¿Tikonchiuas tejuatsin tekit kemej precursor auxiliar?
1. ¿Keyej ueli okachi titekitij itech tanojnotsalis itech tonalmej keman moelnamiki imikilis Jesús?
1 Itech tonalmej keman moelnamiki imikilis Jesús ueli okachi titekitij itech tanojnotsalis. Ijkuak, titanemiliaj itech ueyi netasojtalis tein Jiova kinextij keman kitemakak iKonetsin maj toka momikiliki (Juan 3:16). Kemej tikteltasojkamatiliaj Jiova tein toka kichiuak, yejua ika okachi tiknekij tikiniluiskej oksekin akoni yejuatsin uan keniuj kinpaleuijtok taltikpakneminij (Is. 12:4, 5; Luc. 6:45). Itech nejon tonalmej no titapaleuiaj itech se tekit tein ika tikinyoleuaj akin iniuan timoixmatij uan okseki taltikpakneminij, maj touan monechikokan keman tikelnamikij imikilis Jesús. Satepan, tikinpaleuiaj akin touan monechikojkej maj kinekikan kimatiskej okachi. ¿Uelis okachi tiontekitis itech tanojnotsalis kemej precursor auxiliar itech metsti marzo, abril oso mayo?
2. ¿Keyej itech metsti marzo uelis tikchiuaskej tekit kemej precursor auxiliar?
2 Xikonixtali okachi tiontekitis itech metsti marzo. Itech metsti marzo uelis tel kuali tikchiuaskej tekit kemej precursor auxiliar. Akin kinekiskej uelis tajtaniskej tekitiskej treinta oso cincuenta horas. Uan komo itech nejon metsti yetok tokniuj takalpanojkej, uelis yetoskej itech nochi nechikol tein tokniuj kipia iniuan akin kichiuaj tekit kemej precursor regular uan especial. Itech tonal martes 26 metsti marzo xiuit 2013 tikelnamikiskej imikilis Jesús, uan itech nejin xiuit okachi miak tonalmej tikmoyauaskej tayoleualismej ke okseki xiujmej achto; axkan tipeuaskej itech tonal 1 metsti marzo, uan okachi kuali yeski porin kipia makuil sábado uan domingo. Yejua ika, ¿uelis tikonixejekos no tikonchiuas okachi tekit itech nejon metsti?
3. ¿Keniuj uelis tikixtaliskej okachi titekitiskej itech tanojnotsalis?
3 Xikonixtaliya axkan. Axkanya moneki tikitaskej tekimej tein tikpiaj uan tikyektaliskej tein monekis itech totekiuj uan ijkon uelis tikchiuaskej tekit kemej precursor. Tel kuali yeski komo nochin kalyetouanij tapaleuiaj, yejua ika, itech Youak keman tiTaueyichiuaj kemej Kalyetouanij uelis moitas uan moixtalis tein uelis mochiuas (Prov. 15:22). Komo amo tionueli tikonchiua tekit kemej precursor auxiliar, amo xionmotekipacho. Uelis tikonixtalis okachi tiontekitis itech tonalmej ijkuak kemaj uelis tionkisas. Oso no uelis tionkisas okachi tonalmej itech semana.
4. ¿Toni uelis tikseliskej komo okachi titekitij itech metsti marzo, abril uan mayo?
4 Komo okachi titekitij itech metsti marzo, abril uan mayo, okachi tiyolpakiskej porin tiktekitiliaj Jiova uan tikinpaleuiaj oksekin (Juan 4:34; Hech. 20:35). Uan nochi tein tikchiuaskej maski ouij techkisas kiyolpaktis Jiova, yejua nejon tein okachi moneki (Prov. 27:11).