauatikan tokniuj akin kiixyekana tanojnotsalis itech nechikol oso akin yejua kiixtalis; ijkon kijkuiloskej maj no tikalpanokan. Nejin mochiuas maski taltikpaknenkej amo kinextis ke kineki kimatis okachi. Maski motelneki tikintemoskej taltikpakneminij, moneki tiyeskij titaixejekouanij uan no tikchiuaskej okseki tekimej itech tanojnotsalis (xikonita kampa kijtoua “Toni tikijtoskej keman tikintemoskej taltikpakneminij”).
6. ¿Toni ouijkayomej onkak keman se kintemoua taltikpakneminij akin amo uelij takakij?
6 Keniuj tikintemoskej akin amo uelij takakij. Nejin tekit kipia seki ouijkayomej uan moneki taxikolis uan chikaujkayot. Nion itokay, nion itaken nion kemej tamati kinextia ke se taltikpaknenkej amo ueli takaki. Uan no, ichankauan uan itasojikniuan uelis kintelyekpiaskej uan amo kinekiskej kiniluiskej tein tajtanij tanojnotsanij. Nejin tayolmajxitilismej uelis techpaleuis maj tikinajsikan akin amo uelij takakij uan no akin tajtouaj okse taman tajtol.
7. 1) Toni uelis titajtaniskej keman tikintemoskej akin amo uelij takakij? 2) ¿Toni tapaleuis maj amo kinemilikan tein amo kuali keman tikinnojnotsaj?
7 Nechikolmej uan tein ayamo nechikolmej itech tajtol señas, tajtanij itech kalmej kampa nemij miakej kalyetouanij ox kiixmatij aksa akin amo ueli takaki. Xa uelis techiluiskej ke kiitanij se akin ompakauin nemi, se akin iuan tekitij oso akin iniuan momachtiaj uan amo ueli tajtoua. Xa kiitanij kansaika ijkuiliujtok maj kiitakan akin tanejnemiltiaj ke onkakej konemej tein amo uelij takakij. Hasta uelis yejuan kipiaskej se ininchankauj akin amo ueli takaki. Moneki tikelnamikiskej ke uelis amo techneltokiliskej tein tikintajtaniaj. Maski ijkon, komo kuali tikinnojnotsaj, titapoujkaitaj, tikijtouaj sayoj tein moneki uan amo tiuejkauaj, taltikpaknenkej uelis techiluis tein melauak. Sekin kintelpaleuia keman kitenextiliaj Biblia ika video oso okseki amaixmej ika video ijkuak tajtanij ox kiixmatij aksa akin amo uelij takakij uan kiniluiaj ke kinekij kintapouiskej tein Biblia motenkaua iniuan akin amo uelij takakij. Komo taltikpaknenkej amo kineki techiluis nion se taman, uelis tikauiliskej se amat tein ika uelis techajsiskej oso tikauiliskej amatsin tein ika titayoleuaj maj yakan nechikolmej uan maj kimaka ichankauj oso itasojikniuj akin amo ueli takaki.
8. ¿Keniuj uelis se nechikol tapaleuis itech okse nechikol itech tajtol señas?
8 Sepa oso ojpa itech xiuit, se nechikol itech tajtol señas uelis tajtanis itech okse nechikol ompakauin maj tapaleui keman kintemoskej taltikpakneminij akin amo uelij takakij itech se okachi ueyi xolal. Itech nechikol tein mochiuas achto ke yaskej tanojnotsalis, tein kiixyekanas se akin poui itech nechikol itech tajtol señas, uelis moijtos keniuj mochiuas uan motemakas se ixneskayot. Komo seseko youij itech tataman teposmej, moneki yas iniuan se tanojnotskej akin poui itech nechikol itech tajtol señas ika se mapa kampa nesis kani sayoj kintemoskej taltikpakneminij.
9. ¿Keniuj uelis tikintemoskej taltikpakneminij akin amo uelij takakij?
