Maj kuali tikinselikan
1. ¿Itech toni tonal ueli okachi titapaleuiaj maj kuali ika motajto Jiova, uan keyej?
1 Nion se tonal okachi kuali tein techpaleuia maj kuali ika motajto Jiova ke ijkuak tikelnamikij imikilis Jesús. Nejin xiuit tikinchiaj panoua diez millones taltikpakneminij akin touan monechikoskej ijkuak tikelnamikiskej imikilis Jesús, uan kikakiskej keniuj ika ome taman monextia tel ueyi netasojtalis ika nejon mikilis (Juan 3:16; 15:13). No kiajsikamatiskej keniuj uelis kiseliskej uejueyi tatiochiualismej ika tein Jiova kichiuak (Is. 65:21-23). Maski ijkon, akin kitemakas tanojnots nejon tonal amo sayoj yejua kichiuas maj kuali ika motajto Jiova, ta tinochin uelis titapaleuiskej komo ika miak pakilis tikinseliaj akin touan monechikoskej (Rom. 15:7).
2. ¿Keniuj uelis kuali tikinseliskej akin touan monechikoskej?
2 Amo sayoj uelis tikajsiskej kani timotaliskej uan timochiaskej hasta maj peua nechikol, ta uelis timochikauaskej tikintajpaloskej uan titajtoskej iniuan akin motaliskej tonakastan. Akin yaskej uelis pinauaskej oso amo kimatiskej toni kichiuaskej, yejua ika, komo tikintajpalouaj ika miak pakilis uelis yekmelauj kinpaleuis maj kuali momachilikan. Xa touan monechikojkej porin kiselijkej se tayoleualis. Uelis tikmatiskej nejon komo tikintajtaniaj ox yekinika touan monechikouaj oso ox kiixmatij se tokniuj itech nechikol. Xa uelis tikinyoleuaskej maj touan motalikan uan tikintaneujtiskej toBiblia uan toamaix ika nekuikatilmej. Komo nejin nechikol mochiua itech Kali kampa tiMosentiliaj, uelis tepitsin tikinixmatiltiskej ompa. Satepan ijkuak tatamis, xikonilui ke uelis tikonnankilis netajtanilmej tein kipiaskej. Komo moneki niman tikisaskej porin monechikotij oksekin, uelis tikiniluiskej: “Nechmakaskia miak pakilis nikmatis tein tikonnemilia ika tein tikakkej uan nikuelitaskia nikmatis keniuj uelis oksepa nimitsonnojnotsas”. Ompa, iniuan xionmotenkaua kemanian tikonkalpanos. Tayekananij no monekis kuali kinseliskej uan kinyolchikauaskej tokniuan akin amo tanojnotsajok nion monechikouaj.
3. ¿Keyej moneki timochikauaskej kuali tikinseliskej akin touan monechikoskej ijkuak tikelnamikiskej imikilis Jesús?
3 Miakej akin touan monechikoskej yekinika kiitaskej keniuj tiyolpakij, tiyolseujtokej uan no tokuali uikalis iuan Dios tein tikpiaj tinochin akin tipouij itech ixolal (Sal. 29:11; Is. 11:6-9; 65:13, 14). ¿Toni kielnamikiskej akin touan monechikoskej keman mokepaskej ininchan? Kielnamikiskej nochi tein kuali komo tejuan timochikauaj kuali tikinseliskej.