Tel kuali motajtos nejon tonal
1. Maski tikmatij ke kiuelitaskej tamachtilis tein motemakas, ¿toni no uelis kimoujkaitaskej itech Talnamikilis? Xikonmelaua.
1 ¿Kemanian? Tiotak keman tikelnamikiskej imikilis Jesús. Yejika, tikinyoleujtokej nochin taltikpakneminij tein uelis. Tikchiaj maj takalpanouanij amo sayoj kiuelitakan tein kikakiskej, ta no tein kiitaskej. Satepan ke se siuat yajki itech Talnamikilis, kijtoj ke kiitak keniuj nochin kuali mouikayaj, uan kualtsin uan chipauak moitaya kali tein kichijchiujkej tekitinij ika miak pakilis. Yejika, tinochin uan amo sayoj akin kitemaka tanojnots, titapaleuiskej maj kuali motajto itech nejon tonal tein okachi moneki (Efe. 4:16).
2. ¿Keniuj tisejsemej uelis titapaleuiskej maj kuali tajtokan takalpanouanij?
2 Maj kualtsin tikinselikan takalpanouanij. Komo ika yolpakilis tikintajpalouaj takalpanouanij, tapaleuis maj kuali tajtokan (Juan 13:35). Uan maski amo nochin uelis imiuan titajtoskej, uelis timoteixmatiltiskej imiuan akin amo uejka yetoskej (Heb. 13:1, 2). Maj tikinitakan akonimej moitaj yankuikej. Xa yejuan kiselijkej tayoleualis keman tikmoyaujkej. Uelis tikiluiskej: “¿Yekinika axkan tionuitse?”. Komo ijkon, maj tikyoleuakan maj touan motali uan maj tikiluikan ke uelis tiknankiliskej netajtanilmej tein kipias. Komo moneki niman tikisaskej porin okse nechikol kikuiti kali, uelis tikiluiskej: “Nikuelitaskia nikmatis keniuj tikonitak nechikol. ¿Kani uelis nimitsonajsis?”.
3. ¿Keniuj uelis tikchiuaskej maj kuali momachilikan tanojnotsanij tein amo tekitijok?
3 Maj kuali tikinselikan tanojnotsanij tein amo tekitijok. Senkis tikmatij ke touan yetoskej tanojnotsanij tein amo tekitijok, ijkon kemej tein sayoj youij xijxiujtika itech nejon Talnamikilis. Maj kuali tikinselikan uan maj tikiniluikan ke techmaka miak pakilis tikinitaskej (Rom. 15:7). Tayekananij uelis kinitatiuij imin chan tepitsin satepan, uan kinyolchikauaskej maj kisentokakan monechikokan. Tiktataujtiaj Jiova maj miakej takalpanouanij kinolini maj kiueyichiuakan Dios, amo sayoj porin kiuelitakej tein kikakkej, ta no porin kiitakej ‘tokualitachiualisuan’ (1 Ped. 2:12).