TONEMILIS KEMEJ ITATOJTOKAKAUAN CRISTO

Maj timosenpaleuikan keman tikinnojnotsaj akin tajtouaj tataman tajtolmej

Se takat uan inamik kiajsij se takat uan ikonetsin akin tajtouaj okse tajtol itech tanojnotsalis

Taltikpakneminij okachi techkakij keman tikinixmatiltiaj iTekiuajyo Dios itech inintajtol. Yejua ika, xa itech Pentecostés itech xiuit 33, Jiova kichiuak maj judíos akin “ualajke nouiyampa de nochi senmanauak para kimouistiliske” kikakinij kuali tanauatilmej itech inintajtol maski xa no ueliaj tajtouayaj hebreo oso griego (Hch 2:5, 8). Axkan, moajsij miak nechikolmej itech tataman tajtolmej uan tokniuan akin ompa pouij sayoj seko tanojnotsaj. ¿Keniuj nejon tokniuan uelis kinnojnotsaskej nochin taltikpakneminij uan amo kinteltemojtoskej oso kintelkuemolojtoskej?

Maj timonojnotsakan (Pr 15:22): Tayekananij akin kiixyekanaj tanojnotsalis moneki kisenixejekoskej tein okachi kinpaleuis nochin. Itech nechikolmej kampa motajtoua okseki tajtolmej xa amo kinekiskej maj titanojnotsakan kampa yejuan tanojnotsaj komo amo ueyi. Sayoj ke, komo semi ueyi kampa tanojnotsaj uan amo uelij miakpa tanojnotsaskej, xa kinekiskej maj titanojnotsakan itech nochi kalmej uan maj tikinnauatikan ox tikajsij aksa akin kineki kimatis okachi (od-S pág. 93 § 37). Oso xa kinekiskej maj kemej nechikol tikinpaleuikan maj kinajsikan akin tajtouaj inintajtol uan kijkuiloskej kani nemij (km 7/12 pág. 5, recuadro). Maj tikelnamikikan ke akin nemij itech se kali uelis tajtoskej tataman tajtolmej. Tein moixtalis kemej motanojnotsas moneki amo kitapanauilis tanauatilmej itech ueyi altepet tein ika kinyekpiaj taltikpakneminij.
Maj timosenpaleuikan (Ef 4:16): Moneki tiktakamatiskej tein kiixtalis tayekankej akin kiixyekana tanojnotsalis. ¿Tikmachtiaj ika Biblia aksa akin amo tajtoua tajtol tein mokui itech tonechikol? Xa okachi niman mochikauas itakuaujtamatilis komo tiktemouaj maj kimachti se tokniuj akin poui itech se nechikol oso se tein ayamo nechikol kampa motajtoua itajtol.
Maj timomachtikan (Pr 15:28; 16:1): Komo kampa tiontanojnotsa tikonajsi aksa akin tajtoua okse tajtol, xikontemo tikonnojnotsas. Yejua ika, xikonnemili katiyejua tajtolmej mokuij kampa tiontanojnotsa uan xikontemoui Biblia uan seki videos itech nejon tajtolmej. No uelis tionmomachtis keniuj motajpalouaj itech inintajtol itech JW Language.