9 No uelis tikintemoskej taltikpakneminij akin amo uelij takakij, kampa miakej moixpetaniaj, mosentiliaj oso kiselitij nepaleuil. Tanojnotsanij moneki motakentiskej kemej monekis kampa moajsiskej. Okachi kuali maj titajtokan iuan semej oso omen uan ika nejmachkayot, uan amo iniuan nochin tein ompa yetoskej. Komo kuali tanankilia, uelis tikiluiskej keniuj techajsis uan no maj techilui keniuj tikajsiskej.
10. ¿Keniuj uelis tikintemoskej itech tanamakaloyamej akin amo uelij takakij?
10 Okse taman, uelis tikchijchiuaskej se mapa tein kinextis kani tanamakaj itech se xolal uan tikinkalpanoskej itech se hora keman okachi ueliskej. Seko uelis tiktaliskej kani kinamakaj gasolina; okseko uelis tiktaliskej kani moajsi kampa takualnamakaj, tintorería, lavandería, hotel uan okseki tanamakaloyamej. Komo sejse mapa kipia nochi tanamakaloyamej tein achto moijtoj, tanojnotsanij kimatiskej toni kijtoskej uan ijkon okachi ueliskej tanojnotsaskej ompa. Se neskayot, kemej itech se hotel kinseliaj akin amo uelij takakij, uelis tepitsin tikiluiskej akin kinselia toni tekit tikchiuaj uan maj tikauilikan seki video ika se amatsin tein ika titayoleuaj maj yakan nechikolmej, uan maj kinmajmaka akin amo uelij takakij. Itech seki tanamakaloyamej, sayoj uelis titajtaniskej ox se tekitikej oso takoujkej kimati tajtos ika señas. Komo kampa titanojnotsaj moajsi se tamachtiloyan kampa youij sayoj akin amo uelij takakij, uelis tikinkauiliskej amaixmej ika video tein uelis kipiaskej.
11. ¿Keyej se kintemos taltikpakneminij se tekit tein motelneki itech tanojnotsalis?
11 Se tekit tein motelneki. Se kintemos taltikpakneminij akin tajtouaj tataman tajtolmej, uelis moitas ke tel ouij. Uan no, amo sayoj seko mokaltaliaj ta ijsiujka chanchiuatij okseko, nejon kichiua maj ouij tikmatikan kani oksepa tikinajsiskej. Axkan itech okachi miak xolalmej kintemouaj taltikpakneminij akin tajtouaj se taman tajtol. Jiova, akin techmakatok nejin tekit, amo techichikotasojta (Hech. 10:34). “Totajtsin Dios Yejuatsin kimonekiltia ke nochi in taltikpakuani ma makisakan de nintajtakoluan para ma ijkon kajsikamatikij in melauak Tajtoltsin de Dios.” (1 Tim. 2:3, 4.) Yejua ika, maj tisentekitikan iuan Jiova uan iniuan tokniuan, uan maj tikintemokan taltikpakneminij itech tataman tajtolmej akin “yolyemanke uan [akin] kimachiliaj se yoltanejnekilis de kiselitiyaske in Tajtoltsin de Dios” (Luc. 8:15).
[Recuadro itech página 5]
Maj timosenpaleuikan
Komo itech se nechikol oso tein ayamo nechikol monekiskia nepaleuil uan ijkon kinajsiskej taltikpakneminij akin tajtouaj tajtol tein ika uelis kinnojnotsaskej, akin kiixyekana tanojnotsalis itech nechikol uelis kiniluis tayekananij itech okseki nechikolmej tein ompakauin moajsij. Okachi kuali maj kintemo itech nechikolmej tein amo uejka yetoskej uan kampa yejuan tanojnotsaj nemij miakej akin tajtouaj nejon tajtol. Nejin tayekananij uelis kiniluiskej tanojnotsanij tein pouij itech ininnechikol ke komo kiajsij aksa akin tajtoua nejon tajtol, moneki kijkuiloskej kani nemi uan kimakaskej akin kiixyekana tanojnotsalis, uan yejua kinmakas itech nechikol oso tein ayamo nechikol kampa tajtankej nepaleuil. Akin kiixyekanaj tanojnotsalis itech tataman nechikolmej tein moajsij itech se xolal, uelis kichiuaskej se taman tein kinpaleuis maj tanojnotsakan itech tataman tajtolmej uan kinuikaskej taltikpakneminij itech nechikol oso tein ayamo nechikol kampa tajtouaj inintajtol.
