¿Timochikaujtok tikselis tekimej itech nechikol?
1. ¿Kemanian se takat uelis kichiuas tein kijtoua 1 Timoteo 3:1?
1 Itech 1 Timoteo 3:1 kijtoua: “Takan aksa tokniu kineki mochiuas keme tayekanke [...], komo ijkon kinemilia, nojon semi kuali tekit”. Nejin tajtolmej tein moijkuilojkej ika inepaleuil Dios, kinyolchikaua takamej maj mochikauakan kiseliskej tekimej itech nechikol. ¿Moneki timochias hasta keman okachi timoskaltis uan ijkon uelis tikchiuas nejon? Amo, ta semi kuali komo nimanya tipeua. Axkanya uelis mitsmachtiskej keniuj tikchiuas uan tikpias kualneskayomej tein monekis uan ijkon uelis timochiuas tapaleuijkej itech nechikol (1 Tim. 3:10). ¿Timoauijya? Maj tikitakan toni uelis tikchiuas uan ijkon titekitis itech nechikol.
2. ¿Keniuj uelis tiktemos titapaleuis, uan keniuj uelis tikchiuas?
2 Xiktemo keniuj titapaleuis. Amo moneki tiktemos maj mitsueyitalikan itech nechikol, ta moneki tikixtalis tikchiuas se “kuali tekit”, tein ika tikinpaleuis oksekin. Uan yejua ika moneki tiknejnekis tikinpaleuis tokniuan. Semi mitspaleuis komo titanemilia itech ineskayo Jesús (Mat. 20:28; Juan 4:6, 7; 13:4, 5). Komo ouij mitskisa ininka timotekipachos oksekin, xiktajtani Jiova maj mitspaleui (1 Cor. 10:24). ¿Uelis tikinpaleuis tokniuan akin mokokouaj oso akin xiuejkejya? No uelis tikchiuas seki tekimej itech Kali kampa tiMosentiliaj, kemej titachipauas oso titameuas kalixpan. ¿Uelis tikpanoltis se tamachtilis itech Escuela tein Techmachtia iTekiyo Dios komo amo yetok akin kipanoltiskia? Tikitas ke semi tiyolpakis komo tikinpaleuia oksekin (Hech. 20:35).
3. ¿Toni okachi moneki uan ijkon uelis titapaleuis itech nechikol, uan keniuj uelis tikchiuas nejon?
3 Xikchikaua mokuali uikalis iuan Dios. Akin kineki tekitis itech nechikol, okachi moneki maj chikauak ikuali uikalis iuan Dios ke kipias tamatilis oso uelis kichiuas teisa. Se takat akin chikauak itakuaujtamatilis kitemoua tanemilis kemej Jiova uan Jesús (1 Cor. 2:15, 16). Yejua kipia tein “[y]ektikatsin [e]spíritu kichiualtijtok ma onka tech toyolo” (Gál. 5:22, 23). Kitayekanaltia iTekiuajyo Dios keman nochipa tanojnotsa (Mat. 6:33). Uelis tikchikauas mokuali uikalis iuan Dios komo tikixtalia mojmostaj tikixtajtoltis Biblia, tikixtajtoltis nochi amaixmej Tanejmachtijkej uan ¡Despertad! uan timomachtis achto ke tiyas nechikolmej, uan moneki amo titapolos itech nion se nechikol (Sal. 1:1, 2; Heb. 10:24, 25). Keman Pablo kiyolchikauak telpoch Timoteo maj okachi kichikaua itakuaujtamatilis iuan Dios, kiiluij: “Xikyekpixtinemi [...] tenika tejua titamachtijtinemi” (1 Tim. 4:15, 16). Yejua ika, ximomachti kuali keman tikpanoltis se tamachtilis itech Escuela tein Techmachtia iTekiyo Dios uan keman tiyas titanojnotsatiuj. Nochipa xiyouj xitanojnotsati. Xikixtali tikchiuas okachi tekimej itech inechikol Dios, kemej tikchiuas tekit kemej precursor, titekitis Betel oso tikselis Tamachtilis ika Biblia tein kiseliaj Takamej akin ininSelti, uan ximochikaua tikchiuas tein tikixtalia. Komo tikchikaua mokuali uikalis iuan Dios mitspaleuis amo xiuetsi itech “tenika motekauiliaj telpochme ma kinuiyakan tech in tajtakol” (2 Tim. 2:22).
