¿Toni mitsonpaleuis xionmomachti moselti sejse semana?
¿MITSONOUIJMAKA tionmomachtis Biblia sejse semana? ¿Amo tikonuelita oso amo mitsonyolpaktia tionmomachtis? Kemansa tinochin ijkon techpanoua. Mojmostaj moneki tikchiuaskej miak taman, kemej timaltiskej oso timopakaskej. Maski moneki tikxeloskej tiempo para timaltiskej, keman tikchiuajya kualtsin timomachiliaj. No ijkon panoua keman timomachtiaj Biblia, techpaleuia maj kualtsin timomachilikan (Efes. 5:26). Xikonita nejin tein uelis mitsonpaleuis:
Xikonixtali toni hora tionmomachtis. Nochin akin kichiuaj kemej Cristo kimatij ke momachtiskej ininselti yejua se taman tein “okachi tayekantok” uan mochikauaj ijkon kichiuaskej (Filip. 1:10). Para amo tikonelkauas kemanian tikonixtalij tionmomachtis, xikonijkuilo itech se amat uan xikontali kampa uelis tikonitas. No uelis tikonijkuilos itech mocelular para maj mitsonelnamikti tepitsin achto ke ajsis hora.
Xikonchiua tein okachi mitsonpaleuis. Sekin uelij momachtiaj miak tiempo, sayoj ke oksekin okachi kiuelitaj kixejxeloskej itech miak tonalmej tein momachtitij. Uan tejuatsin, ¿keniuj tionmomachtia? Keman tikonixtalis tionmomachtis, xikonnemili keniuj okachi tikonuelita tikonchiuas. Uan komo ajsi hora para tionmomachtis uan amo tikonneki tikonchiuas, uelis tikonixtalis tionmomachtis maski sayoj 10 minutos. Maski tionmomachtis sayoj tepitsin, uelis tikonajsikamatis miak taman. Uan xa keman ajsis 10 minutos tikonnekis tikonsentokas okachi tionmomachtis (Filip. 2:13).
Achto xikonixtali toni tionmomachtis. Komo tionmotalia para tionmomachtis uan tionmotajtania toni tionmomachtiti xa amo ‘kuali tikonkuitos motiempo’ (Efes. 5:16). Xa uelis tikonijkuilos toni tikonuelitaskia tionmomachtis. Nochipa keman tionmotajtanis teisa porin amo tikonajsikamati, xikonijkuilo para tikontemos. Uan komo keman tionmomachtia tikonajsi okseki taman tein tikonita ke moneki tikontemos, no xikonijkuilo.
Xikonpata seki taman tein moneki. Semi moneki xionmomachti sejse semana, yejua ika, komo tikonita ke moneki tikonpatas kemanian tionmomachtis uan toni hora, kanachi tionuejkauas oso toni tionmomachtis, ijkon xikonchiua.
Komo tionmomachtia sejse semana semi mitsonpaleuis porin okachi tionmotokis iuan Jehová, kuali tikonixpejpenas toni tikonchiuas uan mitsonyolchikauas (Jos. 1:8).