Komo tikajsij se taltikpaknenkej akin yekmelauj kineki kimatis okachi uan tajtoua okse tajtol (oso akin amo ueli takaki), moneki niman tikijkuiloskej itech amat Sírvase visitar (S-43-S) uan tikmakaskej tajkuilojkej itech nechikol. Nejin tapaleuis maj taltikpaknenkej niman kiseli nepaleuil ika Biblia (xikonita km 5/11 pág. 3).
[Recuadro itech página 6]
Keniuj tikinajsiskej akin tajtouaj okse tajtol
• Maj tikintajtanikan oksekin, kemej akin tikinmachtiaj ika Biblia, ininchankauan, akin iniuan tekitij uan oksekinok.
• Maj tikintemokan kampa moajsij tokaymej uan tapoualmej ika teléfono uan maj tikitakan tokaymej tein okachi mokuij itech nejon tajtol. No onkakej amaixmej tein kipiaj nochi tokaymej ijkon kemej kampa nemij taltikpakneminij, uan no uelis tikajsiskej itech Internet oso kampa tekitij ika teléfono.
• Ika nejmachkayot maj tiyakan kampa kinpiaj amatajkuilolmej, kampa tekitij tekiuanij oso itech kaltamachtiloyamej.
• Maj tikitakan itech periódico ox motanauatia ke akin tajtouaj se tajtol kichiuatij se taman.
• Maj tiyakan kampa tanamakaj uan kampa youij akin tajtouaj se taman tajtol.
• Komo techkauaj akin taixyekanaj ompa, kampa moitas uelis tiktaliskej amaixmej itech se tanamakaloyan, uejueyi tamachtiloyamej oso kampa ejkoj teposmej uan nochipa moajsij akin tajtouaj se taman tajtol.
• Komo amo tiktapanauiliaj tanauatil, uelis tikouaskej se amaix kampa ixnesi nochi tokaymej oso titaxtauaskej keman tikuiskej Internet tein ika tikintemoskej taltikpakneminij.
[Recuadro itech página 7]
Toni tikijtoskej keman tikintemoskej taltikpakneminij
Maj kualtsin tiknojnotsakan taltikpaknenkej, maj timelaujkej uan maj tikiluikan sayoj tein moneki; ta ijkon amo kinemilis tein amo kuali. Tapaleuia keman titenextiliaj amaix itech inintajtol.
Satepan ijkuak titetajpaloskej, uelis tikijtoskej: “Tikintemojtokej taltikpakneminij akin tajtouaj ______ porin tiknekij tikinnextiliskej nechialis tein kitemaka iTajtol Dios. ¿Tikonixmati aksa akin tajtoua nejon tajtol?”.
Keman tikintemoskej akin amo uelij takakij, satepan ijkuak tiktajpaloskej, uelis tikijtoskej: “¿Uelis nimitsonnextilis se video? [Ika se tepos kampa moita video, xikonnextili se versículo itech Traducción del Nuevo Mundo ika tajtol señas.] Nejin se versículo tein moajsi itech Biblia tein kikuij akin amo uelij takakij. Tikpiaj okseki video tein amo monamaka tein kinpaleuis maj kiixmatikan Dios akin amo takakij. ¿Tikonixmati aksa akin amo ueli takaki oso amo yektakaki akin kimati tajtos ika señas?”. Komo taltikpaknenkej amo akin kielnamiki, xikonilui ke uelis kinitas miakkan, kemej kampa tekitij, kampa momachtiaj oso kampa chanchiujtokej.