Xikchiuakan ijkon kemej kichiujkej tanauatianij: Jonás
1. ¿Toni kualneskayomej kipiaya Jonás?
1 ¿Toni tiknemiliaj keman tikelnamikij tanauatijkej Jonás? Sekin kinemiliaj ke katka moujkat oso amo teiknelijkej. Sayoj ke, tein melauj katka se takat yolyemanik, yolchikauak uan motemakak tatakamatis maski ouij kikisaya. ¿Keniuj uelis tikchiuaskej ijkon kemej yejua kichiuak? (Sant. 5:10.)
2. ¿Keniuj uelis tiknextiskej yolyemanilis kemej kinextij Jonás?
2 Yolyemanik. Keman Jonás kiiluijkej maj youi itech se xolal, yejua yajki oksekopa. Uan amo tikmoujkaitaj, porin asirios moixmatiaj kemej tel tateuianij. Uan no, Nínive kitokaytijkej “xolal kampa kimimilouaj [oso kitoyauaj] esti” (Nah. 3:1-3). Jiova kitatsakuiltij Jonás, uan yejua kinextij yolyemanilis keman kichiuak tekit tein oksepa Jiova kimakak satepan (Prov. 24:32; Jon. 3:1-3). Maski yekinika cholojka, satepan Jonás kichiuak itanejnekilis Dios (Mat. 21:28-31). Kemansa tejuan no techmejmelauanij oso titanojnotsaj kampa ouij tikinajsij taltikpakneminij oso techixnamikij. Maski ijkon, ¿tiksentokaj titanojnotsaj?
3. ¿Keyej moneki tiyeskij tiyolchikaujkej uan tikchiuaskej seki taman maski ouij techkisas uan ijkon titanojnotsaskej?
3 Yolchikauak katka uan kichiuak seki taman maski ouij kikisak. Keman Jonás amo tatakamattoya, kiitak ke akin yayaj itech barco ueliskia mikiskej ika itajtakol, yejua ika motemakak mikis (Jon. 1:3, 4, 12). Satepan, keman kichiujtoya tekit tein monekia kichiuas itech xolal Nínive, nejnemik hasta tatajkoyampa itech xolal, xa porin kinekia kitemos kani okachi kuali kijtos tein kinauatijka Jiova. Nejin amo kichiuaskia se aksa akin moujkat, ta se akin yolchikauak (Jon. 3:3, 4). ¿Toni techmachtia nejon? Ke moneki tiktajtaniskej Dios maj techmaka yolchikaualis uan ijkon uelis tiksentokaskej titanojnotsaskej kampa techixnamikij (Hech. 4:29, 31). Uan no, techmachtia ke moneki tikchiuaskej seki taman maski ouij techkisas uan ijkon tikuiskej totonaluan uan totomin itech tanojnotsalis (Hech. 20:24).
4. ¿Keyej moneki titanemiliskej itech kuali neskayot tein kikaujkej tanauatianij?
4 Nochipa keman tikixtajtoltiskej tein kipanok se itanauatijkauj Dios, kuali yeskia komo tiknemiliaj ke tejuan tikpanotokej nejon. Maj timotajtanikan: “¿Toni nikchiuaskia nejua? ¿Keniuj uelis niknextis ikualneskayouan itech nonemilis?” (Heb. 6:11, 12). Satepan, itech okseki amaix ITekiyo Dios tein Tikchiuaj, kiualkuis seki tamachtilis kampa moitas toni uelis techmachtis ininneskayo okseki itanauatijkauan Dios akin amo kikaujkej.