Amo xionmosenkaua komo amo tionkemanti
1. ¿Keyej sekin amo kinekij kitemakaskej se nemachtil ika Biblia?
1 Sekin amo kinekij kitemakaskej se nemachtil ika Biblia porin kitelpiaj miak tekit. Uan melauak ke moneki tikxeloskej tepitsin totonaluan uan ijkon miakpa tikalpanoskej aksa. Moneki timomachtiskej tejuan, iuan timomachtiskej uan tikpaleuiskej maj kiixnamiki ouijkayomej tein kipias. Tatitanil Pablo kijtoj ke yejua motemakaka kinmachtis tein melauak tokniuan kayomej Tesalónica (1 Tes. 2:7, 8). ¿Keniuj uelis tiktemakaskej se nemachtil ika Biblia maski amo tikemantiskej?
2. ¿Keniuj moneki techpaleuis netasojtalis tein tikpialiaj Jiova maj kuali tiktekitiltikan totonaluan?
2 Moneki tikxeloskej totonaluan uan ijkon tiktekitiliskej Jiova. Tein melauj, totaueyichiualis iuan Dios kiuika miak taman. Itech nochi semanas tikxelouaj totonaluan uan tiyouij nechikolmej, titanojnotsatij, tikixtajtoltiaj Biblia uan tikchiuaj netataujtil. Maj titanemilikan itech se neskayot: se aksa namikej, maski tel amo kemantis, ika miak pakilis kixeloua tepitsin itonaluan uan ijkon yetos iuan inamik. No ijkon, kemej tiktasojtaj Jiova, moneki okachi tikxeloskej totonaluan ika pakilis uan ijkon tikchiuaskej miak tekimej tein ika tikueyichiuaj (Efes. 5:15-17; 1 Juan 5:3). Ijkon kemej kijtoj Jesús, se taman tein motelneki itech totaueyichiualis yejua ke moneki tikinpaleuiskej oksekin maj mochiuakan imomachtijkauan (Mat. 28:19, 20). Titanemiliskej itech nejin techpaleuis maj tikchiuakan nejon tekit.
3. ¿Keniuj uelis tiktemakaskej nemachtilmej ika Biblia komo amo tikemantij?
3 ¿Uan komo moneki titekitiskej, timokokouaj oso tikpiaj okseki tekimej itech nechikol? Seki tanojnotsanij akin kemansa moneki yaskej okseko kisentokaj tamachtiaj ika teléfono oso computadora. Oksekin keman mokokouaj kiniluiaj akin kinmachtijtokej maj yakan ininchan. Uan okseki tokniuan kiniluianij okseki tanojnotsanij akin iniuan takuaujtamatij maj yejuan kinmachtitij taltikpakneminij keman tokniuan amo ueliskej.
4. ¿Toni tatiochiualismej tikseliskej komo tiktemakaj nemachtilmej ika Biblia?
4 Pablo tel yolpakik keman kikuik itonaluan uan ichikaualis uan ijkon kinpaleuij oksekin maj kiixmatikan tein melauak (Hech. 20:35). Keman kiitak nochi kuali tekit tein kichiuak Tesalónica kiolinij maj kitasojkamatili Jiova (1 Tes. 1:2). Komo timochikauaj tiktemakaskej nemachtilmej ika Biblia maski amo tikemantiskej, tikpiaskej okachi yolpakilis itech totanojnotsalis.