4. ¿Keyej motelneki maj tiyolmelaujkej uan maj titakuaujtamachmej?
4 Xiyolmelauak uan xitakuaujtamach. Itech yekinika siglo mochiuak se mayan tein kinijtakoj tokniuan. Tatitanilmej kinixtalijkej takamej akin ‘kuali kuatamatkanemiajʼ, oso akin kinixmatiaj ke yolmelaujkej uan takuaujtamachmej, maj kixejxelokan takual. Kemej kimatiaj ke nejon takamej kuali kichiuaskiaj tekit, yejuan uelik kichiujkej tekimej tein okachi monekiaj (Hech. 6:1-4). ¿Toni mitsmachtia nejin? Keman tikselis se tekit, moneki timochikauas kuali tikchiuas. Xiktojtoka ineskayo Noé, akin kichijchiuak arca ijkon kemej Jiova kinauatijka (Gén. 6:22). Jiova kiita ke motelneki maj tiyolmelaujkej uan nejin se taman tein kinextia ke chikauak tokuali uikalis iuan (1 Cor. 4:2; xikixtajtolti recuadro “Keyej motelneki maj techmachtikan”).
5. ¿Keyej moneki maj telpochmej mochikauakan kiseliskej tekimej itech nechikol?
5 Ijkon kemej moijtoj ne uejkauj, Jiova kichiujtok maj okachi taltikpakneminij motokikan itech inechikol (Is. 60:22). Xijxiujtika moauiaj kemej 250,000 taltikpakneminij. Kemej tel miakej motokijtokej itech inechikol Jiova, moneki moajsiskej okachi takamej akin chikauak ininkuali uikalis iuan Dios, akin uelis kichiuaskej seki tekimej itech nechikol. Axkan onkak okachi tekit tein Jiova techmakatok (1 Cor. 15:58). Yejua ika, telpochmej akin mochikauaj kiseliskej tekimej itech nechikol semi kuali tein kichiuaj.
[Tanemilil itech página 2]
Kemej tel miakej motokijtokej itech inechikol Jiova, moneki moajsiskej okachi takamej akin chikauak ininkuali uikalis iuan Dios, akin uelis kichiuaskej seki tekimej itech nechikol
[Recuadro itech página 3]
Keyej motelneki maj techmachtikan
Telpochmej akin kuali tekititokej kinpaleuia komo tayekananij kinmakaj seki tekimej uan kinmachtiaj keniuj kichiuaskej. Kemej neskayot, se tokniuj takalpanojkej kijtoua ke satepan ke tamik se nechikol, kiyolchikaujtoya se tanojnotskej itech plataforma. Ompa, kiitak se okichpil ijkatoya kampa ika yejuan moajsiaj, uan kitajtanij ox kichixtoya porin kinekia iuan tajtos. Okichpil kiiluij ke kitalijkej maj yejua tachipaua ompa keman tamiskiaj nechikolmej. Itatuan yajtoyajya, sayoj ke yejua amo kinekia yas porin ayamo tachipauaya. Ika miak pakilis, tokniuj motalij okseko. Satepan kijtoj: “Tayekananij itech nejon nechikol nochipa kiitayaj keniuj kuali kinmachtiskej okichpipil akin kuali tekititokej keman kinmakayaj tekimej. Yejua ika, nochipa keman nitakalpanouaya itech nejon nechikol, kiixtaliayaj se telpoch maj kiseli tekit kemej tapaleuijkej”.